Belqradda GUAM ölkələri Xarici İşlər Nazirləri Şurasının iclası keçirilib.

"Dalğa TV"nin "Regnum"; agentliyinə istinadən verdiyi xəbərə görə, toplantıda əməkdaşlıq üzrə cari məsələlər, siyasi, digər sahələr və parlamentlərarası əməkdaşlıq məsələləri müzakirə olunub. Şura Gürcüstan nümayəndəsi Valeri Çeçelaşviliyə GUAM baş katibi kimi uğurlu fəaliyyətinə görə təşəkkür edib. İclasda 1 yanvar tarixindən başlayaraq təşkilata sədrliyin Azərbaycan keçəcəyi, baş katibin isə Altay Əfəndiyev olacağı bildirilib.

Görüşdə GUAM-ın ABŞ, Yaponiya kimi tərəfdaş ölkələr, digər beynəlxalq və regional təşkilatlarla əməkdaşlığına yüksək qiymət verilib.

"Ermənistan-Azərbaycan, Dağlıq Qarabağ münaqişəsinin həllində Azərbaycan mövqeyini dəstəklədiklərinə görə Türkiyə xalqına, dövlətinə təşəkkür edirəm".
Bunu Azərbaycan Prezidenti İlham Əliyev Türkiyənin baş naziri Əhməd Davudoğlu ilə keçirdiyi birgə mətbuat konfransında deyib.

Dövlət başçısı qeyd edib ki, uzun illərdir Azərbaycan erməni işğalından əziyyət çəkir: "Beynəlxalq birlik tərəfindən tanınan torpaqlarımızın 20 faizi erməni işğalı altındadır. Şəhərlərimiz, kəndlərimiz, məscidlərimiz, tarixi abidələrimiz ermənilər tərəfindən dağıdılıb.

BMT Təhlükəsizlik Şurası münaqişənin həlli ilə bağlı 4 qətnamə qəbul edib. Qətnamələrdə erməni silahlı qüvvələrinin işğal edilmiş torpaqlardan qeyri-şərtsiz çıxarılması nəzərdə tutulur. Ancaq Ermənistan buna məhəl qoymur. Bu qətnamələr 20 ildən artıqdır ki, kağız üzərində qalıb. Bu və bütün başqa münaqişələr beynəlxalq hüquq əsasında ölkələrin ərazi bütövlüyü çərçivəsində öz həllini tapmalıdır. Bunun başqa həll yolu yoxdur".

Prezident İlham Əliyev bildirib ki, baş nazir Əhməd Davudoğlu ilə görüşdə Azərbaycan və Türkiyəni birləşdirən enerji-nəqliyyat layihələri haqqında fikir mübadiləsi aparıblar: "Burada da ölkələrimiz, xalqlarımız, bölgə və dünya üçün gördüyümüz işlər böyük məna daşıyır. Xüsusilə TANAP layihəsini qeyd etmək istəyirəm. Layihə Türkiyə və Azərbaycanın ortaq layihəsidir. Biz bu layihəni birgə icra etməyə başladıq. Bu gün bu layihə beynəlxalq layihə kimi dünya miqyasında diqqət mərkəzindədir. Layihənin icrasında heç bir problem yoxdur. Bu gün bu məsələni bir daha müzakirə etdik. Əminəm ki, vaxtında-2018-ci ildə, bəlkə də ondan da tez bu layihə icra ediləcək. Beləliklə Azərbaycan Türkiyəyə, ondan sonra Avropaya daha böyük həcmdə təbii qazı ixrac edə biləcək. Türkiyə və Avropa ölkələri yeni alternativ mənbəyə çıxışı əldə edəcəklər. Bütün tərəflər bu layihənin icrasından ancaq fayda görəcəklər. Azərbaycanın çox zəngin təbii qaz yataqları var".

Dövlət başçısının sözlərinə görə, Azərbaycanın təsdiq edilmiş qaz ehtiyatı 2,6 trilyon kub metrdir: "Bizim əsas resurs bazamız "Şahdəniz" layihəsidir. Ancaq onun kənarında da çox böyük digər qaz yataqlarımız var. Bizim əsas ixrac yolumuz da artıq bəllidir, bu Türkiyədir. Türkiyə üzərindən digər Avropa ölkələridir. Məmnunam ki, bununla bərabər qarşılıqlı sərmayə qoyuluşu da uğurla həyata keçirilir. Həm Türkiyə, həm də Azərbaycan şirkətləri qarşılıqlı olaraq sərmayə qoyurlar. Azərbaycan yaxın illərdə Türkiyəyə 20 milyard dollara yaxın sərmayə qoyacaq. O sərmayənin artıq bir hissəsi qoyulub. Bu bir daha bizim siyasi iradəmizi əks etdirir. Ancaq dost ölkələrin iqtisadiyyatlarına bu qədər sərmayə qoyula bilər".

Prezident vurğulayıb ki, Azərbaycan və Türkiyə bütün digər sahələrdə də, o cümlədən humanitar sahədə sıx əməkdaşlıq edir: "Hərbi sahədə də çox gözəl əməkdaşlıq aparılır. Azərbaycan Türkiyədən ordumuza lazım olan silahları alır. Eyni zamanda, biz artıq bir neçə dəfədir ki, hərbi təlimlərdə keçirmişik. Həm Türkiyədə, həm də Azərbaycanda. Bu bir daha bizim birliyimizi nümayiş etdirir, bizim gücümüzü artırır. Bu gün həm regional işlərdə, həm də Avropada gedən proseslərdə hər iki ölkə ciddi faktor kimi mövcuddur. Son illər ərzində Türkiyənin inkişafı, güclənməsi, dünya miqyasında Türkiyənin artan rolu qardaş və dost ölkə kimi bizi çox sevindirir. Biz gücümüzə güc qatırıq. Bu əsas məsələdir. Bundan sonra da bütün məsələlərdə bir-birimizi dəstəkləyəcək və bir birimizin yanında olacağıq".

Ukrayna prezidenti Pyotr Poroşenko 2016-cı ilin ilk yarısında Azərbaycana rəsmi səfər etməyi planlaşdırır.

Oxu.Az-ın xəbərinə görə, bu barədə məlumat Ukrayna Prezident administrasiyasının rəsmi saytında yerləşdirilib.

Xatırladaq ki, bundan əvvəl Azərbaycan prezidenti İlham Əliyev və Ukrayna prezidenti Pyotr Poroşenko arasında baş tutan telefon danışığı zamanı dövlət başçıları iki ölkə arasında yüksək səviyyədə siyasi dialoqun fəallaşdırılmasına hazır olduqlarını ifadə ediblər.

Belqradda Rusiya xarici işlər naziri Sergey Lavrovla Türkiyə xarici işlər naziri Mövlud Çavuşoğlu arasında görüş keçirilir.

AzNews.az APA-ya istinadən xəbər verir ki, görüş ATƏT Xarici İşlər nazirləri Şurası çərçivəsində baş tutur.

Qeyd edək ki, ötən gün S. Lavrov tədbir çərçivəsində türkiyəli həmkarı ilə görüş üçün müraciət edib.

Azərbaycan prezidenti İlham Əliyev dekabrın 2-də Gürcüstanın müdafiə naziri, xanım Tinatin Xidaşelini qəbul edib.

"Dalğa TV" məlumatına görə, dövlət başçısı bu yaxınlarda Gürcüstana rəsmi səfərini və keçirdiyi görüşlər zamanı ikitərəfli əlaqələrimizi əhatə edən müxtəlif məsələlər ətrafında aparılan səmərəli müzakirələri xatırladıb. Prezident İlham Əliyev ikitərəfli əlaqələrin bütün sahələrdə, o cümlədən siyasi, iqtisadi və energetika sahələrində uğurla inkişaf etdiyini bildirib. Dövlət başçısı Gürcüstan müdafiə nazirinin Azərbaycana səfərinin iki ölkə arasında müdafiə sahəsində əməkdaşlığa dair məsələlərin müzakirəsi baxımından mühüm əhəmiyyət daşıdığını qeyd edib.

Gürcüstanın müdafiə naziri də Azərbaycana səfərinin ölkələrin hərbi strukturları arasında əməkdaşlığın genişləndirilməsi işinə töhfə verəcəyinə əminliyini ifadə edib. T. Xidaşeli ölkəsinin Azərbaycanla ikitərəfli əlaqələrə xüsusi önəm verdiyini vurğulayıb.

Azərbaycan gəmiçilik tariflərini azaldıb.

“Azərbaycan Xəzər Dəniz Gəmiçiliyi” QSC-dən AzNews.az-a verilən məlumata görə, Türkiyədən Qazaxıstan istiqamətində yük maşınları ilə daşımalar üçün Xəzər üzərindən marşrutda əlverişli şəraitin yaradılması ilə əlaqədar, Azərbaycan Respublikasının Prezidenti İlham Əliyevin müvafiq göstərişlərini rəhbər tutaraq, “Azərbaycan Xəzər Dəniz Gəmiçiliyi” QSC Azərbaycandan Qazaxıstana dəniz yolu ilə daşıma tariflərinə 20%-ə qədər endirim tətbiq edir.

Yeni tarif sürücü ilə birlikdə 1 standart qoşqulu yük avtomobilinin (16,5 metr uzunluqda TİR) bir istiqamətdə (Bakı-Aktau və ya Aktau-Bakı) daşınması üçün 1,200 ABŞ dolları məbləğində müəyyənləşdirilir. Geri dönüş üçün bilet öncədən alındığı halda, bu tarif hər iki istiqamətə bir qədər də aşağı, cəmi 2,100 ABŞ dolları təşkil edəcək.