İqtisadi və sosial məsələlərin həlli müzakirə edildi.

Yanvarın 18-də Azərbaycan Respublikasının Prezidenti İlham Əliyevin yanında iqtisadi və sosial məsələlərin həlli ilə bağlı müşavirə keçirilib.

"Dalğa TV"nindövlət başçısının rəsmi saytına istinadən verdiyi məlumata görə, Prezident İlham Əliyev bildirdi ki, 2015-ci ildə dünyada neftin qiymətinin kəskin düşməsi nəticəsində neft ixrac edən ölkələr çətinliklərlə üzləşiblər və bu proses indi də davam edir.

Son bir ildə neftin qiymətinin 4 dəfə düşdüyünü, bunun isə gəlirlərin azalmasına təsir etdiyini deyən dövlətimizin başçısı hazırda Azərbaycanın vəziyyətdən çıxmaq üçün addımlar atdığını, digər neft ölkələri ilə müqayisədə ən az itki ilə üzləşdiyimizi diqqətə çatdırdı. Nazirlər Kabinetinin ötən iclasında verilən tapşırıqlar yerinə yetirildiyi təqdirdə Azərbaycanın çətinliklərdən asanlıqla çıxacağını deyən Prezident İlham Əliyev ölkədə islahatların dərinləşməsinin vacibliyini vurğuladı, bununla bağlı səslənən təkliflərin artıq icra olunmağa başladığını dedi.

İlk növbədə insanların sosial müdafiəsi ilə bağlı məsələlərin diqqət mərkəzində saxlanılacağını deyən dövlətimizin başçısı son illərdə ölkədə həyata keçirilən işlərin insanların rifah halının daha da yaxşılaşdırılmasına yönəldiyini bildirdi. Bu yaxınlarda pensiya və əmək haqlarının 10 faiz qaldırılmasının bu istiqamətdə atılan önəmli addım olduğunu dedi.

Prezident İlham Əliyev çıxışında süni bahalaşmaya da münasibət bildirdi, bu problemə qarşı ciddi mübarizə aparılmasının əhəmiyyətini vurğuladı. İşbazların qiymətləri süni şəkildə bahalaşdırmağa çalışdığını deyən dövlətimizin başçısı görülən tədbirlər nəticəsində çörəyin və unun qiymətinin əhəmiyyətli dərəcədə aşağı düşdüyünü bildirdi.

Struktur islahatları ilə bağlı artıq müəyyən addımların atıldığını deyən Prezident İlham Əliyev bildirdi ki, bu tədbirlər daimi olmalı, bir-birini təkrarlayan və lazımsız dövlət qurumları ya birləşdirilməli, ya da ləğv olunmalıdır. Valyuta bazarının tənzimlənməsi ilə bağlı müvafiq göstərişlərin verildiyini, təkliflərin hazırlandığını deyən dövlətimizin başçısı bu sahədə qanunvericilik bazasının möhkəmləndirilməsinin əhəmiyyətinə toxundu, Milli Məclisin növbədənkənar sessiyasında məsələyə baxılacağını dedi.

Bundan əlavə, Prezident İlham Əliyev beynəlxalq ekspertlərin iştirakı ilə geniş özəlləşdirmə proqramının hazırlanması, bu işə xarici və yerli investorların cəlb olunması, iqtisadi canlanmaya nail olmaq üçün biznes mühitinin yaxşılaşdırılması ilə bağlı tapşırıqlarını verdi.
Dövlətimizin başçısı manatın etimadının bərpası ilə bağlı ciddi tədbirlərin görülməsinin əhəmiyyətinə də toxundu, hazırda ölkədə müşahidə olunan dollarizasiya prosesinin heç bir iqtisadi əhəmiyyətinin olmadığını dedi.

Manatın məzənnəsinin sabit saxlanmasının təkcə hökumətdən asılı olmadığını deyən dövlətimizin başçısı bank sektorunun tənzimlənməsi ilə bağlı təkliflərə baxıldığını, problemli bankların sağlamlaşdırılması prosesinin aparılması, dövlət istiqrazlarının buraxılması, əmanətlərin sığortalanması ilə bağlı əlavə tədbirlərin görülməsinin vacibliyini bildirdi, bu kimi tədbirlərin milli valyutaya olan inamı artıracağını dedi.

Prezident İlham Əliyev bildirdi ki, ölkəmizin xarici borcunun çox aşağı səviyyədə olması və mövcud vəziyyət nəzərə alınaraq xarici maliyyə bazarlarından lazımi qədər maliyyə resursları Azərbaycan bazarına cəlb edilə bilər. Qeyri-neft sektorunun inkişafının indiki vəziyyətdə prioritet olmasının vacibliyini bildirən dövlətimizin başçısı Sahibkarlığa Kömək Milli Fondunun dəstəyi ilə bu il 250 milyon manat güzəştli kreditlərin veriləcəyini, sahibkarların öz maliyyə resurslarını da nəzərə alaraq o zaman regionlara qoyulan investisiyanın həcminin təxminən 1 milyard manat olacağını bildirdi.

Prezident İlham Əliyev çıxışında daha bir vacib məsələyə toxundu, iş adamlarına böyük tikinti layihələrini icra etmək üçün şəraitin yaradılması, bu sahədə mövcud olan əsassız tələblərin, bürokratiya və korrupsiya hallarının aradan qaldırılması ilə bağlı ciddi tapşırıqlar verdi. Bununla yanaşı, dövlətimizin başçısı ipoteka bazarının səmərəliliyinin artırılması, bu yolla inşa olunacaq binaların tikintisinin sürətləndirilməsi ilə bağlı təkliflərin hazırlanmasını tapşırdı.

Son 10 ildə Azərbaycanın dünyada ən sürətlə inkişaf edən ölkə olduğunu deyən Prezident İlham Əliyev bunu bütün beynəlxalq və maliyyə qurumlarının təsdiq etdiyini dedi, bu il ərzində Azərbaycanda iqtisadi inkişafla bağlı heç bir problemin olmayacağına əminliyini ifadə etdi.

Hökumət üzvləri də müzakirələrdə çıxış etdilər.

"Gürcüstan hakimiyyəti şəffaf enerji siyasəti yeritməlidir".

"Dalğa TV"nin "apsny.ge" saytına istinadən verdiyi xəbərə görə, bu barədə ABŞ-ın Gürcüstandakı səfiri Yan Kelli jurnalistlərə açıqlamasında bildirib.

"Hökumətin enerji siyasəti sahəsində şəffaf olması həmişə vacibdir. Gürcüstanın qısamüddətli enerji ehtiyatı var. Hesab edirəm ki, potensial enerji mənbəyi axtarışında olmaq uzaqgörən addımdır. Əlbəttə, biz Rusiyanın Gürcüstan ərazilərini işğal etməsindən narahatıq. Halbuki Gürcüstan hökumətinin bu çağırışları anlaşdığını düşünürəm", - deyə diplomat qeyd edib.

Qeyd edək ki, Gürcüstanın illik qaz istehlakı 2,5 milyard kubmetr təşkil edir. Qazın böyük qismini Azərbaycandan, qalan qismi isə Rusiyadan alınır.

Rustavidə azərbaycanlı fəallar və ağsaqqallarla görüş keçirilib.

"Dalğa TV" APA-ya istinadən xəbər verir ki, tədbirdə Kvemo Kartli bölgə qubernatoru Paata Xizanişvili bir illik fəaliyyəti barədə hesabatla çıxış edib. O, azərbaycanlıların həmişə Gürcüstanda dövlətçiliyinə dəstək verdiyini bildirib. Xizanaşvili azərbaycanlı ağsaqqallara müraciət edərək bildirib ki, hazırda onların bütün işlərə rəhbərlik etməsinin vaxtı gəlib: "Bizim qapımız hər bir insana açıqdır. Biz bir-birimizi başa düşməyə başlamışıq, aramızda etibar yaranıb".

Qubernator bölgədə hələ də kadr məsələlərində nöqsanlar olduğunu, həmçinin informasiya boşluğunun olduğunu bildirib.

APA-ya açıqlama verən qubernator bölgə üzrə Ağsaqqallar Şurası yaradılacağını bildirib. O, azərbaycanlılar içində böyüdüyünü və az da olsa, Azərbaycan dilində danışa bildiyini deyib.

Gürcüstanın keçmiş prezidenti, Ukraynada Odessa vilayətinin qubernatoru Mixail Saakaşvilinin "Vahid milli hərəkat" partiyası bu gün Gürcüstan hökumətinin "Qazprom"la əməkdaşlığı ilə bağlı etiraz aksiyası keçirib.

"Dalğa TV"nin "Vzqlyad" qəzetinə istinadən verdiyi məlumata görə, partiya üzvləri Energetika Nazirliyinin qarşısına toplanıblar. Piket zamanı yaxınlıqdakı körpüyə "Qazprom" əleyhinə plakatlar asmaq istəyən piket iştirakçıları ilə polis arasında qarşıdurma yaranıb. Aksiya zamanı "Qazproma" yox!" şüarları səsləndirilib.

Qeyd edək ki, Gürcüstan hökumətinin "Qazprom"la apardığı gizli danışıqlar müxalifətin etirazına səbəb olub. Müzakirə predmeti "Qazprom" tərəfindən Gürcüstana nəql olunan qazın həcminin artırılmasıdır. Gürcüstan müxalifəti iddia edir ki, danışıqlar ölkənin enerji sisteminin müstəqilliyinə təhlükə yaradır.

Hökumət rəsmiləri isə bildirir ki, SOCAR Gürcüstanın qaz olan tələbatını ödəmək iqtidarında deyil.

"Hansı təhlükələr gözlənilir?".

Gürcüstanın energetika naziri Kaxaber Kaladze "Qazprom"ilə danışıqların bütün detallarını açıqlamalıdır.

"Dalğa TV" "Qruziya online"a istinadən xəbər verir ki, bu barədə deputat Zurab Caparidze bildirib.

"Əgər Gürcüstana əlavə təbii qaz tələb olunursa bunu Azərbaycan təmin edə bilər. Və ümumiyyətlə, danışıqlar niyə başladı və nə haqqında gedir, hansı təhlükələr gözlənilir? Biz konkret informasiya almalıyıq, söhbətin nədən getdiyini bilməliyik ki, təhlükənin olub-olmamasını qərara alaq", - Z.Caparidze bəyan edib.

Bununla yanaşı, "Azad demokratlar"ın üzvü Georgi Tsaqareşvili Kaxaber Kaladzeyə narahatçılığı kəskinləşdirməməyi və "düşmən əhval-ruhiyyəsində olan ölkənin, düşmən əhval-ruhiyyəsində olan şirkəti" ilə danışıqlar barədə informasiyanı açıqlamağı məsləhət görür.

Qeyd edək ki, yanvar ayının 12-də Gürcüstanın sabiq baş naziri, milyarder Bidzina İvanişvilinin iqamətgahı önündə Rusiyanın "Qazprom" şirkəti ilə danışıqlara dair etiraz aksiyası keçirilib. Aksiya iştirakçıları "Qazprom"un Gürcüstan bazarına girməsinə imkan verməyəcəklərini bəyan ediblər.

Gürcüstanın baş naziri Giorgi Kvirikaşvili Tiflisdə səfərdə olan SOCAR prezidenti Rövnəq Abdullayevlə görüşüb.

"Dalğa TV"nin APA-ya istinadən verdiyi məlumata görə, görüşdə ikitərəfli tərəfdaşlıq və strateji əməkdaşlığın dərinləşdirilməsi məsələləri müzakirə olunub.

G. Kvirikaşvili Azərbaycanın ölkəsinin strateji tərəfdaşı olduğunu vurğulayıb. O qeyd edib ki, siyasi spekulyasiyalara baxmayaraq, Gürcüstan hökuməti SOCAR-la gələcək əməkdaşlıq məsələlərini müzakirə etməyə hazırdır. "Azərbaycan dost ölkədir və bu, çox vacibdir. Biz problemləri həll etmək istəyirik. Hesab edirəm ki, əməkdaşlığımızın inkişafına heç bir texniki maneə ola bilməz", - deyə o bildirib.

Görüşdə Gürcüstanda yay və qış mövsümündə təbii qaz təchizatının balanslaşdırılması ilə bağlı məsələlər də müzakirə edilib. Qış mövsümündə Azərbaycandan Gürcüstana verilən qazın yetərli olmadığını bildirilərək qeyd olunub ki, mövcud boru kəmərlərinin maksimum güclə işləməsi məqsədilə onları əlavə həcmdə təbii qazla təmin etmək üçün bəzi tədbirlər həyata keçirilməlidir. Tərəflər vurğulayıblar ki, bu istiqamətdə işçi format çərçivəsində müzakirələr davam etdiriləcək.

Görüşdə Gürcüstanda 2016-cı ildə tikiləcək yeraltı qaz anbarı layihəsinin tikintisinə SOCAR-ın maraq göstərdiyi də bildirilib.