“Ərdoğan və Putinin sabahkı görüşü baş tutmayacaq”.

AzNews.az Türkiyə mətbuatına istinadən xəbər verir ki, bu barədə Rusiya prezidentinin mətbuat xidmətinin rəhbəri Dmitri Peskov məlumat yayıb. Açıqlamada bildirilir ki, sabah Rusiyada keçiriləcəyi gözlənilən zirvə toplantısı baş tutmayacaq.

Xatırladaq ki, Türkiyə prezidenti ilə Rusiya prezidenti 15 dekabrda görüşməklə bağlı razılığa gəlmişdilər. Lakin, 24 noyabrda Rusiyanın SU-24 təyyarəsinin vurulmasından sonra keçiriləcək bir çox toplantılar təxirə salınıb.

Azərbaycanda 2 yeni qurum yaradıldı.

Azərbaycan Prezidenti İlham Əliyev Dövlət Təhlükəsizliyi Xidmətinin və Azərbaycan Xarici Kəşfiyyat Xidmətinin yaradılması haqqında fərman imzalayıb.

"Dalğa TV" dövlət başçısının rəsmi saytına istinadən xəbər verir ki, fərmanda qeyd olunur:

Azərbaycan Respublikası Konstitusiyasının 109-cu maddəsinin 7-ci bəndini rəhbər tutaraq, Azərbaycan Respublikasında xüsusi xidmət orqanlarının fəaliyyətinin səmərəliliyini artırmaq və dövlət idarəetmə strukturunu təkmilləşdirmək məqsədi ilə qərara alıram:

1. Azərbaycan Respublikası Milli Təhlükəsizlik Nazirliyinin əsasında Azərbaycan Respublikasının Dövlət Təhlükəsizliyi Xidməti və Azərbaycan Respublikasının Xarici Kəşfiyyat Xidməti yaradılsın.

2. Azərbaycan Respublikasının Dövlət Təhlükəsizliyi Xidmətinə və Azərbaycan Respublikasının Xarici Kəşfiyyat Xidmətinə tapşırılsın ki, əsasnamələrinin layihələrini, strukturları və işçilərinin say tərkibi barədə təkliflərini bir ay müddətində Azərbaycan Respublikasının Prezidentinə təqdim etsinlər.

3. Azərbaycan Respublikasının Nazirlər Kabineti:

3.1. Azərbaycan Respublikasının 2015-ci il və 2016-cı il dövlət büdcələrində Azərbaycan Respublikasının Milli Təhlükəsizlik Nazirliyi üçün nəzərdə tutulmuş vəsait çərçivəsində Azərbaycan Respublikasının Dövlət Təhlükəsizliyi Xidmətinin və Azərbaycan Respublikasının Xarici Kəşfiyyat Xidmətinin 2015-ci və 2016-cı illərdə fəaliyyətinin maliyyələşməsini təmin etsin;

3.2. Azərbaycan Respublikasının Dövlət Təhlükəsizliyi Xidmətinin və Azərbaycan Respublikasının Xarici Kəşfiyyat Xidmətinin fəaliyyətinin təşkili üçün maddi-texniki təminatı ilə bağlı məsələləri həll etsin;

3.3. Azərbaycan Respublikası Prezidentinin aktlarının bu Fərmana uyğunlaşdırılması ilə bağlı təkliflərini bir ay müddətində Azərbaycan Respublikasının Prezidentinə təqdim etsin;

3.4. Azərbaycan Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını bir ay müddətində təmin edib Azərbaycan Respublikasının Prezidentinə məlumat versin;

3.5. mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

3.6. bu Fərmandan irəli gələn digər məsələləri həll etsin.

4. Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.

Türkmənistanda iş səfəri çərçivəsində Qiorqi Marqvelaşvili Əfqanıstan İslam Respublikasının prezidenti Məhəmməd Əşrəf Qani ilə görüşdü.

"Dalğa TV" xəbər verir ki, Görüş zamanı tərəflər arasında siyasi və iqtisadi əlaqələrin inkişaf etdirilməsi müzakirə olundu. Söhbət zamanı nəqliyyat əlaqəsi baxımından "Lapis Lazuli" layihəsindən də danışıldı. Bu layihə əfqan tərəfinin təşəbbüsü ilə Əfqanıstanın qərbindən nəqliyyat, tranzıt və ticarət sahələrində əməkdaşlığı nəzərdə tutur.

Qiorqi Marqvelaşvilinin bəyanatına əsasən Gürcüstan kəskin şəkildə günahsız insanların qurbanı olduqları terorizmi, Əfqanıstanda şiddətin bütün formalarını pisləyir.

Məhəmməd Əşrəf Qani Qiorqi Marqvelaşviliyə Əfqanıstanda NATO-nun "Güclü dəstək missiyası"nda Gürcüstanın iştirakı üçün təşəkkürünü bildirdi. Öz növbəsində Gürcüstan Əfqanıstan dövlət strukturlarında həyata keçirilən nailiyyətli islahatlar baxımından yardım təklif etdi.

Gürcüstanda azərbaycanlıların yığcam yaşadıqları Kvemo Kartli-Borçalı bölgəsinin Bolnisi rayonunda xalqımızın ümummilli lideri Heydər Əliyevin vəfatının 12-ci ildönümü qeyd olunub.

Bolnisi Mədəniyyət Mərkəzində təşkil olunmuş mərasimdə çıxış edən “Ümid” qəzetinin redaktoru Əlixan Məmmədov ümummilli lider Heydər Əliyevin həyat və fəaliyyətindən, xilaskar rolundan bəhs edib. Vurğulayıb ki, Azərbaycan və Gürcüstan arasında strateji tərəfdaşlığın təməli Heydər Əliyev tərəfindən qoyulub. Bu siyasi kursun Azərbaycan Prezidenti İlham Əliyev tərəfindən uğurla davam etdirilməsi nəticəsində dostluq münasibətləri daha da möhkəmlənir və inkişaf edir.

Mərasimdə çıxış edənlər Heydər Əliyevin xalqımız qarşısındakı xidmətlərini xatırladıb, onun xatirəsinin Gürcüstanda yaşayan soydaşlarımız tərəfindən daim əziz tutulduğunu vurğulayıblar.

Gürcüstanda Ulu Öndər Heydər Əliyevin vəfatının 12-ci ildönümü münasibəti ilə anım mərasimləri keçirilib.

İlk öncə Azərbaycanın Gürcüstandakı səfiri Azər Hüseyn və səfirliyin əməkdaşları Heydər Əliyevin Tbilisidəki büstünü ziyarət ediblər, önünə gül dəstələri qoyublar. Anım mərasimində vurğulanıb ki, 1993-cü ildə Heydər Əliyev yenidən hakimiyyətə qayıtmaqla, Azərbaycanın xilaskarı olub. Heydər Əliyevin nüfuzu, ağılı və bacarığı sayəsində Azərbaycan qısa müddət ərzində düzgün inkişaf yoluna qədəm qoyub. Heydər Əliyev öz müdrikliyi sayəsində müasir Azərbaycanın memarı hesab edilir. Qeyd olunub ki, o hər zaman Gürcüstanın dostu olaraq qaldı və bu xatirəni biz hər zaman qoruyub saxlayacağıq. Ona təşəkkür edirik ki, bu gün biz bir yerdəyik. Təşəkkür edirik ki, bu gün Azərbaycan və Gürcüstan çox düzgün istiqamətdə olan yolla gedirlər.

 Sonra anım tədbiri Rustavi şəhərində davam etdirilib. Səfir və səfirlik əməkdaşları, habelə Rustavidə yaşayan azərbaycanlı ziyalılar şəhərdəki Heydər Əliyev adına parkın qarşısında ucaldılmış heykəlin önünə gül-çiçək dəstələri qoyublar. Anım mərasimində Ulu Öndərin zəngin siyasi fəaliyyətinə nəzər salınıb. Qeyd olunub ki , Heydər Əliyev Azərbaycanın çətin bir vaxtında, 1993-cü ilin iyununda xalqımızın təkidli tələbi ilə ikinci dəfə hakimiyyətə qayıtdıqdan sonra ölkədə vətəndaş müharibəsinin qarşısı alındı, sabitlik yarandı, iqtisadi sahədə islahatlara başlandı, neft strategiyasının əsası qoyuldu, ölkəyə xarici sərmayə cəlb olundu, Azərbaycanın beynəlxalq nüfuzu artmağa başladı.Həmin dövrdə Heydər Əliyev rəhbərliyi öz üzərinə götürməsəydi, bugünkü müstəqil Azərbaycan da olmazdı. Ümummilli Liderin Azərbaycan xalqı və dövləti qarşısında xidmətləri danılmazdır. Ulu Öndərin ən böyük xidmətlərindən biri də özündən sonra Azərbaycanı layiqincə idarə edəcək bir siyasətçi -İlham Əliyev kimi rəhbər yetişdirməsidir. Sonra səfir Azər Hüseyn Rustavidə yaşayan və fəaliyyət göstərən bir qrup QHT rəhbəri, ziyalılar və gənclərlə görüşüb, onların problemləri ilə maraqlanıb.

 Qeyd edək ki, növbəti anım tədbiri Bolnisi rayonunda olacaq. Tədbir Bolnisi Mədəniyyət Mərkəzinin təşəbbüsü ilə keçiriləcək.

Hökumət başçısını tribunadan kənarlaşdırmağa çalışdılar.

Ukraynanın Ali Radasında ölkənin baş naziri Arseni Yatsenyukun çıxışı zamanı "Blok Pyotr Poroşenko" (Pyotr Poroşenkonun bloku) və "Narodnı front" (Xalq cəbhəsi) partiyalarının deputatları arasında dava düşüb.

"Dalğa TV" "İnterfaks ukraina"ya istinadən xəbər verir ki, hökumətə etimadsızlıq layihəsi üzrə imza toplayan xalq deputatı Oleq Barna ("Blok Pyotr Poroşenko") tribunaya baş nazirə bir dəstə qızılgül gətirib və onu qucağına alaraq tribunadan uzaqlaşdırmağa çalışıb.

Deputatlar tribuna qarşısında dalaşıblar, baş nazirin çıxışı bir neçə dəqiqəlik kəsilib.