Gürcüstanda Rusiyanın "Qazprom" şirkəti ətrafında aparılan siyasi spekulyasiyalara son qoyulmalıdır.

"Dalğa TV"nin məlumatına görə, bunu Gürcüstanın baş naziri Giorgi Kvirikaşvili bəyan edib.

O qeyd edib ki, energetika naziri Kaxa Kaladze ilə "Qazprom" nümayəndələri ilə aparılan danışıqlar Gürcüstanda ajiotaj yaradıb. G. Kvirikaşvili jurnalistlərə açıqlamasında Gürcüstanın Azərbaycan ilə strateji əməkdaşlıq etdiyini bildirib: "Biz o cümlədən SOCAR-la əməkdaşlıq edirik. Bizi bu əməkdaşlığa görə heç bir təhlükə gözləmir. Bunu mən bir daha bəyan edirəm", deyə baş nazir qeyd edib.

Giorgi Kvirikaşvili "Rustavi" televiziya kanalına "Qazprom"la bağlı danışıqların texniki problemlərə aid olduğunu deyib: "Söhbət hər hansı strateji danışıqlardan getmir. Bu məsələ artıq sona çatıb. "Qazprom" ilə danışıqlar sırf texniki olub və bunu siyasi spekulyasiya kimi əsassız olaraq davam etdirmək olmaz".

"Qazprom" ilə danışıqların davam etməsinə səbəb Rusiyanın Ermənistana göndərdiyi təbii qazın əvəzində Gürcüstana pul ilə ödəniş təklif etməsi olub", deyə Q. Kvirikaşvili bildirib.

Qeyd edək ki, keçən il dekabrın 31-dən Rusiyanın "Qazprom" şirkəti ilə razılaşmanın vaxtı sona çatıb və Gürcüstanın energetika nazirliyi şirkətdən kommersiya qiymətinə qaz almaq niyyətində olduğunu bildirib.

Tbilisi ikitərəfli münasibətlərdə yeni səhifə açmağa hazırdır.

Tehran və Tbilisi bütün sahələrdə münasibətləri yaxşılaşdırmalıdırlar.

"Dalğa TV" "Regnum"a istinadən xəbər verir ki, bu barədə bazar ertəsi İran prezidenti Həsən Ruhani Gürcüstanın baş naziri Georgi Kvirikaşvili ilə telefon söhbəti zamanı bildirib.

"İran və Gürcüstan arasında iqtisadi və mədəni əməkdaşlıq iki xalqın maraqlarına müvafiq olaraq möhkəmləndirilməlidir", - Ruhani vurğulayıb.

İran prezidenti Tehran və Tbilisinin iqtisadi əməkdaşlığı yaxşılaşdırmaq üçün böyük potensiala malik olduqlarını əlavə edərək, iki ölkə arasında viza rejiminin ləğv edilməsinin münasibətlərin inkişafına yardım edəcəyini qeyd edib.

Georgi Kvirikaşvili öz növbəsində, Gürcüstanın ikitərəfli münasibətlərdə yeni səhifə açmağa hazır olduğunu qeyd edib.

Gürcüstanın baş naziri, həmçinin yaxın zamanda Tehrana səfər edəcəyini bildirərək, İran prezidentini də Tbilisiyə dəvət edib.

Türk mətbuatında ölkəmizin ərazi bütövlüyünə hörmətsizlik olub.

Türkiyənin məşhur saytlarından birində Azərbaycana qarşı hörmətsizlik edilib.

"Dalğa TV"nin ANS PRESS-ə istinadən verdiyi məlumatına görə, Türkiyənin "Sabah" qəzetinin saytı Dünya Turizm Forumu çərcivəsində keçirilən "nazirlər toplantısı" haqqında məqalə hazırlayıb.

Məqalənin fotosunda Azərbaycanın, Makedoniyanın, Qana və Türkiyənin nazirləri yer alıb. Onların arxa fonunda ölkələrinin bayrağı əks edilən xəritələri yerləşdirilib.

Azərbaycanın mədəniyyət və turizm naziri Əbülfəs Qarayevin arxa fonundakı Azərbayacanın xəritəsində işğal altında olan Dağlıq Qarabağ göstərilməyib.

Bununla da Azərbaycanın ərazi bütövlüyünə hörmətsizlik olub.

Məsələ ilə bağlı Mədəniyyət və Turizm Nazirliyi ilə əlaqə saxlanılıb.

Nazirliyin mətbuat xidmətinin rəhbəri Vüqar Şıxəmmədov ANS PRESS-ə açıqlamasında fotonun montaj olduğunu deyib.

"Forumda nazirlərin fonunda belə bir şəkil olmayıb. Bu, sonradan fotoşopla hazırlanıb. Bununla bağlı mütləq tədbir görülməlidir", - deyə qurum rəsmisi vurğulayıb.

Xarici İşlər Nazirliyinin mətbuat xidmətinin rəhbəri Hikmət Hacıyev də məsələdən xəbərdar olduğunu və bu barədə səfirliyə məlumat verildiyini qeyd edib.

Turizmin Davosu adlandırılan Dünya Turizm Forumu 2016-cı il fevralın 4-də İstanbulda keçirilib. Forumda Azərbaycanın mədəniyyət naziri Əbülfəs Qarayev, Makedoniyanın Dövlət naziri Furkan Çako, Qananın mədəniyyət və turizm naziri Elizabet Ofosu Agyare və Türkiyənin turizm naziri Mahir Ünal iştirak edib.

Tədbirdə çıxış edən nazir Əbülfəs Qarayev Azərbaycanda turizmin qeyri-neft sektoru arasında artan payı və bu istiqamətdə dövlət tərəfindən həyata keçirilən bir sıra layihələr haqqında məlumat verib. Dövlətin turizmin inkişafı istiqamətində həyata keçirdiyi islahatlardan bəhs edən nazir, Azərbaycanda 2016-2025-ci illər üçün turizmin inkişaf strategiyasının hazırlandığını d

"Hazırda Gürcüstana gün ərzində 11 milyon kubmetr qaz daxil olur".

"Dalğa TV"nin məlumatına görə, bu barədə jurnalistlərə açıqlamasında Gürcüstanın energetika naziri Kaxa Kaladze bildirib.

"6 milyon kubmetri Qazax boru kəməri ilə SOCAR-dan, 2,9 milyon kubmetri "Şah-Dəniz" yatağından alırıq, qalan 1,2-2 milyon kubmetr isə Rusyanın Ermənistana Gürcüstan ərazisindən ötürdüyü qaz üçün tranzit haqqı kimi ödədiyi qazdır"", deyə K. Kaladze bildirib.

Nazir Gürcüstan hökumətinin Cənubi Qafqaz boru kəməri vasitəsi ilə Azərbaycandan əlavə qaz alacağına ümid etdiyini bildirib. O qeyd edib ki, rəsmi Tiflis 2011-ci ildən bəri Cənubi Qafqaz Boru Kəməri Konsorsiumuna Gürcüstana əlavə qaz verilməsinə dair dəfələrlə müraciət edib: "Lakin buna baxmayaraq, bizə yazılı şəkildə rədd cavabı verilib. Konsorsiumu inandıra bilsək, bizə qaz vermək üçün boru kəmərinin ötürmə imkanları var", deyə nazir bildirib.

Danışıqlar müsbət nəticə versə, qazın Rusiyadan alınmasına lüzum qalmayacaq. K.Kaladze qeyd edib ki, bu gün danışıqlar Rusiyadan alınacaq 300-400 milyon kubmetr qazın həcmi ətrafında gedir: "Biz nə ediriksə, ölkəmizin, onun sənayesinin inkişafı və xalqımızın rifahı üçün edirik. Buna görə də maksimum nəticə əldə etmək üçün əlimizdən gələni əsirgəməyəcəyik. Bizim öz mövqeyimiz var. Düşünürəm ki, sonda müəyyən bir razılığa gəlinəcək," deyə K Kaladze qeyd edib.

Gürcüstanın ədliyyə naziri Tea Tsulukianı ölkədə fəaliyyət göstərən KİV nümayəndələri ilə görüş keçirib.

"Dalğa TV"nin məlumatına görə, görüşdə azərbaycanlı jurnalistlər də iştirak ediblər.

Görüşdə Gürcüstanda yaşayan azərbaycanlıların sənədlərində ad və soyadlarındakı texniki səhvlər, mülkiyyət (ev, torpaq və s.), məsələləri, habelə əhalini narahat problemlər müzakirə olunub.

Nazir bildirib ki, qeyd olunan problemlər yalnız azərbaycanlıların yaşadığı bölgələrə aid deyil, Gürcüstanın bütün bölgələrinə xas olan problemlərdir. T. Tsulukiani bu problemlərin Saakaşvili hakimiyyəti dövründə həll olunmadığını deyib. O, sovet dönəmində rus dilində tərtib olunan sənədlərin gürcü dilində olan hissəsində yazılış qaydalarında yol verilən texniki səhvlərin həll olunacağını bildirib. Nazir həmçinin 2009-cu ilədək sənədlərdə gedən səhvlərin düzəlişlərinə amnistiya veriləcəyini qeyd edib.

Görüşdə soydaşlarımızın ad və soyadlarında gedən səhvlərin düzəldilməsi üçün ədliyyə evlərinə müraciət etməkləri tövsiyə edilib.

"Gürcüstan hökumətinin Rusiyanın "Qazprom" şirkəti ilə apardığı danışıqların bir çərçivəsi olmalıdır və bu çərçivədən kənara çıxmaq olmaz".

"Dalğa TV" xəbər verir ki, bu barədə Gürcüstan prezidenti Georgi Marqvelaşvili "Maestro" telekanalının efirində deyib.

"Qazprom" mövzusu yalnız iqtisadiyyat və energetika ilə məhdudlaşmır. Burada təhlükəsizlik, xarici siyasət, geosiyasət kimi məsələlər də var. Məhz buna görə, ali hakimiyyət orqanları "Qazprom"la aparılan danışıqlarda vahid bir çərçivə cızmalı və bu çərçivədən kənara çıxmamalıdır.

Qeyd edək ki, Gürcüstanın əsas qaz təchizatçısı Azərbaycandır. Bununla yanaşı, Gürcüstanda istehlak olunan qazın 12%-ni Rusiya nəql edir. Söhbət Gürcüstan üzərindən Rusiyadan Ermənistana nəql olunan qaza görə, tranzit haqqından gedir. Gürcüstan hökuməti Rusiya tərəfinin nəql etdiyi qazın həcmini artırmaq üçün "Qazprom"la danışıqlar aparır. Gürcüstan müxalifəti isə buna etiraz edir. Müxalifət bildirir ki, bu, Gürcüstanlın enerji təhlükəsizliyinə təhdiddir.