Azərbaycan Mətbuat Şurası avqustun 18-də Səbail rayonu, 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydançada keçiriləcək icazəli mitinqdə jurnalistlərin peşə vəzifələrini yerinə yetirmələrinə yaradılmış şəraitin monitorinqini aparacaqdır.
Mətbuat Şurasından bildirmişlər ki, monitorinq, eyni zamanda, kütləvi informasiya vasitələri nümayəndələrinin prosesi işıqlandırarkən üzləşə biləcəkləri mümkün maneələrin dərhal aradan qaldırılmasına da yardımçı olmağı nəzərdə tutur. Bu məqsədlə Şuranın Daxili İşlər Nazirliyi ilə birgə yaradılmış monitorinq qrupunun üzvləri, həmçinin qurumun mətbuatla dövlət qurumları arasında problemlərin həlli daimi komissiyasının təmsilçiləri aksiya yerində olacaqlar. Bundan başqa, Şuranın 441-35-96 saylı telefon nömrəsi də mitinq müddətində “qaynar xətt” rejimində fəaliyyət göstərəcəkdir.
Mətbuat Şurası peşə fəaliyyətini yerinə yetirəcək jurnalistlərin icazəli və ya icazəsizliyindən asılı olmayaraq, bütün aksiyalara üzərində “PRESS” yazılmış xüsusi gödəkçələrdə gəlməyi tövsiyə edir. Jurnalistlər prosesi işıqlandırarkən hər hansı maneə ilə üzləşdikləri halda bu barədə həm Şuranın monitorinq qrupunun üzvlərinə, həm də “qaynar xətt”inə məlumat verə bilərlər.

Azərbaycan çoxmillətli, çoxkonfessiyalı ölkədir və deyə bilərəm ki, artıq Azərbaycan dünya miqyasında tolerantlıq mərkəzi kimi tanınır. APA-nın verdiyi xəbərə görə, bunu Azərbaycan prezidenti İlham Əliyev Balakən rayonuna səfəri çərçivəsində rayon ictimaiyyətinin nümayəndələri ilə görüşündə deyib. Dövlət başçısı qeyd edib ki, Azərbaycanda müxtəlif beynəlxalq tədbirlər keçirilir və bu tədbirlər böyük dərəcədə diqqəti cəlb edir.

“Tədbirlərin keçirilməsi özlüyündə vacib bir hadisədir. Eyni zamanda, o konfranslarda, forumlarda səslənən fikirlər, hesab edirəm ki, dünyada proseslərin müsbət istiqamətdə getməsinə xidmət göstərir. Əfsuslar olsun ki, müxtəlif yerlərdə - Avropada, Orta Şərqdə, müxtəlif bölgələrdə dini və milli dözümsüzlük hökm sürür. Bu, zəmanənin mənfi əlamətidir və bu proseslər kəskinləşir. Yəni, əfsuslar olsun ki, dünyada qarşıdurmaya aparan bəzi siyasətçilərin, siyasi qrupların fəaliyyəti fəlakətlərə gətirib çıxarır. Bunu biz indi izləyirik. Bu gün biz internet dövründə yaşayırıq, hər bir məlumatı televiziya vasitəsilə əldə etmək üçün bütün imkanlar var. Əlbəttə ki, bu, bizi çox narahat edir və üzür. Çünki belə olmamalıdır”.

Gürcüstan azərbaycanlılarının yığcam yaşadıqları Kvemo Kartli-Borçalı bölgəsinin Ermənistan-Gürcüstan sərhədindəki Sadaxlı nəzarət-keçid məntəqəsində Ermənistandan Gürcüstana qeyri-qanuni yolla qızıl keçirilməsinin qarşısı alınmışdır.
Gürcüstan Gəlir Vergisi Xidmətinin məlumatına görə, Ermənistandan Gürcüstana keçmiş Rusiya vətəndaşının (soyadı açıqlanmır) əl çantasında bəyannamədə göstərilməmiş 157,45 qram qızıl məmulatı aşkar olunmuşdur. O, Gürcüstan qanunvericiliyinə əsasən 6.801 lari (1 dollar 1,65 laridir) məbləğində cərimə olunmuşdur.

Tbilisi Beynəlxalq Aeroportunda Gürcüstana qaçaqmalçılıq yolu ilə mobil telefon gətirilməsinin qarşısı alınmışdır.
İstanbul-Tbilisi aviareysinin sərnişini olan Ermənistan vətəndaşından (adı və soyadı açıqlanmır) bəyannamədə göstərilməmiş 9 mobil telefon tapılmışdır.
Gürcüstanın Vergi Məcəlləsinə əsasən, qaçaqmalçı 13.148 lari (1 dollar 1,65 laridir) məbləğində cərimə olunmuşdur.

Gürcüstanın Şida (Daxili) Kartli bölgəsinin Kareli rayonu ərazisində 3,6 bal gücündə zəlzələ baş vermişdir. Zəlzələnin episentri Kareli rayon mərkəzinin 5 kilometrliyində, Kvenaplavi kəndində qeydə alınmışdır.
Tələfat və dağıntının olmadığı bildirilir.