“Qarabağ” güclü komandadır və sabah bizi çətin oyun gözləyir. Lakin qələbə qazanıb növbəti mərhələyə vəsiqəni təmin etməyə çalışacağıq.

Dalga tv axar.az-a istinadən xəbər verir ki, bu sözləri UEFA Çempionlar Liqasının qrup mərhələsinin beşinci turu çərçivəsində Bakıda “Qarabağ”ın qonağı olan “Çelsi” klubunun baş məşqçisi Antonio Konte mətbuat konfransında deyib.

İtaliyalı mütəxəssis bildirib: “Sabahkı oyunda diqqətli olmalıyıq. Bizim üçün çox vacib görüşdür. İlk oyunda böyük hesablı qələbəmizdə bəxtimizin gətirdiyini deyə bilərəm. “Qarabağ” Avropanın ən güclü komandalarından olan “Atletiko Madrid” ilə heç-heçə etdi. “Roma” isə Bakıda çətin qələbə qazandı. Azərbaycanda futbolun səviyyəsi getdikcə yüksəlir. Sabah bizi çətin oyun gözləyir. “Qarabağ” ilə oyundan sonra bizi uzun səfər və Premyer Liqada “Liverpul” ilə qarşılaşma gözləyir. Komanda üçün həmişə düzgün qərarlar verməyə çalışıram. Komandamız ən azı iki sistemdə oynamağı bacarmalıdır. Stadiona hansı düzülüşdə çıxmağımız oynadığımız komandalara görə dəyişir. Komandada zədəli oyunçularımız var. Şadam ki, Edin Hazzard artıq zədəsini sağaldıb”.

“Çelsi” komandasının qapıçısı Tibo Kurtua isə oyunlar barədə danışaraq deyib: “Biz tam olaraq sabahkı oyuna köklənmişik. İlk matçda böyük hesabla qalib gəlsək də, sabah bizim üçün çətin olacaq. “Qarabağ” klubu “Roma” və “Atletiko”ya qarşı yaxşı oyun göstərdi. Rəqibimizə hörmətlə yanaşırıq. Oyundan üç xalla ayrılmaq istəyirik. Amma rəqibin “Atletiko” ilə oyununa nəzər yetirəndə kifayət qədər güclü olduğunu görürük. İlk olaraq, növbəti mərhələyə vəsiqəni təmin etmək üçün qələbə qazanmalıyıq. “Qarabağ”ın hücum xətti çox təhlükəlidir. Komanda əlverişli şanslardan maksimum yararlanmağa çalışacaqdır”.

Çempionlar Liqasının qrup mərhələsi çərçivəsində sabah “Qarabağ”la qarşılaşacaq “Çelsi” artıq Bakıdadır.

Dalga tv APA-ya istinadən xəbər verir ki, klubun paytaxtımıza səfəri “zadəganlar”ın tarixinə düşüb. Bu barədə məlumat klubun rəsmi saytına yerləşdirilib.

Belə ki, komandanı gətirən təyyarə Londondan bura 3975 km məsafəni 6 saata qət edib. Bununla, Bakı “Çelsi”nin avrokuboklar tarixində ən uzunmüddətli səfərinə çevrilib. Buna qədər rekord 2001-ci ildə Təl-Əvivə olan səfər idi.

İngiltərə təmsilçisinin tarixi ərzində ən uzunmüddətli 10 səfəri:

1. Bakı, Azərbaycan – 3975 km

“Qarabağ”. Çempionlar Liqası, 2017-ci il, noyabr

2. Təl-Əviv, İsrail – 3560 km

“Hapoel”. UEFA Kuboku. 2001-ci il, oktyabr

“Makkabi”, Çempionlar Liqası, 2015-ci il, noyabr

3. Nikosiya, Kipr – 3221 km

APOEL. Çempionlar Liqası, 2009-cu il, sentyabr

4. Donetsk, Ukrayna – 2724 km

“Şaxtyor”, Çempionlar Liqası, 2012-ci il, oktyabr

5. Moskva, Rusiya – 2503 km

MOİK. Çempionlar Liqası, 2004-cü il, noyabr

“Mançester Yunayted”. Çempionlar Liqasının finalı, 2008-ci il, may

“Spartak” (Moskva). Çempionlar Liqası, 2010-cu il, oktyabr

“Rubin”. Avropa Liqası, 2013-cü il, aprel

6. İstanbul, Türkiyə – 2486 km

“Qalatasaray”. Çempionlar Liqası, 1999-cu il, oktyabr; 2014-cü il, fevral

“Fənərbaxça”. Çempionlar Liqası, 2008-ci il, aprel

7. Afina, Yunanıstan – 2394 km

“Real”. Kuboklar Kuboku, 1971-ci il, may

“Olimpiakos”. Çempionlar Liqası, 2008-ci il, fevral

8. Tromse, Norveç – 2250 km

“Tromse”. Kuboklar Kukobu, 1997-ci il, oktyabr

9. Saloniki, Yunanıstan – 2139 km

“Aris”. Kuboklar Kuboku, 1970-ci il, sentyabr

10. Kiyev, Ukrayna – 2136 km

“Dinamo”. Çempionlar Liqası, 2015-ci il, oktyabr

Qeyd edək ki, Bakı Olimpiya Stadionunda keçiriləcək “Qarabağ” – “Çelsi” görüşü saat 21:00-da başlayacaq.

Futbol üzrə 17 yaşadək qızlardan ibarət Azərbaycan milli komandası noyabrın 15-dən 20-dək Tbilisidə təlim-məşq toplanışında olacaq.

Dalga tv  AFFA-ya istinadla xəbər verir ki, millimiz Gürcüstanın müvafiq yaş qrupundan ibarət yığma komandası ilə 2 yoldaşlıq oyunu keçirəcək.

Yoldaşlıq oyunlarının noyabrın 17-də və 19-da keçirilməsi nəzərdə tutulub.

Kiprin Larnaka şəhərində taekvondo üzrə gənclər arasında Avropa birinciliyinə start verilib. Azərbaycan Taekvondo Federasiyasından apasport.az saytına verilən məlumata görə, yarışın ilk günü yığmamız üçün uğurlu alınıb.

Belə ki, 45 kq çəki dərəcəsində mübarizəyə qatılan Bəhruz Quluzadə rəqiblərinə şans verməyərək, fəxri kürsünün ən yüksək pilləsinə qalxıb. O, finaladək Belçika (28:17), Böyük Britaniya (14:9), Rusiya (11:3) və Gürcüstan (10:10, qızıl xal) təmsilçilərini yarışdan kənarlaşdırıb. Həlledici döyüşdə rusiyalı Dmitri Şişkoya da qalib gələn həmyerlimiz yarışın qızıl medalını qazanıb.

Bununla da, Quluzadə Avropa birinciliyində ikinci dəfə çempionluq sevinci yaşayıb. O, 2015-ci ildə yeniyetmələr arasında Fransada təşkil edilən yarışda da fəxri kürsünün ən yüksək pilləsinə qalxmışdı.

Qeyd edək ki, sayca 21-ci olan Avropa birinciliyi noyabrın 5-də başa çatacaq. Yarışda yığmamız 18 (10 oğlan və 8 qız) taekvondoçu ilə təmsil olunur.

Səfərdə "Atletiko” ilə oyunu 1-1 hesabı ilə bitirən "Qarabağ” klubu bu gün səhər ölkəmizə qayıdıb.

Dalga tv Oxu.az -a istinadən xəbər verir ki, futbolçularımız 09:30-da Heydər Əliyev adına Hava Limanında olsalar da, onları qaşılamağa heç kim getməyib. 

Hər uğurlu səfər matçından sonra azarkeş ordusu ilə qarşılanan futbolçuları bu dəfə qarşılamağa sadəcə bir neçə xanım çıxıb.

Azərbaycanın “Qarabağ” klubu Çempionlar Liqasının qrup mərhələsində növbəti oyununu keçirib.

Dalga tv-nin Oxu.Az-a istinadən xəbərinə görə, səfərdə İspaniyanın “Atletiko” komandasının qonağı olan Ağdam təmsilçiləri inamlı təsir bağışlayıblar.

“Metropolitano” stadionunda keçirilən qarşılaşma 1:1 hesablı bərabərliklə yekunlaşıb.

Hesabı 40-cı dəqiqədə Miçel açıb.  56-cı dəqiqədə isə Tomas meydan sahiblərinin bərabərlik qolunu vurub.

Bu qrupun digəri oyununda “Roma” doğma meydanda “Çelsi”ni 3:0 hesabı ilə məğlub edib.

Dörd turdan sonra C qrupuna səkkiz xalla “Roma” başçılıq edir, “Çelsi” yeddi xalla ikinci, “Atletiko” üç xalla üçüncü, “Qarabağ” isə dörd xalla sonuncu pillədə qərarlaşıb.