Azərbaycan Respublikasının Prezidenti İlham Əliyev avqustun 17-də Zaqatala rayonuna səfəri çərçivəsində Ələddin Cavadov adına Bəhmətli kənd tam orta məktəbinin yeni binasının açılışında iştirak etmişdir.
Prezident İlham Əliyevin ölkəmizdə təhsilin inkişafına göstərdiyi diqqət və qayğı bir daha təsdiqləyir ki, bu mühüm sahə dövlət siyasətinin prioritetləri sırasındadır. Bu proses təkcə paytaxtla məhdudlaşmır, bölgələri də əhatə edir. Son illərdə ölkəmizdə heç bir dövrdə olmayan qədər məktəb binası tikilmiş, bir çox məktəb binaları üçün yeni korpuslar inşa olunmuşdur. Məktəblərin maddi-texniki bazasının gücləndirilməsi istiqamətində mühüm işlər görülmüş, bütün orta təhsil ocaqlarında kompyuter sinifləri yaradılmış, internetə qoşulmuşdur.
Heydər Əliyev Fondu da dövlət səviyyəsində həyata keçirilən bu fəaliyyət proqramına hərtərəfli dəstəyini əsirgəmir. Fondun təhsillə bağlı qarşıya qoyduğu əsas məqsəd Azərbaycanda bu sahənin ən yüksək standartlar səviyyəsində qurulmasıdır. Bu istiqamətdə Heydər Əliyev Fondunun həyata keçirdiyi “Yeniləşən Azərbaycana yeni məktəb” layihəsi xüsusi qeyd edilməlidir. Fondun bu kompleks proqramı təhsilin səviyyəsinə birbaşa təsir edən problemlərin həllinə - tədris prosesinin günün tələbləri səviyyəsində qurulmasına imkan verən müasir məktəb binalarının inşasına istiqamətlənmişdir. Heydər Əliyev Fondunun dəstəyi ilə tikilən təhsil müəssisələrindən biri də Zaqatala rayonunun Ələddin Cavadov adına Bəhmətli kənd tam orta məktəbidir.
Dövlətimizin başçısı məktəbin rəmzi açılışını bildirən lenti kəsdi.

Milli Məclisdən APA-ya verilən məlumata görə, növbəti sessiyada “Detektiv fəaliyyəti haqqında” yeni qanun layihəsinin müzakirəyə çıxarılması gözlənilir.

Layihə bir qrup hüquqşünas millət vəkillərinin təşəbbüsü ilə ABŞ və Avropa təcrübəsi milli-mənəvi dəyərlərlə uzlaşdırılaraq hazırlanır.

Layihənin hazırlanmasında məqsəd ölkə ərazisində müxtəlif səbəblərdən itkin düşənlərin, ailədaxili məsələlərlə bağlı kritik durumların araşdırılması və digər məsələlərdə özəl detektivlərin fəaliyyətindən yararlanmaqdır.

Sənədin yeni formada işlənmiş variantının hazırlanması ilə bağlı artıq müvafiq qurumların müsbət rəyi alınıb.

Qeyd edək ki, belə bir layihə ötən il də Milli Məclisə təqdim olunub. Lakin sənəddə milli-mənəvi dəyərlərə zidd məqamlar olduğu üçün geri qaytarılıb.

İnstagram Azərbaycanın yeni manatı ilə bağlı yayılan informasiyaya görə üzr istəyib.

Bu barədə “İnstagram Azərbaycan”ın rəsmi Facebook səhifəsində məlumat yer alıb: “Əziz dostlar, bir qədər əvvəl yerləşdirdiyimiz manat əskinasları sadə bir dizaynerin əl işidir. Heç də yeni 2014 dizaynı deyil. Dezinformasiyaya görə üzr istəyirik.”

Avqustun 7-dən 8-nə keçən gecə qoşunların təmas xəttində Azərbaycan Ordusunun nəzarətində olan hissəyə keçərkən əsir götürülmüş erməni hərbçi Bakıya gətirilib.

Bu barədə APA-ya açıqlamasında Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi Şahin Sayılov deyib.

Ş. Sailov əsirin hansı səbəbdən təmas xəttini keçdiyinin araşdırıldığını bildirib: “Üzərində heç bir sənəd olmayıb. Özü ad və soyadının Gevork İnciqulyan olduğunu bildirib. Lakin bəzi saytlarda onun ad və soyadını düzgün yazmırlar. Hazırda Bakıda Müdafiə Nazirliyində saxlanılır”.

Ş. Sailov Beynəlxalq Qızıl Xaç Komitəsinin əməkdaşlarının əsirlə yaxın vaxtlarda görüşəcəklərini söyləyib: “Azərbaycanda bayram günləri olduğundan Beynəlxalq Qızıl Xaç Komitəsinin Azərbaycan nümayəndəliyi işləmir. Bunun üçün də hələlik əsirlə görüşməyiblər. Yəqin ki, komitənin əməkdaşları ilə görüşdə həmin şəxsin öz ölkəsinə qaytarılması məsələsi də müzakirə olunacaq. Azərbaycan tərəfinə əsir düşmüş erməni hərbçi Ermənistana qayıtmaq istəsə, qaytarılacaq. Hər şey onun istəyindən asılı olacaq. Komitə əməkdaşları əsirlə görüşəndə onun arzusunu nəzərə alırlar”.