Tbilisidə A/H1N1 qripi (“donuz qripi") ilə 7 yoluxma halı qeydə alınıb.

APA-nın Gürcüstan bürosunun məlumatına görə, bu barədə Gürcüstanda fəaliyyət göstərən Xəstəliklərə Nəzarət və İctimai Səhiyyə Milli Mərkəzinin rəhbərinin müavini Paata İmnadze bildirib. Onun sözlərinə görə, bu fakt laboratoriyada yoxlanılıb və təsdiqini tapıb: “Regionlarda isə hələlik bu virusa yoluxma halı qeydə alınmayıb".

P. İmnadze əhalini qripə yoluxmamaq üçün təmizliyə riayət etməyə çağırıb və xəstələnən şəxslərə isə evdən çıxmamağı və sonadək müalicə almağı tövsiyə edib.

Xatırladaq ki, Gürcüstanda A/H1N1 qripinə yoluxma halı 2009-cu ildə baş verib.

ABŞ prezidentliyinə namizəd Respublikaçılar Partiyasının üzvü milyarder Donald Tramp Kaliforniyanın San Bernardino şəhərində baş vermiş terrora görə yeni təkliflə çıxış edib.

Dalga TV Türkiyə KİV-nə istinadən xəbər verir ki, ABŞ-da 2016-ci ilin noyabr ayında keçiriləcək prezident seçkiləri üçün yarışan əmlak imperatoru Donald Tramp müsəlmanların əleyhinə fikirlər səsləndirib. Donald Tramp ABŞ rəhbərliyini müsəlmanların ölkəyə girişinin qadağan edilməsi ilə bağlı qərar qəbul etməyə dəvət edib: “Nifrətin ağıl almaz ölçülərə çatdığı çox açıqdır. Bu nifrətin haradan gəldiyini və səbəbini təyin etmək məcburiyyətindəyik. Ölkəmiz cihada inanan, insan həyatına heç hörmət etməyən şəxslərə qurban edilməməlidir".

Trampın seçki kampaniyası üzrə nümayəndəsi Corey Levandovski isə namizədin təklif etdiyi qadağanın ABŞ-a immiqrant ya da turist olaraq girmək istəyən hər kəs üçün etibarlı olduğunu söyləyib.

ABŞ prezidenti Barak Obama Trampın hədsiz dərəcədə nifrət dolu dini ayrı-seçkilik şərhinə anında reaksiya verib. Ağ Evdən edilən şərhdə Trampın açıqlamasında dilə gətirdiyi yanaşmanın Amerika dəyərlərinə zidd olduğu bildirilib.

Türkiyənin Baş naziri Əhməd Davudoğlu Azərbaycanın Baş naziri Artur Rasizadəyə başsağlığı verib.

Başsağlığında deyilir: "Dekabrın 4-də meydana gələn şiddətli fırtınanın Xəzər dənizinin “Günəşli” yatağındakı 10 saylı platformada qaz xəttinin sıradan çıxmasına səbəb olaraq yanğının baş verməsinə yol açdığını və həmin gün rəsmi səfərdə olduğum qardaş Azərbaycanda baş verən yanğının insan tələfatı ilə nəticələndiyini dərin kədər hissi ilə öyrəndim.

Hökumətim adından və şəxsən öz adımdan yanğında həyatını itirənlərə Allahdan rəhmət, yaralılara şəfa, Zati-alinizə, həyatını itirənlərin ailələrinə və Azərbaycan xalqına başsağlığı diləyirəm.

Fürsətdən istifadə edərək, Zati-alinizə və dost Azərbaycan xalqına cansağlığı və xoşbəxtlik arzu edirəm".

Türkiyə hökuməti dekabrın 6-da İstanbul (Bosfor) boğazından keçən Rusiya hərbi gəmisinin göyərtəsində bir əsgərin çiynində daşınan zenit-raket kompleksi tutması faktı ilə bağlı Rusiyaya rəsmi etirazını bildirib.

APA-nın Türkiyə xəbər agentliklərinə istinadən verdiyi məlumata görə, bunu Türkiyənin xarici işlər naziri Mövlud Çavuşoğlu deyib. “Lazımi addımlar atıldı”, - deyə o, söyləyib.

Qeyd edək ki, Rusiya Hərbi Dəniz Donanmasının Qara dəniz donanmasına məxsus “Sezar Kunikov” adlı desant gəmisi dekabrın 6-da İstanbuldan keçərkən gəminin göyərtəsində bir rus əsgəri çiynində hava hədəflərini vurmaq üçün nəzərdə tutulan silah tutub. Bu silahın “Strela” və ya “İqla” daşınan zenit-raket kompleksi (PZRK) olduğu güman edilir. Əsgərin fotoları Türkiyə mediasında yayıldıqdan sonra xarici işlər naziri Mövlud Çavuşoğlu Rusiya hərbçilərinin bu hərəkətini provokasiya adlandırıb. Dənizçilik, kommunikasiya və rabitə naziri Binəli Yıldırım isə bu addımı 1936-cı ildə imzalanmış və Türkiyə boğazlarındakı hüquqi rejimi müəyyən edən Montrö Konvensiyasının pozulması kimi qiymətləndirib. Xatırladaq ki, həmin sənədə əsasən Türkiyə özünə qarşı hər hansı ölkədən hərbi təhlükə hiss edərsə, boğazları həmin ölkənin hərbi gəmiləri üçün bağlaya bilər.

Hadisədən sonra NATO-ya məxsus 3 hərbi gəmi boğazda lövbər salıb.

Gürcüstan Rusiyanı beynəlxalq öhdəlirlərini yerinə yetirməməkdə ittiham edib.

Gürcüstanın xarici işlər naziri Georgi Kvirikaşvili separatçı Abxaziya və Cənubi Osetiya ilə müqavilələr imzalayan Rusiyanı beynəlxalq qanunları pozmaqda günahlandırıb.

Ölkə.azxəbər verir ki, bu haqda Gürcüstanın XİN başçısı Belqradda keçirilən ATƏT ölkələri XİN başçıları Şurasının 22-ci iclasındakı çıxışı zamanı deyib.

Kvirikaşvilinin sözlərinə görə, Rusiya Gürcüstanın ərazisindəki qanunsuz separatçı rejimlərlə əlaqələrini genişləndirərək bununla bütün beynəlxalq hüquq normalarını və qanunları çeynəyir.

Xatırladırıq ki, Gürcüstanın ərazisi olan Abxaziya və Cənubi Osetiya faktiki olaraq Rusiya tərəfindən işğal olunmuş vəziyyətdir. Buradakı separatçı rejimlər Moskvanın nəzarəti altındadır.

Rusiya Müdafiə Nazirliyi tərəfindən İŞİD-in Türkiyəyə neft göndərməsinin sübutu kimi təqdim etdiyi görüntülərdə əks olunan yanacaq daşıyan avtomobillər İraq kürdlərinə məxsusdur.

"Dalğa TV"nin “Daily Sabah” nəşrinə istinadən verdiyi xəbərə görə, bunu İraq Kürdüstanı parlamentinin rəhbəri Şerko Cavdat deyib.

Ş. Cavdatın sözlərinə görə, sözügedən avtomobillər İraq Kürdüstanından Türkiyənin Ceyhan terminalına doğru hərəkət edir. “Bu, sirr deyil”, - deyə o vurğulayıb.

Parlament spikeri Rusiyanın təqdim etdiyi sübutların etibarlı mənbələrə əsaslanmadığını qeyd edərək, kürd peşmərgələrinin İŞİD-lə mübarizə aparan əsas qruplardan biri olduğunu və Rusiyanın neft şirkətləri İraq Kürdüstanında fəaliyyət göstərdiyini xatırladıb: “Ümid edirik, Rusiya Türkiyənin İŞİD-lə neft sövdələşməsinə dair məlumatları dəqiqləşdirməyə çalışacaq”.

Qeyd edək ki, dekabrın 2-də Rusiya Baş Qərargah rəisinin müavini Sergey Rudskoy İŞİD-in nəzarətində olan ərazilərdən Türkiyəyə neft daşındığını təsdiqləyən faktlara malik olduqlarını bildirib. Türkiyə prezidenti Rəcəb Tayyib Ərdoğan isə ittihamları rədd edərək heç kimin Türkiyəyə iftira atmağa haqqı olmadığını bəyan edib.