“Əl-Qaidə” qruplaşmasının Suriyadakı filialı olan “Əl Nüsrə Cəbhəsi” qruplaşması Rusiyanın bölgədə Bəşər Əsəd hakimiyyətini qorumaq üçün başlatdığı hava hücumu əməliyyatına görə hədələyib və rus dilində videomüraciət ünvanlayıb.  

Modern.az saytı xarici KİV-ə istinadən xəbər verir ki, videoda “Əl-Qaidə”nin 24 yaşlı səhra komandiri Əbu Übeyd əl-Madani və 24 yaşlı təlimatçısı Rafiq Əbu Mustafa çıxış edir.

Terrorçular Bəşər Əsədi “Allahın düşməni" adlandırırlar və onu müdafiə edən rus qoşunları ilə döyüşməkdən çəkinmədiklərini deyirlər: 

“Bəs, rus əsgərləri Putinin eqoizmi, kaprizləri naminə ölməyə hazırdılar? Əgər ruslar bu torpaqlara gəliblərsə, biz onlara rüsvayçılıqla qaçıdıqları Əfqanıstanı xatırladacağıq”.

Mücahidlər Suriyaya gələn rusiyalı əsgərlərin yalınz tabutda bu torpaqları tərk edəcəklərinə söz verirlər.“Sizin övladlarınız Suriyadan tabutda qayıdacaq”, - deyə 2 dəqiqəlik videoda mücahidlər vurğulayırlar.

Sentyabrın 30-dan Rusiya hərbi hava qüvvələri Suriyada vuruşan terrorçu qruplaşmaların mövqelərinə havadan zərbələr endirir.

Rusiya Müdafiə Nazirliyi son  24 saat ərzində Rus hərbi təyyarələrinin Suriya üzərindən 67 uçuş həyata keçirdiyini və 60 hədəfi vurduğunu bildirib. Modern.az xarici mətbuata istinadən bildirir ki, İŞİD-ə aid hədəflərin vurulduğunu açıqlayan nazirlik əməliyyatların SU-34M və SU-25SM təyyarələri tərəfindən reallaşdırıldığını açıqlayıb.

Rusiya Müdafiə Nazirliyinin açıqlamasında Liva əl-Hak mərkəzinə hazırlanan əməliyyatlarda  200 terrorçu ilə yanaşı İŞİD-in iki  liderinin də öldürüldüyü bildirilir. Digər tərəfdən Hələb bölgəsinə  hücumda isə daha 100 terrorçunun öldürüldüyü bəyan edilib.

Türkiyə diplomatik əlaqələrinin olmadığı və sərhədini bağlı saxladığı Ermənistana beynəlxalq bir razılaşma uyğun olaraq əsgər göndərir.

 Bu barədə məlumat Türkiyə Silahlı Qüvvələrinin Baş Qərargahının yaydığı açıqlamada qeyd olunub. Türk əsgəri Ermənistana Avropa Şərti Silahlı Qüvvələr Müqaviləsi əsasında gedəcək. Heyət Ermənistanda üç gün qalacaq. 

Baş qərargahın elanı: "Avropa Şərti Silahlı Qüvvələr Müqaviləsi çərçivəsində, Türkiyənin rəhbərliyi ilə oktyabrın 11-dən başlayaraq Ermənistanda Avropada Adi Silahlı Qüvvələr haqqında Müqavilə çərçivəsində nəzarət həyata keçiriləcək. Razılaşmaya görə, həmin nəzarət qrupunda Slovakiyadan olan əsgərlər də iştirak edəcək. Türk əsgərləri oktyabrın 14-də geri qayıdacaq".

Livan qəzeti Həccdəki faciənin səbəblərindən yazıb

Səudiyyə Ərəbistanında Həcc ziyarəti zamanı baş verən faciəyə görə məsuliyyət daşıyan şəxslərlə bağlı müzakirələr və iddialar davam edir."Dalğa TV" "Cihan" xəbər agentliyinə istinadən bildirir ki, kral Salman faciəyə səbəb olduğu deyilən 28 nəfərin edamına qərar verib. Lakin iddia edilir ki, həmin 28 nəfərin məlum hadisələrin baş verməsində günahı olmayıb.

Belə ki, Livanın"El Diyar" qəzeti xəbər verir ki, mindən çox adamın ölümünə səbəb olan izdiham kral Salmanın oğlu şahzadə Məhəmmədin həmin gün öz korteji ilə yaxınlıqdan keçməsi və bu səbəbdən yolların bağlanmasına görə baş verib. Lakin Səudiyyə hakimiyyəti bu faktı gizlətməkdə maraqlıdır və tez-tələsik 28 nəfəri edam etməklə aranın sakitləşməsinə çalışır.

O da bildirilir ki, həbs edilən 28 nəfərin başı tez bir zamanda kəsiləcək.

Qeyd edək ki, Səudiyyə Ərəbistanı məlum hadisələr zamanı 769 nəfərin öldüyünü bildirsə də, İran bu rəqəmin 4700 olduğunu bəyan edib.

Rusiyanın Suriyada 10 tankının vurulması haqda məlumatlar yayılıb.

"Dalğa TV" Türkiyə mətbuatına istinadən xəbər verir ki, bu gün səhər saatlarında Suriya müxaliflərinə qarşı başladılan hücuma Rusiya tankları da qoşulub.

Məlumatlara görə, 10 rus tankı müxaliflər tərəfindən vurulub.

Qeyd edək ki, rus tanklarının vurulduğu iddia edilən video görüntü də yayılıb.

“Rusiyanın hərbi təyyarələrinin Suriya ərazisini bombalaması Moskvanın ərəb dünyası, Qərb və Türkiyə ilə münasibətlərini bir qədər də gərginləşdirib.

Rusiya hərbi təyyarələrinin Türkiyə sərhədini pozması təsadüfi deyil. Kreml sərhəd pozuntusunu hava şəraiti ilə izah etsə də, Ankara və NATO buna inanmır. Çünki hərbi təyyarələr iki dəfə sərhədi pozub və bir neçə dəqiqə Türkiyə ərazisi üzərində hava uçuşları həyata keçiriblər”.

AzNews.az-ın modern.az-a istinadən məlumatına görə “Atlas” Araşdırmalar Mərkəzinin analizində bu barədə bildirilir.

Rusiyanın ərəb dünyası, Qərb ölkələri və Türkiyəyə göndərdiyi mesajın mahiyyətindən söz açan analitik yazıda bunun səbəbləri belə izah edilir.

Suriya ərazisini ABŞ, Fransa və Türkiyə təyyarələri bombalaya bilirsə, Rusiya da eyni işi görmək hüququna malikdir. İkincisi, Rusiya bununla Suriyada hərbi varlığını təsdiq edir.

Qeyd olunur ki, bunun fonunda Rusiya Xəzər dənizindən də Suriya ərazisini bombaladı.

“Buna Rusiyanın hərbi gəmiləri Suriyadakı məntəqələri Aralıq Dənizi sahilindən də bombalaya bilərdi. Deməli Kremlin Suriyanı Xəzər dənizi üzərindən bombalanmasının geostrateji səbəbləri var:

Birinci səbəb

Rusiya Xəzər dənizindən Suriya ərazisini raket atəşinə tutmaqla Xəzər dənizindəki hərbi hegemonluğunu ortaya qoydu. Rusiya Qərb dövlətlərinin Xəzərdəki fəaliyyətlərinin əleyhinə çıxır.

Kreml bu bombardmanla Qərb ölkələrinin və Xəzər sahili ölkələrin diqqətinə çatdırır ki, Xəzərdə Rusiyanın hərbi qüdrəti ilə hesablaşmalıdırlar. Halbuki, bugünə qədər Rusiyalı rəsmilər deyirdilər ki, Xəzər sülh dənizi olmalıdır. Deməli bu prinsipi birinci elə özləri pozdular.

İkinci səbəb

Rusiya bu bombardmanla hərbi dəniz donanmasının gücünü göstərdi. Uzun illərdir ki, Rusiyanın hərbi gəmiləri yaxın və uzaq ölkələrdə hansısa hədəfə raket zərbəsi endirməmişdi. Rusiyada yeni hərbi texnologiyalar və yeni nəsil raketlər istehsal olunub.

Xəzərdən Suriyanın bombalanması Rusiyaya imkan verdi ki, müasir hərbi dəniz donanmasını və yeni raketlərini dünyaya nümayiş etdirə bilsin.

Üçüncü səbəb

Rusiyanın Xəzər dənizindən Suriyanı bombalaması Azərbaycana da mesajdır ki, rəsmi Bakı dənizin dibi ilə Türkmənistana boru xətti tikintisi layihəsinə dəstək verməsin.

Türkmənistanla Azərbaycan arasında Xəzərin dibi ilə boru xəttinin tikintisinə ən çox lobbiçilik edənlər Türkiyə, Avropa Birliyi və ABŞ-dır.

Ancaq əgər rəsmi Bakı bu layihəyə maraq göstərməsə Transxəzər layihəsi alınmayacaq. Rusiyanın məqsədi rəsmi Bakını Xəzərin dibi ilə bağlı layihədə geri addım atmağa məcbur etməkdir”,deyə təhlildə bildirilib.

Bununla yanaşı göstərilib ki, Rusiyanın Xəzər dənizində Suriyanı raket atəşinə tutması Azərbaycanın enerji maraqlarına da təhlükə yaradır.

“Rusiya Xəzər dənizindən Suriyanı raket atəşinə tutacağını əvvəlcədən İran və İraqla razılaşdırıb. Çünki, raketlər bu iki ölkənin ərazisindən keçib Suruyadakı hədəfləri vurmalı idi.

Onsuz da həm İran, həm də İraq hakimiyyəti Rusiyanın Bəşər Əsədə hərbi dəstək verməsini alqışlayırlar. Moskva İran və İraq xaricində Xəzər sahili ölkələrə əvvəlcədən xəbər verməyib. Halbuki, sahilyanı ölkə olan Qazaxıstan Kollektiv Təhlükəsizlik Müqaviləsi Təşkilatında Rusiyanın hərbi müttəfiqidir.

Azərbaycanın Xəzər dənizində neft və qaz yataqları var. Rusiya raketlərindən hər hansı birinin Suriya ərazisi əvəzinə yanlış hədəfi vurması bölgədə mürəkkəb vəziyyət yarada bilər.

Ümumiyyətlə Suriyaya görə Türkiyə-Rusiya münasibətlərinin gərginləşməsi Azərbaycanın maraqlarına toxunur.

Rəsmi Bakı Rusiyanın Suriya siyasətinə qarışmır, bu barədə açıqlama vermir. Ankara isə əksinə Rusiyanın Suriya siyasətini kəskin tənqid edir. Türkiyə Azərbaycanın strateji müttəfiqidir, rəsmi Bakı Rusiyanı isə strateji tərəfdaş adlandırır. Bu baxımdan rəsmi Bakı çətin seçim qarşısında qala bilər”.