Əfqanıstanın şərqində Host əyalətində baş vermiş partlayış nəticəsində 18 nəfər həlak olub.

Dalga tv  xəbər verir ki, Trend-in məlumatına görə, hadisə avtomobildə quraşdırılmış partlayıcının işə düşməsi ilə baş verib.

Ramazan ayının ilk günündə törədilmiş partlayış nəticəsində ikisi uşaq olmaqla, daha 6 nəfər yaralanıb.

Sabah Türkiyənin İstanbul şəhərindəki Fatih Sultan Mehmet körpüsü Azərbaycan bayrağının rəngləri ilə işıqlanacaq.

Dalga tv Oxu.Az-a istinadən məlumatına görə, aksiya Azərbaycanın İstanbuldakı Baş Konsulluğunun təşəbbüsü, İstanbul valiliyi və Nəqliyyat, Dənizçilik və Kommunikasiya Nazirliyinin dəstəyi ilə 28 May -Respublika Günü münasibətilə təşkil olunacaq. 

Belə ki, saat 20:00-dan səhər açılana kimi körpü üçrəngli bayrağın işıqlarına boyanacaq.

Misirin cənubunda Əl-Minya əyalətində kopt-xristianların olduğu avtobusa hücum nəticəsində 23 nəfər ölüb, 25 nəfər müxtəlif dərəcəli xəsarətlər alıb.   

Dalga tv Oxu.Az-a istinadən xəbər verir ki, bu barədə Misirin Səhiyyə Nazirliyinin rəsmi nümayəndəsi Xaled Moqaxed bildirib.

Misir KİV-i ölənlərin sayının 30 nəfərə çata biləcəyinə dair məlumat yayıb. İki avtomobildə hərəkət edən yaraqlılar avtobusa atəş açıblar. 

Hücum Əl-Adavva yaşayış məntəqəsinin qərbində Müqəddəs Samuili monastırı yaxınlığında baş verib. Xristianlar Beni-Sueyfdən monastıra gəlirdilər. 

Misirin müdafiə qüvvələri avtobusa hücum olan rayonda axtarış aparırlar.

Rusiya Federal Təhlükəsizlik Xidməti (FTX) Moskvada nəqliyyatda terror aktı törətməyə hazırlaşan “İslam dövləti” terror təşkilatının dörd üzvünü saxlayıb. 

Dalga tv Oxu.Az -a istinadən xəbər verir ki, bu barədə TASS-a FTX-nın İctimaiyyətlə əlaqələr mərkəzindən bildiriblər. 

“Mayın 25-də terror qrupunun 4 üzvü saxlanılıb, onlar Rusiya və Mərkəzi Asiya vətəndaşlarıdır. Saxlanılan şəxslər əldəqayırma partlayıcı vasitələr ilə Moskvanın nəqliyyat infrastrukturlarında terror aktına hazırlaşırdılar”, - FTX-dən bildiriblər. 

Terror qrupuna rəhbərlik Suriya ərazisindən edilib. “Terrorçular diversiya-terror aktından sonra “İslam dövləti” terror təşkilatının tərkibində döyüşlərdə iştirak etmək üçün Suriyaya getməyə planlaşdırırdılar”, - FTX əlavə edib. 

“Mançesterdə terror aktını Selam Abidiyinin törətdiyi müəyyən edilib”.

Dalgatv Oxu.Az -a istinadən xəbər verir ki, bunu Böyük Britaniyanın Baş naziri Tereza Mey Mançesterdə törədilən terror aktı ilə bağlı bütün dünyaya yayımlanan mətbuat konfransında bildirib.

Baş nazir deyib ki, həmin şəxs terrorçu İŞİD qruplaşmasının üzvüdür: “Törətdiyi partlayış nəticəsində onun özü də ölüb”. 

Qeyd edək ki, Mançesterdə amerikalı müğənni Ariana Qrandenin konsertində törədilən terror aktı nəticəsində 22 nəfər ölüb, 59 tamaşaçı yaralanıb.

İngiltərənin Mançester şəhərindəki ticarət mərkəzində partlayış səsi eşidilib, insanlar binadan təxliyyə olunub.

APA-nın "Reuters"ə istinadən verdiyi məlumata görə, hadisə şəhərin mərkəzində yerləşən “Arndale” ticarət mərkəzində baş verib. Şahidlər onlarla insanın binadan qaçdığını bildiriblər. “Sky News” telekanalı polisin ticarət mərkəzində 1 nəfəri saxladığı barədə xəbər yayıb. Hüquq-mühafizə orqanlarının əməkdaşları ərazini mühasirəyə alıb, insanları tez bir zamanda ərazini tərk etməyə çağırıblar..

Qeyd edək ki, mayın 23-nə keçən gecə "Manchester Arena"da amerikalı müğənni Ariana Qrandenin konserti zamanı baş verən terror aktı nəticəsində 22 nəfər ölüb, 59 nəfər yaralanıb. Terrorçu əldəqayırma partlayıcı qurğunu işə salıb və hadisə yerində özü də ölüb. Olaya görə məsuliyyəti İŞİD terror təşkilatı öz üzərinə götürüb