Mayın 22-si axşam saatlarında “Mançester Arena”da keçirilən konsert zamanı partlayış baş verib.

Dalga tv  Report-a istinadən xəbər verir ki, bu barədə “Daily Mail” yazıb.

Hadisə şahidlərinin sözlərinə görə, partlayış səsləri amerikalı müğənni Ariana Qrande son mahnısını bitirərək səhnəni tərk etdikdən sonra eşidilib. Bu zaman işıqlar sönüb, insanlar təşviş içərisində çıxışa doğru qaçmağa başlayıblar. Hadisə yerinə polis və “təcili yardım” avtomobilləri cəlb olunub.

Stadionun yaxınlığında yerləşən “Viktoriya” dəmiryolu vağzalı bağlanıb. Terminal qatarları nə qəbul edir, nə də göndərir.

“NBC News” telekanalının məlumatına görə, stadionda partlayış zamanı ən azı 20 nəfər ölüb, 100 nəfər xəsarət alıb.

Polis digər fərziyyələr ortaya çıxana qədər hadisəni terror aktı kimi nəzərdən keçirir.

Hindistanda piyada körpüsünün uçması nəticəsində iki nəfər ölüb, 30 nəfər itkin düşüb.

Dalga tv  APA-ya istinadən xəbər verir ki, bu barədə “russian.news.cn” saytı məlumat yayıb. Məlumata görə, hadisə Cənubi Qoada baş verib.

Hazırda axtarış-xilasetmə işləri aparılır. Polisin məlumatına görə, körpünün uçması nəticəsində suya düşən insanların bir hissəsi xilas ola bilib.

Yerli sakinlərin sözlərinə görə, körpü qəzalı vəziyyətdə idi və son 4 ildə onun üzərindən hərəkət etmək qadağan olunub. Çaya düşən şəxslərdən 14 nəfər xilas edilərək xəstəxanaya yerləşdirilib.

Türkiyədə qəzaya uğrayan mikroavtobusda xəsarət alan Rusiya deyil, Ukrayna turistləridir.    

Dalga tv Oxu.Az -a istinadən xəbər verir ki, bu barədə TASS-ın müxbirinə Rusiyanın Türkiyədəki səfirliyinin mətbuat-attaşesi İrina Kasimova bildirib. 

“Muğla əyalətinin qubernatorluğundan bizə verilən məlumata görə, bu mikroavtobusda Ukrayna vətəndaşları olub. Sərnişinlər arasında rusiyalı olmayıb”, - o deyib. 

Türkiyə prezidenti Rəcəb Tayyib Ərdoğan amerikalı həmkarı Donald Trampı Türkiyəyə ailəsi ilə birgə səfərə dəvət edib.    

Dalga tv Oxu.Az-a istinadən xəbər verir ki, bu barədə türk lideri Vaşinqtonda Ağ evin rəhbəri ilə birgə mətbuat konfransında bildirib.  

“Mən prezident Trampa bu səmimi qəbul üçün təşəkkür etmək istəyirəm. Onu ailəsi ilə birgə Türkiyədə səbirsizliklə gözləyirəm”, - Ərdoğanın sözlərini TASS sitat gətirib. 

Prezidentlərin görüşü zamanı Tramp bəyan edib ki, İŞİD və PKK kimi terror təşkilatlar ilə mübarizədə Türkiyəni dəstəkləyir.

“Biz bu təhdidə birgə cavab verməyə çalışırıq”, - amerikalı lider bildirib. 

Bu gün Fransa Konstitusiya Şurasının sədri Loran Fabius Emmanuel Makronu Fransanın səkkizinci prezidenti elan edib.

Dalga tv Oxu.Az-a istinadən verdiyi məlumata görə, bundan öncə Yelisey sarayında prezident postunu tərk edən Fransua Ollandla vida mərasimi keçirilib.

E. Makron və F. Olland arasında prezident kabinetində vida görüşü 25 dəqiqə planlaşdırılsa da, 1 saatdan çox çəkib. Daha sonra isə E. Makron və F. Olland bir-birinə xoş sözlər deyib, bir-birinin əlini sıxıb. E. Makron F. Ollandı avtomobilə qədər müşayiət edib. Bu, protokola uyğun olaraq sabiq prezidentə hörmətin ifadəsidir.

İran-Türkmənistan sərhədi yaxınlığında mayın 14-nə keçən gecə baş verən güclü zəlzələ nəticəsində azı 3 nəfər ölüb, 225 nəfər xəsarət alıb.  

APA-nın “Sinxua”ya istinadən verdiyi xəbərə görə, yeraltı təkanlar nəticəsində elektrik enerjisi, su və qazın verilişində problemlər yaranıb, rabitə əlaqəsi pozulub. Hadisə yerində həkim və xilasedici briqadalar çalışırlar.    

 Qeyd edək ki, ötən axşam İran-Türkmənistan sərhədi yaxınlığında 5,8 bal gücündə zəlzələ qeydə alınıb. Yeraltı təkanlar yerli vaxtla 22.31-də (Bakı vaxtı ilə 22.01-də) qeydə alınıb.

Zəlzələnin episentri İranın Bocnurd şəhərindən 42 km şimalda, yerin səthindən 12,4 km dərinlikdə qeydə alınıb. Təkanlar nəticəsində Şimali Xorasan əyalətinin inzibati mərkəzi  olan Bocnurd şəhərində bir neçə bina uçub. Bölgənin bir neçə yaşayış məntəqəsində də evlərin uçduğu bildirilir.