dABŞ-da prezidentliyə namizəd olacaq senator Rand Paul Kürdüstan dövlətinin yaradılması üçün Türkiyədən torpaq alınacağını deyib.

Azvision.az Türkiyə mətbuatına istinadən xəbər verir ki, R.Paul kürd dövlətinin qurulmasının vacibliyini vurğulayıb: “Mən Kürdüstan üçün yeni sərhədlər çəkəcəyəm və kürdlərə yeni bir ölkə barədə söz verirəm. Amerikanın bu günə qədər onlara verdiyi dəstək azdır, İŞİD-ə qarşı kürdlər daha çox silahlandırılmalıdır. Onlar yaxşı döyüşçüdürlər”.

Kürdlər üçün göndərilən silahların əvvəlcə Bağdada getdiyini, burada onların bir qisminin oğurlandığını deyən senat silahların yalnız bir qisminin kürdlərə çatdığını deyib. O təklif edib ki, silahlar birbaşa kürdlərin özünə verilsin: “Radikal qruplaşmalarla mübarizə aparmaq üçün kürdlərə öz dövlətlərini qurmağa şərait yaratmaq lazımdır. İnanıram ki, onlara öz ölkələrinin olacağını vəd etsək, ölümü gözə alıb mübarizə apararlar. Amma bunu demək, etməkdən daha asandır. Çünki Kürdüstanı reallaşdırmaq üçün Türkiyə, İraq və Suriyadan torpaq almaq lazım gələcək”.

Gürcüstanın cəzaçəkmə müəssisələrində cəza çəkən etnik məhbuslara Gürcüstanın Barışıq və Vətəndaş Bərabərliyi Məsələləri üzrə Dövlət Nazirliyinin təşkilatçılığı ilə bu gündən ana dillərində nəşr olunan qəzetlər veriləcək.

APA-nın Gürcüstan bürosunun məlumatına görə, bu təşəbbüs Gürcüstan Cəzaçəkmə və Probasiya Məsələləri üzrə Nazirliyi ilə razılaşdırılıb. Məlumata görə, Marneulidəki Azərbaycanlıların Mədəniyyət Mərkəzinin nəşri olan "Region Press", həmçinin Azərbaycan dilli “Gürcüstan” və erməni dilli “Vrastan” (“Gürcüstan”) qəzetləri həftədə bir dəfə etnik məhbuslara çatdırılacaq.

Gürcüstanın Barışıq və Vətəndaş Bərabərliyi Məsələləri üzrə Dövlət Nazirliyinin etnik azlıq məsələləri üzrə müşaviri Zaur Darğallı APA-ya açıqlamasında məhbuslara ana dilində mətbuat nümunələrinin çatdırılmasının həbsxanalarda etnik məhbusların ölkədə baş verən hadisələr haqqında məlumatlandırılması məqsədi daşıdığını bildirib: “Məhbuslarla bağlı bir çox planımız var. Onların həbsxanalarda məşğulluğunu artırmaq və cəmiyyətə inteqrasiyası üçün müxtəlif proqramlar da düşünmüşük. Biz məhbuslar üçün Novruz bayramı proqramı və menyu da hazırlamışıq”.

Ermənistanın Gümrü rayonunda kütləvi dava və silahlı insident baş verib, 6 nəfər yaralanıb.

APA-nın “Novosti Armeniya”ya istinadən verdiyi xəbərə görə, insident nəticəsində güllələnənlərlə yanaşı bıçaqlananlar və döyülənlər də olub.

Ermənistan Baş Prokurorluğu hadisə ilə bağlı hələ ki saxlanılan olmadığını bildirib.

Hadisə yerindən isə gilizlər, taxta parçaları götürülüb. Hadisə nəticəsində ətrafdakı avtomobillər yararsız hala düşüb.

Rusiya müxalifət lideri Boris Nemtsovun qətlində ittiham edilən Zaur Dadayev məhkəmə cinayətini etiraf edib

ANS PRESS-in məlumatına görə, hakim bildirib ki, Dadayev Nemtsovu öldürdüyünü böynuna alıb: "Dadayevin təqsirliyi onun etiraf ifadələri ilə təsdiq edilir".

Həbsin müddəti aprelin 28-nə qədər təyin edilib.

Qeyd edək ki, Boris Nemtsovun qətlinə görə daha iki nəfər Boris Nemtsovun qətlinə görə daha iki nəfər - Baxayev və Əsgərxanov şübhəli bilinirlər

Xatırladaq ki, Nemtsov fevralın 28-də gecə saatlarında Moskvanın mərkəzində qətlə yetirilib. Ona dörd güllə dəyib.

Uzun müddətdir ki, İranın nüvə proqramı ilə bağlı aparılan danışıqlar dünya mediasının gündəmindən düşmək bilmirdi. Hətta danışıqların müsbət nəticələnəcəyi təqdirdə Amerika Birləşmiş Ştatları ilə İran arasında buzların əriyəcəyindən ehtiyyatlanan İsrailin baş naziri Netanyahu Konqresdə çıxış da etdi. Amma bütün baş verənlərə baxmayaraq, deyəsən danışıqlar nəticə verir. Artıq ilkin razılaşma da əldə olunub.

ANS TV-nin məlumatına görə, Tehranın nüvə proqramı ilə bağlı aparılan müzakirələrdə Amerikalı nümayəndələrlə “Arak” nüvə reaktoruna dair razılığa gəlinib. Yekun sazişin bağlanmasına mane olan bütün texniki əngəllər aradan qalxıb. İranın vitse-prezidenti və nüvə agentliyinin rəhbəri Əli Əkbər Salehinin sözlərinə görə, nüvə proqramı üzrə danışıqlarda “yalançı narahatlıqlar” çözülüb.

Əli Əkbər Salehinin sözlərinə görə, qarşı tərəflə apardığımız danışıqlarda əsas nəzər nöqtəsi uranın zəngilləşdirilməsi və “Arak” tədqiqat reaktoru olub: “Üçüncü məsələ nüvə tədqiqatlar və istehsalı və “Fordo” nüvə obyekti olub. Həmçinin xırda - əhəmiyyətsiz məsələləri də müzakirə etmişik. Zənginləşdirmə və “Arak” reaktoru məsələsinə gəlincə - bu istiqamətdə mühüm irəliləyişlərə nail olmuşuq və texniki təkliflərlə belə demək olarsa, onların “yalançı narahatlıqlar”ını və nigarançılıqlarını aradan qaldırmışıq”.

İran, ABŞ, Rusiya, Çin, Britaniya, Fransa və Almaniyadan ibarət “Altılıq qrupu” martın sonuna kimi İranın mübahisəli nüvə proqramı ilə bağlı ilkin razılaşmaya gəlməyə çalışır. Və iyunun 30-a kimi isə yekun saziş bağlamağı planlaşdırlar.

Baxmayaraq ki, ötən həftə İsrailin Baş naziri Netanyahu Konqressdəki çıxışı zamanı Amerikanı İranın nüvəylə silahlanmasına qarşı xəbərdar etmişdi. Netanyahu İranın bütün dünya üçün təhlükə olduğunu dilə gətirərək, İslam Respublikasının hər zaman ABŞ-a düşmən olacağını söyləmişdi. Netanyahunun bu çıxışı Vaşinqton və Nyu-Yorkda etirazlara səbəb olmuşdu.

Amerika Birləşmiş Ştatlarında yenidən etirazlar baş qaldırıb. Polisin 19 yaşlı gənci qətlə yetirməsi qəzəblənən əhalini küçələrə tökdü. Hələ də polisin öldürdüyü gəncin silahsız olduğunu etiraf etməsi etirazların daha geniş vüsət alacağını göstərir.

ANS TV-nin məlumatına görə, güllə yarası ilə xəstəxanaya çatdırılan həmin şəxs çox keçmədən dünyasını dəyişib. İddiaya görə, ölən şəxs özünü bilərəkdən maşınların altına atdığına görə, ondan şikayət daxil olub və mənzilinə polis göndərilib. Yerli sakinlər və fəallar hadisə yeri yaxınlığında və polis idarəsi qarşısında etiraz aksiyası keçirib.

“Mən bir qaradərili olaraq çox qəzəbliyəm, əsəbiyəm. Həmişə demişik ki, bizə qarşı irqi ayrıseçkilik və ədalətsizlik hələ də var. Bir azdan bizim şəhərdə də Ferqüson hadisələri təkrarlana bilər. Bizdəki vəziyyət Ferqüsondakından qat-qat pisdir. Bu problem bütün ölkədə var və həll edilməlidir”, – deyə etirazçı Culiya Kolt bildirib.

Qətlə yetirilən gəncin anası Andrea İrvin də onun günahsız olduğunu düşünür: “Mənim oğlum heç vaxt zorakılıq törədən şəxs olmayıb. Və onun bu cür zorakılıqla öldürülməsi məni mənəvi olaraq məhv edir”.

Yerli polis rəisi Mayk Kovala görə, polis zabiti çağırış üzrə mənzildə baxış keçirən zaman gənc polisin üzərinə hücum edib və tərəflər arasında qarşıdurma yaranıb.

Medison polis rəisi Mayk Koval etiraf edir ki, o, silahsız idi və bu fakt müstəntiqlərin işini bir az da çətinləşdirir: “İctimaiyyət təmkinli olmalıdır və səbrlə nəticəni gözləməlidir. Ola bilər ki, hadisə yerində başqa şəxslər də olub və polis güc tətbiq etməli olub”.

Koval zabitin özünü müdafiə məqsədilə atəş açdığını desə də, bu etirazçıları sakitləşdirməyib. Etirazçılar car çəkərək, polisə etibar etmədiklərini bildirib.

Etirazçılar əllərində “nə ədalət var, nə də ki, sülh” yazılı plakat tutub. Narazı kütlədən “Qaradərili vətəndaşın da həyatı qiymətlidir” şüarı səslənib. Fəallardan biri xəbərdar edib ki, bu irqçilik məsələsinin qarşısı alınmasa, Ferqüsyon hadisələri təkrarlana bilər.