Moskva bircasında rubl kəskin ucuzlaşıb.

ANS PRESS-in məlumatına görə, 1 dolların qiyməti 72,7 rubla qalxıb. Nəticədə, Moskva valyuta dəyişmə məntəqələri öz işini dayandırıb.

Bu, Rusiya Maliyyə Nazirliyini hərəkətə keçməyə məcbur edib. Nazirlik öz valyuta ehtiyatını bazara çıxardığını bəyan edib. Rusiya Federal Xəzinədarlığının hesabındakı valyuta qalığının $7 mlrd. olduğu bildirilib. Maliyyə nazirinin müavini Aleksey Moiseyev bazara lazım olan qədər valyuta çıxaracaqlarını bildirib. Bundan sonra rublun qiyməti xeyli qalxıb və 1 dollar 62,268 rubla düşüb. Amma sonra proses sonradan tərsinə gedib və Moskva vaxtı ilə saat 11:40-da 1 dollar 66,1 rubla qalxıb.

Dünən Maliyyə Nazirliyi iri Rusiya banklarına $3 mlrd. yerləşdirib.

ABŞ prezidenti Barak Obama Konqres tərəfindən qəbul edilmiş Rusiyaya qarşı yeni sanksiyalar haqqında və Ukraynaya dəstək haqqında qanun layihələrini bu həftənin sonunadək imzalayacaq.

ANS PRESS-in məlumatına görə, Ağ evin mətbuat katibi Con Ernest bildirib ki, B.Obama əvvəlki kimi, qanun layihələri haqqında müəyyən narahatlıq keçirir, amma hesab edir ki, bu ona manevr üçün yeni imkanlar açacaq.

Yeni layihə Rusiyanın müdafiə sənayesinə sanksiyaları nəzərdə tutur. Bu barədə ötən şənbə günü Konqresdə əksəriyyət tərəfindən qəbul edilib.

Bildirilir ki, əgər amerika lideri respublikaçılar və demokratlar arasında nadir həmrəyliyi göstərən qanun layihələrini imzalayarsa, "Rosoboroneksport" və Rusiyanın digər müdafiə müəssisələri ağır sanksiyalar gözləyir. Həmçinin sanksiyalarla üzləşəcək fərdi şəxslərin siyahısı da genişləndiriləcək.

Digər qanun layihəsi prezident Barak Obamaya Ukraynaya hərbi kömək göstərməyə icazə verir.

Tanınmış Fransa yazıçısı Mişel Houellebek deyib ki, yeni romanı Fransanın müsəlman prezidenti tərəfindən idarə edilməsindən bəhs edir.

Onun bu sözləri qalmaqal yaradıb.

Romanda hadisələr 2022-ci ildə baş verir. Xəyali “Fransa Müsəlman Qardaşlığı Partiyası”nın sədri Mohammed Ben Abbes prezident seçilir.

Bundan sonra ölkə qarışır. “Soumission” (İtaət) gələn il yanvarın 7-də çap ediləcək.

Hətta əsərin adı da birmənalı qəbul edilmir. “İslam” ərəbcə həm də Allahın iradəsinə itaət etmək deməkdir.

Təhkiyəçi 44 yaşlı anti-qəhrəmandır. Ədəbiyyat professorudur. Onu fahişələr və övladı yaşda qızlar cəlb edir.

Romanda indiki sosialist prezident François Hollande reytinqinin yerlərdə sürünməsinə baxmayaraq 2022-ci ilə qədər hakimiyyətdə qalır.

Yazıçı bundan əvvəl “Elementar hissəciklər” romanı ilə də qalmaqal yaratmışdı. Orada deyilirdi ki, “1968-ci ilin tələbə hərəkatındakı hippilər 1990-cı illərin serial qatillərinə çevrildilər”.

2001-ci ildəki bir müsahibəsində Houellebecq İslamı dinlərin ən pisi adlandırmışdı.

Bundan sonra Fransanın müsəlman birlikləri yazıçını dini ayrı-seçkilikdə ittiham edib hüquq-mühafizə orqanlarına müraciət etmişdilər. Məhkəmə iddianı rədd etmişdi.

Houellebecq-in son romanı olan “Xəritə və ərazi” Fransanın ən yüksək ədəbiyyat mükafatı olan “Goncourt”a layiq görülüb.

Houllebecq əsərləri xarici dillərə ən çox tərcümə edilən çağdaş fransız yazarıdır.

“İtaət” 56 yaşlı yazıçının 6-cı romanı olacaq.

Çərşənbə axşamı isə Fransanın mədəniyyət naziri Fleur Pellerin yerli radioya deyib ki, romanı mütləq oxuyacaq. Onun sözlərinə görə, Houellebecq həmişə “provokativ romançı” olub və onun “qəribə yumor hissi var”.

Bu gün Kvemo-Kartli (Şərqi Gürcüstan) bölgəsində daha 23 məscid Gürcüstan Müsəlmanları İdarəsinin mülkiyyətinə keçirilib.

ANS PRESS-in məlumatına görə, bu barədə Gürcüstanın dini işlər üzrə Dövlət Komitəsinin rəhbəri Zaza Vaşakmadze xəbər verib.

Qərar dini qurumların mülki və maliyyə məsələlərinin araşdırılması yönündə keçirilən iclas zamanı verilib. 2 iclasın nəticələrinə görə isə cəmi 44 məscid dövlət balansından Gürcüstan Müsəlmanları İdarəsinin balansına keçirilib.

Gürcüstan Müsəlmanları İdarəsinin başçısı azərbaycanlı Şeyx Ramin İgidovun sözlərinə görə, ölkədə 300-dən çox məscid və ibadətgah var.

“Bu məscidlərdən bir çoxunun taleyi məlum deyildi. Belə ki, bizim əlimizdə hüquqi sənəd yox idi. Buna görə də biz dini işlər üzrə Agentliyə məscidlərin statusunun müsəlman idarəsinə verilməsi xahişi ilə müraciət etdik. Məsələ bizim xeyrimizə həll olundu”, - deyə Ramin İgidov bildirib.

Qeyd edək ki, Kvemo-Kartli Gürcüstanda azərbaycanlıların sıx yaşadığı bölgədir.

ABŞ Senatı 585 milyard dollarlıq hərbi xərcləri yekdilliklə qəbul edib.

AzNews.az-ın məlumatına görə, hərbi büdcəyə dair qanun layihəsi imzalanmaq üçün prezident Barak Obamaya göndərilib.

Sənədin qəbul edilməsi ilə ABŞ hərbi qüvvələrinin 2015-ci il oktyabrın 1-dən başlayacaq maliyyə ilində müdafiə xərcləri üçün ayrılmış maliyyə fondlarından istifadə etməsinə icazə verilir.

Buraya ABŞ prezidentinin İraq və Suriyada İŞİD-ə qarşı hərbi əməliyyatlar aparılması üçün müraciət etdiyi təcili maliyyə fondları da daxildir. Büdcədə Suriyada mötədil üsyançılar və İraqda kürd hərbi qüvvələrinə iki il müddətinə təlim verilməsi üçün maliyyə fondlarının ayrılması nəzərdə tutulur.

Müdafiə xərclərinə dair qanun layihəsi ABŞ-ın hərbi əməliyyatları, habelə hərbçilərin maaşlarının bir faiz artırlıması, hərbi gəmilər, təyyarələr və döyüş texnikasının alınması üçün nəzərdə tutulan maliyyə xərclərini əhatə edir.

Prezident Obamanın etirazına baxmayaraq, büdcə haqda qanunla ABŞ-ın Kubada Quantanamo hərbi həbsxanasının bağlanması üçün qoyulmuş məhdudiyyətlər və Quantanamo məhbuslarının Birləşmiş Ştatlara gətirilməsinə qadağa saxlanır.

“Dünya gözəli -2014” yarışmasının final mərhələsi Londonda keçiriləcək. ANS PRESS-in məlumatına görə, dünya gözəli adı uğrunda bu il 125 iştirakçı mübarizə aparacaq.

Yarışmada iştirak edən qızlar artıq 20 noyabrdan Londondadırlar. Gözəllər burada müxtəlif xeyriyyə tədbirlərinə qatılıblar. Bununla yanaşı onlar podiuma çıxıblar, həmçinin bir- birləri ilə idman və intellek üzrə müsabiqələrdə yarışıblar.

Bu ərəfədə, “Top Model” yarışmasının qalibləri artıq açıqlanıb. Dəniz modası, multimediya, istedad müsabiqəsi, fitness və idman üzrə yarışlarda onlar mübarizə aparıblar.

İlk beşliyə daxil olanlar Çin, Cənubi Sudan, Bosniya - Hersoqovina, Macarıstan və Avstraliyadan olan təmsilçilər qərarlaşıb. Beşliyə dəniz modası mükafatı üzrə Meksika, Keniya, İsveç, Cənubi Afrika və Hindistandan olan təmsilçilər daxil olub.

Multimediya müsabiqəsi üzrə Niderland, Qayana , Hindistan, ABŞ və İngiltərə təmsilçiləri qərarlaşıb.

Xüsusi bacarıq və istedadları ilə mübarizə aparan qızlar isə Malaziya, Şotlandiya, Russiya, İsveç və ABŞ təmsilçiləri olub.

İdman üzrə müsabiqədə isə Filippin, Macarıstan, Serbiya, Uelsdən olan təmsilçilər yer qazanıblar.

Qeyd edək ki, "Dünya Gözəli 2014" yarışmasının final mərhələsində qalib olan xanıma hazırki filippinli dünya gözəli Meqan Yanq öz tacını təqdim edəcək.