Qazaxıstanın paytaxtı Astana şəhərində iyunun 10-dan sentyabrın 10-dək keçiriləcək “EXPO-2017: Gələcəyin enerjisi” beynəlxalq sərgisinə hazırlıq prosesi energetika naziri Natiq Əliyevin rəhbərliyi və Azərbaycan Milli Pavilyonunun tərtibat və quraşdırma işlərinə məsul olan "Adunic AG" şirkətinin nümayəndəsi Gökhan Yılmazın iştirakı ilə müzakirə edilib.

Energetika Nazirliyindən “APA-Economics”ə verilən məlumata görə, toplantıda energetika naziri N. Əliyev Azərbaycanın sərgidə layiqincə təmsil olunması üçün SOCAR, “Azərenerji” ASC, “Azərişıq” ASC, Alternativ və Bərpa Olunan Enerji Mənbələri üzrə Dövlət Agentliyi, Azərbaycan Milli Elmlər Akademiyası, Mədəniyyət və Turizm Nazirliyi və ölkəmizin Qazaxıstandakı səfirliyi ilə koordinasiyalı şəkildə fəaliyyət göstərildiyini diqqətə çatdırıb. 25 yanvar 2017-ci il tarixində 403,3 kvadratmetrlik əraziyə malik Azərbaycan Milli Pavilyonunun təhvil alındığını, 9 iyul tarixinə isə “Milli Gün”ün nəzərdə tutulduğunu qeyd edib. Hazırlıq işlərinin vaxtında başa çatdırılmasının vacibliyini vurğulayıb.

“Adunic AG” şirkətinin nümayəndəsi isə Azərbaycan Milli Pavilyonunun məzmun və tərtibatı ilə bağlı təqdimat edib. Bildirib ki, Azərbaycanın tarixi-mədəni irsini, zəngin enerji potensialını və gələcəyin enerji mənzərəsini tərənnüm edən pavilyon “Odlar Yurdu - keçmişdən gələcəyə daşınan enerji” devizinə əsaslanıb. Sərgidəki milli pavilyonda Azərbaycanın tarixi-mədəni özəllikləri, müasir həyatı və enerji potensialı  xüsusi texnologiyaların köməyi ilə çatdırılacaq. Müasir metodlar izləyicilərin həm məlumatlandırılmasına, həm də əyləndirilməsinə şərait yaradacaq. Üç hissədən ibarət pavilyonun birinci hissəsində Azərbaycanın zəngin tarixi ənənələri, məşhur od məbədi, Qobustan qayaüstü təsvirləri, köhnə və yeni Bakının memarlıq inciləri və s. təqdim ediləcək.

İkinci hissədə Azərbaycanın ənənəvi enerjidən alternativ enerjiyə qədər keçdiyi inkişaf prosesi, neft, neft məhsulları, qaz, elektrik enerjisi, külək, günəş enerjisi, palçıq vulkanları ilə bağlı təqdimatlar olacaq. Üçüncü hissədə izləyicilər üçün Bakıda maraqlı virtual gəzinti nəzərdə tutulub. Burada  məqsəd  Azərbaycanın turizm imkanlarının tanıtmı və ölkəmizə turistlərin cəlbinə nail olmaqdır. Bütün bu tərtibat  və quraşdırma işlərinin mayın 12-dək  yekunlaşdırılması, pavilyonun fasadının isə mayın sonuna hazır olması planlaşdırılır.

Təqdimatın yekununda nazir sərginin məzmunu ilə bağlı əlavə təkliflər irəli sürərək, enerjidən istifadə sahəsində nailiyyətlər və perspektivlər, o cümlədən ekoloji təmizlik, enerji resurslarından istifadə zamanı ətraf mühitin mümkün qədər qorunması, enerji və yeni texnologiyaların qarşılıqlı əlaqəsi kimi mövzuların əks olunmasını tövsiyə edib.

Xatırladaq ki, Azərbaycanın "Astana EXPO-2017" Beynəlxalq Sərgisində iştirakı ilə bağlı müqavilə 4 dekabr 2015-ci il tarixində imzalanıb. Prezident İlham Əliyevin müvafiq göstərişi ilə energetika naziri Natiq Əliyev ölkəmizi “EXPO 2017” sərgisində təmsil edəcək milli komissar təyin edilib. “EXPO 2017” sərgisinin, əsasən, dünyanın iqtisadi baxımdan nəhəng ölkələrindən (ABŞ, Fransa, Almaniya, Yaponiya, Braziliya, Kanada, İngiltərə, İspaniya və Çin kimi) sonra Qazaxıstanda təşkili enerji sahəsi üzrə əməkdaşlığın daha da inkişaf etdirilməsinə, həmçinin iştirakçı ölkələrdə tətbiq olunan yeni texnologiyaların mübadiləsinə təminat verəcək.

31 mart - 1 aprel tarixlərində hava şəraitinin kəskin pisləşəcəyi, açıq dənizdə arabir 35-38 m/s-dək küləyin olması gözlənilir.

SOCAR-dan “APA-Economics”ə verilən məlumata görə, fırtına ilə bağlı təhlükəsizlik tədbirlərinin gücləndirilməsi məqsədilə, “Azneft” İstehsalat Birliyinin bütün işçilərinə təlimatlar verilib. "Qəza və fəsadların baş verməməsi üçün növbədə olan zəruri işçilərdən başqa, bütün həmkarlarımız estakada və neft-qaz yığım məntəqələrindən təxliyə edilib. Birliyin struktur təşkilatlarında həmin günlərdə növbətçilik təşkil olunub", - deyə məlumatda vurğulanıb.

Bundan əlavə, dəniz neft-qazçıxarma obyektlərində işçilərin gediş-gəlişi məhdudlaşdırılıb, qaldırıcı qurğular təhlükəsiz vəziyyətə gətirilərək, işləri dayandırılıb, kəskin hava şəraitində təhlükə yarada bilən işlərin görülməsi qadağan edilib.

"Petkim Petrokimya Holding A.Ş."-nin ("Petkim") TOP-menecerlərinə ödənilən aylıq məvacibin məbləği açıqlanıb.

"APA-Economics" şirkətin yaydığı hesabata istinadən xəbər verir ki, bu ilin martın 29-da "Petkim"in İdarə Heyətinin iclasında İdarə Heyəti üzvlərinin hər birinə ayda 27500 lirə (Azərbaycan Mərkəzi Bankının bugünkü rəsmi məzənnəsinə əsasən 12 947 manat - red.) məbləğində məvacibin ödənilməsi səs çoxluğu ilə qəbul edilib.

Qeyd edək ki, "Petkim"in İdarə Heyətinin 9 üzvü var. İdarə Heyətinin sədri Vaqif Əliyevdir (SOCAR-ın Sərmayələr İdarəsinin rəisi). Onun müavini isə SOCAR-ın vitse-prezidenti David Məmmədovdur. İdarə Heyətinin digər üzvləri isə bunlardır: "Mehmet Bostan, Fərrux Qasımov, Ertuğrul Altın, İlhami Özşahin, Süleyman Qasımov (SOCAR-ın vitse-prezidenti), Tevfik Bilgin, Mehmet Ceylan.

Beləliklə, İdarə Heyətinin üzvlərinə ümumilikdə ay ərzində 247500 lirə (116 min 968 manat), il ərzində isə 2 mln. 970 min lirə (1 mln. 403 min 622 manat) ödənilir.

Xatırladaq ki, 2008-ci ildə SOCAR Türkiyə hökuməti tərəfindən özəlləşdirilən və qardaş ölkənin yeganə neft-kimya istehsalçısı olan "Petkim"də nəzarət-səhm paketinə malik olmaq üçün "SOCAR Türkiyə Enerji A.Ş." vasitəsilə strateji investisiya yatırıb. Bu alış ilə SOCAR daha sonra müxtəlif müəssisələrə kapital qoyuluşu həyata keçirib və emal fəaliyyətinin əhatə dairəsini və miqyasını artırıb. 2010-cu ildə "SOCAR Türkiyə Enerji A.Ş." "Petkim" obyektlərinə yaxın ərazidə yeni emal zavodunun tikintisi üçün Türkiyə hökumətindən icazə alıb və tikintisi üçün hazırlıq işləri 2011-ci ilin oktyabrında başlayıb. 2018-ci ildə zavodun fəaliyyətə başlaması gözlənilir. Hesablamalara uyğun olaraq, bu zavod "Petkim"in gəlirliliyini və bazar payını artıraraq onun üçün xammal xərclərini azaldacaq.

SOCAR-ın Türkiyədəki ən iri aktivlərindən biri olan "Petkim Petrokimya Holding A.Ş." ("Petkim") şirkətinin 2016-cı ildə əldə etdiyi mənfəət üzrə dividendlərin ödənilməsi tarixi məlum olub.

“APA-Economics” şirkətin yaydığı məlumata istinadən xəbər verir ki, bu ilin martın 29-da “Petkim”in İdarə Heyətinin iclasında qəbul edilmiş qərara görə bu ilin aprelin 14-dən dividendlərin ödənilməsinə başlanacaq.

Qeyd edək ki, Petkim ötən il əldə etdiyi mənfəətə görə səhmdarlarına 600 mln. lirə və 282 mln. 480 min manatlıq dividend ödəyəcək.  

Xatırladaq ki, 2008-ci ildə SOCAR Türkiyə hökuməti tərəfindən özəlləşdirilən və qardaş ölkənin yeganə neft-kimya istehsalçısı olan "Petkim"də nəzarət-səhm paketinə malik olmaq üçün "SOCAR Türkiyə Enerji A.Ş." vasitəsilə strateji investisiya yatırıb. Bu alış ilə SOCAR daha sonra müxtəlif müəssisələrə kapital qoyuluşu həyata keçirib və emal fəaliyyətinin əhatə dairəsini və miqyasını artırıb. 2010-cu ildə "SOCAR Türkiyə Enerji A.Ş." "Petkim" obyektlərinə yaxın ərazidə yeni emal zavodunun tikintisi üçün Türkiyə hökumətindən icazə alıb və tikintisi üçün hazırlıq işləri 2011-ci ilin oktyabrında başlayıb. 2018-ci ildə zavodun fəaliyyətə başlaması gözlənilir. Hesablamalara uyğun olaraq, bu zavod "Petkim"in gəlirliliyini və bazar payını artıraraq onun üçün xammal xərclərini azaldacaq.

SOCAR-ın Türkiyədəki ən iri aktivlərindən biri olan "Petkim Petrokimya Holding A.Ş." ("Petkim") şirkəti 2017-ci ildə audit hesabatlarının hazırlanması ilə məşğul olacaq şirkəti müəyyənləşdirib.

“APA-Economics” şirkətin yaydığı məlumata istinadən xəbər verir ki, PricewaterhouseCoopers Global (PwC) şirkəti Petkimin 2017-ci il üzrə maliyyə göstəricilərinin auditini aparacaq.

Qeyd edək ki, bu ilin martın 29-da “Petkim”in İdarə Heyətinin iclasında PwC-nin auditor seçilməsi məsələsini təsdiqləyib.

“Neft Daşları” yatağında 8 istismar quyusunun qazılması üçün nəzərdə tutulan yeni 620A saylı stasionar dəniz platforması istismara verilib.

SOCAR-dan “APA-Economics”ə verilən məlumata görə, SOCAR-ın “Neftqaztikinti” Tresti tərəfindən “Azneft” İstehsalat Birliyinin sifarişi ilə ''Neftqazelmitədqiqatlayihə'' İnstitutunun layihəsi əsasında tikilmiş platformanın ümumi sahəsi 2 520 kvadrat metrdir. Dənizin 27 metr dərinliyində yerləşən, istehsalat və yaşayış sahələrindən ibarət platformada tikinti-quraşdırma işləri beynəlxalq standartlar səviyyəsində həyata keçirilib.

6 aralıq seksiyası, 1 vertolyot, eləcə də 10 minik və yanalma meydançası tikilib, svay və quyu şaxtaları vurulub, müvafiq boru xətləri çəkilib, obyektdə qülləaltı postament və digər bütün zəruri avadanlıqlar quraşdırılıb. Platforma 7 dayaq bloku üzərində yığılıb, ətraf mühitin və əməyin mühafizəsi bütün müasir norma və tələblərə uyğun şəkildə təmin edilib.

Platformada qazılacaq quyuların hər birindən sutkada 10 ton neft və 1000 kubmetr qaz hasil ediləcəyi proqnozlaşdırılır.