Gürcüstanda fəaliyyət göstərən şirkətlərin biznes reytinqi üzrə 16-cı ənənəvi mükafatlandırılma mərasimi keçirilib.

SOCAR-dan verilən məlumata görə, Tbilisi meriyasının, Gürcüstanın iqtisadiyyat, maliyyə, energetika nazirliklərinin və digər hökumət təşkilatlarının dəstəyi, "Georgian Times" media holdinqinin və "Gorbi" ictimai rəy və marketinq tədqiqatları şirkətinin təşkilatçılığı ilə baş tutan tədbirin əsas sponsorlarından biri "SOCAR Energy Georgia" şirkəti olub.

Mərasimdə hökumət və işgüzar dairələrin nümayəndələri, yerli və xarici jurnalistlər iştirak ediblər. "SOCAR Energy Georgia" eyni zamanda qaliblər sırasında - reytinq cədvəlinin ilk onluğunda yer alıb. Şirkət ən böyük vergi ödəyicisi, ən böyük işverən, yüksək keyfiyyət standartı, effektiv menecment nominasiyalarında qalib gəlib.

Gürcüstanda fəaliyyət göstərən şirkətlər arasında ilk biznes reytinqi 1995-ci ildə tərtib olunub. Layihənin məqsədi milli biznesin ən uğurlu istiqamətlərini müəyyənləşdirilməsi, biznes, hökumət və ictimaiyyət arasında dialoqun dəstəklənməsi, Gürcüstan biznesinin yeni imicinin formalaşdırılması, perspektiv şirkətlərin üzə çıxarılması, beynəlxalq biznesin diqqətinin Gürcüstana cəlb olunmasıdır. Layihəyə əsasən, Gürcüstan Maliyyə Nazirliyinin gəlirlər xidməti ölkə büdcəsinə 1 mlrd. lari və daha çox vəsait köçürən şirkətlərin siyahısını "Georgian Times" və "Gorbi"yə təqdim edir.

Ekspertlər, iqtisadi mövzularda yazan jurnalistlər, qeyri-hökumət təşkilatları, fondlar, sosial tədqiqat xidmətləri 60 ən uğurlu şirkəti müəyyənləşdirir, onların arasından seçilən 30 şirkətdən biri qalib elan olunur və qran-pri ilə mükafatlandırılır. Digər şirkətlər müxtəlif nominasiyalarda diplomlarla təltif olunurlar. Nüfuzlu münsiflər heyəti şirkətləri istehsalçıların maraqlarının müdafiəsi, ictimai imic, effektiv menecment və marketinq, peşəkar komanda, investisiya cəlbediciliyi, xeyriyyəçilik, yeni texnologiyaların tətbiqi, yeni iş yerlərinin açılması, sabitlik, artım və digər meyarlar üzrə qiymətləndirir.

SOCAR prezidenti Rövnəq Abdullayev İranda səfərdə olub.

SOCAR-dan APA-ya verilən məlumata görə, R. Abdulalyevin başçılıq etdiyi nümayəndə heyəti bu ölkənin neft müqavilələri ilə əlaqədar Tehranda keçirilmiş konfransda iştirak edib.

Tədbirdə İranın neft naziri Bijən Namdar Zəngəne, İran Prezidentinin hüquqi məsələlər üzrə müavini xanım Elham Əminzadə, neft nazirinin müavini, Milli Neft Şirkətinin (NİOC) prezidenti Röknəddin Cavadi açılış nitqləri ilə çıxış ediblər.

Daha sonra konfransda İranın neft-qaz yataqlarının işlənilməsi proqramlarının həyata keçirilməsi və hasilatın artırılması, neft-qaz sənayesində investisiya imkanları məsələləri ətrafında çıxışlar dinlənilib, təqdimatlar olub. İran neft sənayesinin mövcud vəziyyətini, imkanlarını və potensialını əhatə edən 50-dən artıq yeni neft-qaz layihəsinin təqdimatı keçirilib.

SOCAR prezidenti İrana səfəri çərçivəsində həmçinin bu ölkənin neft naziri Bijən Namdar Zəngəne və neft nazirinin müavini, Milli Neft Şirkətinin (NİOC) prezidenti Röknəddin Cavadi ilə görüşlər keçirib. Görüşlərdə Azərbaycanla əlaqələrin genişləndirilməsinin əhəmiyyəti vurğulanıb.

R. Abdullayev şirkətin Azərbaycan və xarici ölkələrdə həyata keçirdiyi layihələr, o cümlədən, “Şahdəniz” layihəsinin işlənməsinin ikinci mərhələsi üzrə aparılan işlər barədə məlumat verib. Görüşlərdə İranda həyata keçirilməsi planlaşdırılan potensial layihələr haqqında fikirlər səsləndirilib, müzakirələr aparılıb.

Layihələrin həyata keçirilməsi üçün müvafiq hüquqi və kommersiya şərtlərinin vacibliyi, sərmayələrin qorunmasının, münbit investisiya mühitinin təmin olması və s. məsələlər ətrafında fikir mübadiləsi olub.

SOCAR və NİOC arasında bir sıra istiqamətlər üzrə, o cümlədən, əlverişli coğrafi mövqeyi nəzərə almaqla neft-qaz həcmlərinin svap əməliyyatları, neft-qaz treydinqi məsələləri, hər iki ölkədə və üçüncü ölkələrdə kəşfiyyat və hasilat layihələri, neft-kimya layihələri və s. sahələr üzrə mümkün əməkdaşlıq istiqamətləri geniş müzakirə edilib.

SOCAR prezidenti Rövnəq Abdullayev İrana səfəri çərçivəsində konfransda iştirak edən Malaziyanın “Petronas” şirkətinin prezidenti Datuk van Zulkiflee van Ariffin ilə də görüşüb. Görüşdə “Petronas” şirkətinin iştirakçı olduğu “Şahdəniz” layihəsi çərçivəsində görülən işlər və qarşılıqlı maraq doğuran digər məsələlər müzakirə olunub.

Baş nazir İrakli Garibaşvilinin dediyinə görə 2016-cı nilin iyun ayından pensiya 20 lari artacaq.

Bu gün hökümətin növbəti iclasında baş nazir qeyd etdi ki, gələn ilin budcəsi sosial istiqamətli olacaq və pensiyaların, eləcə də müəllimlərin maaşının artırılmasına yönəldilmiş olacaq.

"Qərar verdik ki, 2016-cı ilin iyun ayından pensiya 180 lari olsun. Hər kəsə xatırlatmaq istəyirəm ki, 2012-ci ildən biz təxminən 64%-lə pensiyaları artırdıq. Bu 600 milyon lariyədək artım deməkdir. 2012-ci ilədək pensiya 110-125 lari idi", - bildirdi İrakli Ğaribaşvili.

Baş nazirin bildirdiyinə əsasən hökumət fəal şəkildə pensiya islahatı üzərində işləyir ki toplam pensiya sisteminin təməli qoyulsun.

Dekabrın 1-dən etibarən Rusiya Türkiyədən ət məhsullarının idxalını dayandıracaq.

"Dalğa TV" Türkiyə mətbuatına istinadən xəbər verir ki, qərar Rusiya təyyarəsinin vurulmasından sonra verilib.

Ət məhsulları Türkiyənin Rusiyaya ixrac etdiyi ərzaqlar arasında böyük paya malikdir. Belə ki, təkcə ötən il Rusiyaya 16 milyon dollarlıq toyuq əti ixrac edilib. Bu rəqəmin, 2015-ci ilin sonunda 23,5 milyon dolları olacağı gözlənilirdi. Amma Rusiya təyyarəsinin Türkiyə tərəfindən vurulması vəziyyəti dəyişib.

Qeyd edək ki, noyabrın 24-də Rusiyanın hərbi təyyarəsi Türkiyənin hava məkanına daxil olub. Türkiyə tərəfi isə həmin təyyarəni vurub. Bu isə iki ölkə arasında vəziyyəti gərginləşdirib. Rusiya sərhədə hərbi gəmi yerləşdirib və Türkiyədəki səfirini geri çağıra biləcəyini qeyd edib.

Bu ilin yanvar-oktyabr aylarında Gürcüstandan Azərbaycana 57 759,4 min dollar dəyərində 3 225 ədəd minik avtomobili ixrac olunub.

"Dalğa TV"nin Gürcüstan Milli Statistika Xidmətinə istinadən verdiyi məlumata görə, bu göstərici ötən ilin eyni dövrü ilə müqayisədə 12 678 ədəd avtomobil və ya 4,93 dəfə azdır.

Ötən ilin analoji dövrü ilə müqayisədə Gürcüstandan ixrac olunan minik avtomobillərinin həcmi dəyər baxımından 4,01 dəfə azalıb.

Qeyd edək ki, bu 10 ayı ərzində Gürcüstandan Azərbaycana ixrac olunan malların ümumi həcmində bu kateqoriyanın xüsusi çəkisi 26,19% təşkil edib.

Hesabat dövründə Gürcüstandan Azərbaycana ixrac olunan avtomobillərin həcmi bu ölkənin ümumi avtomobil ixracının 37,42%-ni təşkil edib.

Bu ilin yanvar-oktyabr ayları ərzində ölkənin ümumi ixracında isə Azərbaycana ixrac olunan məhsulların xüsusi çəkisi 12,03% təşkil edib.

Qeyd edək ki, bu ilin yanvar-oktyabr ayında Gürcüstandan Azərbaycana 220 546,1 min dollar dəyərində məhsul ixrac edilib ki, bu da ötən ilin 10 ayı ilə müqayisədə 2,15 dəfə azdır.

Xatırladaq ki, Dövlət Gömrük Komitəsinin məlumatına görə, bu ilin yanvar-oktyabr aylarında ümumilikdə Azərbaycanda 24 219 avtomobil gətirilib. Gürcüstandan ölkəmizə gətirilən avtomobillərin sayı bu rəqəmin 13,31%-nə bərabərdir.

Əmək və Əhalinin Sosial Müdafiəsi Nazirliyi işsizliyə görə sosial sığorta pulunun təyin olunması ilə bağlı qanun layihəsi hazırlayıb.

Bu sənəd "Məşğulluq haqqında" qanundan fərqli olaraq, iş yerini itirən, yəni işlədiyi müddətdə maaşından sosial müdafiə fonduna sosial sığorta ödənişləri edən pul köçürənlərə şamil olunacaq.

Milli Məclisin İqtisadi siyasət komitəsinin üzvü Vahid Əhmədov bu məsələyə münasibət bildirib: "Ümumiyyətlə, bu, mütərəqqi addımdır. Kim vaxtında sığortanı ödəyibsə, hesabında müəyyən vəsait varsa, pul həmin şəxsə ödənə bilər. Amma yenə də işsizliyə görə verilən müavinətlərin miqdarı çox azdır. Lakin dövlət başçısı son zamanar bu məsələ ilə bağlı ciddi addımlar atır.

İqtisadçı ekspert, keçmiş deputat Nazim Məmmədovun sözlərinə görə, yaxınlarda hökumətə təqdim olunacaq qanun lahiyəsi əslində kölgə iqtisadiyyatının azalmasına xidmət edə bilər: "Amma bir şərtlə, geniş maarifləndirmə işi aparılmalı, insanlara izah edilməlidir ki, iş yeri hər an bağlana bilər, ona görə işə qəbul olunarkən əmək müqaviləsi bağlanmasına nail olsunlar, sosial sığorta haqlarının ödənilməsinə nəzarət edə bilsinlər, paket maaşlara üstünlük verməsinlər".

Nazim Məmmədov bu gün verilən sosial ödənişlərin qənaətbəxş olmadığını da vurğulayıb:"Yaşayış minimumu 2015-ci il üçün 140 manat götürülsə belə, orta hesabla bir ailədən bir nəfərin işlədiyini nəzərə alsaq, orta statistik ailənin sayı 4 nəfər olduğundan yerdə qalan 3 nəfər öz yaşayış minimunu ya ünvanlı sosial yardım almaqla, ya da mövsümü işlərdə işləməklə qarşılaya bilir. Bu, çox ciddi problemdir. Sosial sığortaya cəlb olunmayan ən azı 2 milyon işləyə biləcək potensial var, bu təxminən əmək qabiliyyətli əhalinin 40 faizidir. Sosial sığorta pulundan daha çox qeydiyyata düşən, əmək müqaviləsi ilə işləyən vətəndaşlarımız yararlana biləcək. Bu proqressiv addımdır. Ünvanlı sosial yardım mahiyyət üzrə proqressiv deyil, onu da başqa sosial lahiyyələrlə əvəzləmək lazımdır".

Bu qanun layihəsindən qabaq ölkəmizdə "Məşğulluq haqqında" qanun qəbul olunub. Qanuna əsasən isə işsizlik statusu alan hər bir vtəndaş minimum əmək haqqı miqdarında işsizliyə görə sosial müavinət almalıdır.