"2015-ci ildə il Azərbaycana gələn turistlərin sayında artım baş verməyib".

"Dalğa TV"nin məlumatına görə, bunu mədəniyyət və turizm naziri Əbülfəs Qarayev deyib. O bildirib ki, dünyada baş verən iqtisadi və maliyyə böhranı ilə əlaqədar bu il ümumilikdə dünya turizmində də artım müşahidə edilməyib.

Ə. Qarayev qeyd edib ki, Rusiyanın turizm bazarında xaricə gedənlərin sayı 70 faiz azalıb: “Azərbaycana gələn 2,5 milyon nəfər turistin təxminən 700- 800 min nəfərini Rusiyadan gələnlər təşkil edirdi. Əgər Rusiyada azalma 70 faiz olubsa, bizdə necə artım ola bilər? Bu, mümkünsüzdür. Amma bizi sevindirən məsələ ondan ibarətdir ki, Azərbaycana ənənəvi deyil, yeni bazarlardan, xüsusilə Körfəz, Avropa ölkələrindən, Latın Amerikasından gələnlər var. Bizim coğrafiyamız genişlənir".

Ə. Qarayevin sözlərinə görə, Azərbaycanın turizm sərgilərində iştirak etdiyi ölkələrdən gələn turistlərin sayı artır.

"Heç kimin burada xüsusi imtiyazı yoxdur, ola da bilməz".

Ümumiyyətlə, iqtisadi və maliyyə sektorunun şəffaflaşması prosesi gedir, getməlidir və burada bütün xoşagəlməz hallara qarşı daha da ciddi mübarizə aparılacaqdır. Rüşvətxorluq, korrupsiya, inhisarçılıq, qanunsuz fəaliyyət - bütün bunlara qarşı daha da ciddi mübarizə aparılacaqdır.

"Dalğa TV" xəbər verir ki, bunu Azərbaycan Prezidenti İlham Əliyev 2015-ci ilin idman yekunlarına həsr olunmuş tədbirdə çıxışı zamanı bildirib.

Prezident bəyan edib ki, biz bundan sonra iqtisadi liberallaşma siyasətini daha da ciddi şəkildə aparmalıyıq.

“Xüsusilə, inhisarçılığa qarşı mübarizə daha da ciddi olacaq. Həm idxalda, həm yerli istehsalda inhisarçılığa yol verilməməlidir. Heç kimin burada xüsusi imtiyazı yoxdur, ola da bilməz. Kim dövlət büdcəsinə daxilolmaların qarşısını alacaqsa, cəzalandırılacaq.

Ona görə, gömrük, vergi sistemində maksimum şəffaflıq təmin edilməlidir və ediləcəkdir. Mən bu məsələlərlə bağlı bir neçə dəfə Nazirlər Kabinetinin toplantısında çıxış etmişəm. Öz çıxışlarımda bildirmişəm ki, Azərbaycanda maliyyə və iqtisadi sektor tam şəffaf olmalıdır", - deyə, İlham Əliyev bəyan edib.

Çörəyin qiymətinin 40 qəpikdən 50 qəpiyə qalxdığı bildirilir.

Azərbaycanda unun topdansatış qiyməti artıb.

"Dalğa TV" Lent.az-a istinadən xəbər verir ki, dekabrın əvvəllərində ölkənin iri dəyirmanlarında 1 kiloqram unun qiyməti 32-36 qəpik arası idisə, artıq bu rəqəm 50 qəpiyə yüksəlib.

Ölkənin ən böyük dənüyütmə şirkəti olan "Karat Holding"dən Lent.az-a bildirilib ki, şirkət dekabrın 21-dəki devalvasiyadan sonra unun 1 kiloqramının topdansatış qiymətini 49 qəpiyə qaldırıb və artıq satış yeni qiymətlə həyata keçirilir.

Şirkət nümayəndəsi onu da əlavə edib ki, qiymət 49 qəpiyə qalxmazdan əvvəl unun 1 kiloqramının dəyəri müxtəlif rəqəmlərlə ifadə olunub və son olaraq 39 qəpik təşkil edib.

Qeyd edək ki, bu gündən etibarən ölkədə unun kisəsinin və çörəyin qiyməti yüksəlib. Sosial şəbəkələrdə yayılan məlumatlarda bildirilir ki, çörəyin qiyməti 40 qəpikdən 50 qəpiyə qalxıb.

Manatın devalvasiyası Azərbaycanda 2016-cı ildə keçiriləcək Formula 1 yarışının və 2017-ci ildə keçiriləcək İslam Həmrəyliyi Oyunlarının büdcəsinə heç bir təsir göstərməyəcək.

"Dalğa TV" APA-ya istinadən xəbər verir ki, bunu gənclər və idman naziri Azad Rəhimov deyib.

Nazir bildirib ki, hər iki yarışmanın büdcəsi artıq təsdiq olunub, yarışların büdcəsi əvvəldən dollarla hesablanıb, büdcədə hər hansı dəyişiklik gözlənilmir.

Onun sözlərinə görə, hər iki yarışın idmançıları yarışlarda öz ölkələrinin vəsaiti hesabına iştirak edəcəklər:

"Narahatlığa əsas yoxdur".

AMB üzən məzənnə rejiminə keçidlə bağlı qərar qəbul edib.

Manatın ABŞ dollarına qarşı 48%-lik devalvasiyası Azərbaycan Mərkəzi Bankının (AMB) sərəncamında olan rəsmi valyuta ehtiyatlarının həcminin kəskin artmasına səbəb olub.

"Dalğa TV" "APA"-ya istinadən xəbər verir ki, ölkədə dolların manata qarşı məzənnəsinin 1,0494 manatdan 1,55 manata yüksəlməsi AMB-nin sərəncamında olan ehtiyatların manat ekvivalentində 48% və ya 3 mlrd. 145 mln. 272,160 min manat artmasına gətirib.

Xatırladaq ki, AMB-nin sərəncamında olan rəsmi valyuta ehtiyatların həcmi 2015-ci il dekabr ayının 1-ə 6 mlrd. 245,6 mln. dollar olub. Başqa sözlə, əgər 6 mlrd. 245,6 mln. dollarlıq ehtiyatı bu günə qədər olan məzənnə ilə manata konvertasiya olunsa idi, bu rəqəm 6 mlrd. 535,396 mln. manat edəcəkdi. Bugünkü məzənnə ilə konvertasiya edəndə isə Mərkəzi Bankın valyuta ehtiyatları manat ekvivalentində 9 mlrd. 680,668 mln. manata bərabərdir.

Qeyd edək ki, bu gündən etibarən AMB üzən məzənnə rejiminə keçidlə bağlı qərar qəbul edib.

Bu qərardan sonra dolların manata qarşı rəsmi məzənnəsi 1,55 manat səviyyəsində qərarlaşıb.

"Bizim indi gördüyümüz - bu, manatın real məzənnəsidir".

Azərbaycanın üzən məzənnəyə keçməsi dünya valyuta bazarında gedən proseslərdən irəli gələn məcburi tədbirdir. Bizim indi gördüyümüz - bu, manatın real məzənnəsidir.

"Dalğa TV" xəbər verir ki, bu barədə Trend-ə bazar ertəsi ekspert Oqtay Haqverdiyev bildirib.

Onun sözlərinə görə, Azərbaycan Mərkəzi Bankının (AMB) hazırkı addımını manatın real qiymətinə tərəf hərəkətin başlaması kimi qiymətləndirmək olar.

"Güman edirəm ki, dolların bahalaşması prosesi 2016-cı il ərzində də axarlı şəkildə davam edəcək. Mənim ekspert qiymətləndirmələrimə görə, dolların real məzənnəsi 3 manatdan 5 manatadək təşkil edə bilər", - deyə, Haqverdiyev bildirib.

Ekspert AMB-nin bu addımını məcburi adlandırıb.

"Əgər dünya valyuta bazarında baş verən proseslər olmasa idi, heç nəyi dəyişmək lazım gəlməzdi. Lakin Azərbaycan xarici ticarətini dollarla apardığı üçün bu addım məcburi şəkildə atılıb", - Haqverdiyev bildirib.

Onun sözlərinə görə, üzən məzənnəyə keçidin məqsədi AMB-nin ehtiyatlarının bərpası deyil.

"Ehtiyatlar onun üçün yaradılır ki, belə fors-major hallarda vəziyyətdən çıxmağa imkan versin. Lakin iqtisadi elm baxımından istənilən milli valyuta buraxılmalıdır. Onun real qiymətini valyuta bazarında tələb və təklif prinsipi müəyyənləşdirməlidir. Belə vəziyyətdə iqtisadiyyat da ahəngdar inkişaf edir", - deyə, ekspert bildirib.

Haqverdiyevin sözlərinə görə, indi Azərbaycanın qarşısında dayanan 1-ci dərəcəli vəzifə qeyri-neft sektorunun inkişafıdır.

"İxracımızın 93%-dən çoxunu neft və neft məhsulları təşkil edir. Müasir elmtutumlu istehsalat sahələrini inkişaf etdirmək, nanotexnologiyaları mənimsəmək lazımdır. Elə məhsul seçmək və istehsal etmək lazımdır ki, o, dünya bazarında yerini tutsun və rəqabətqabiliyyətli olsun", - deyə, o, qeyd edib.

Xatırladaq ki, dekabrın 21-dən Azərbaycan Mərkəzi Bankı üzən məzənnəyə keçib və nəticədə milli valyuta olan manat təxminən 50% ucuzlaşıb.

Bu gün ABŞ dolları və avronun Azərbaycan manatına qarşı rəsmi məzənnəsi müvafiq olaraq, 1,55 və 1,6850 manat təşkil edir.