Makron: ABŞ administrasiyası Avropa İttifaqının parçalanmasına yönəlmiş siyasət aparır

Fransa Prezidenti Emmanuel Makron bildirib ki, ABŞ administrasiyasının hazırkı siyasəti Avropa İttifaqının zəiflədilməsinə və parçalanmasına yönəlib. Bu barədə o, Financial Times qəzetinə verdiyi müsahibədə danışıb.

Makronun sözlərinə görə, Avropa hazırda ABŞ Prezidenti **Donald Tramp**ın rəhbərlik etdiyi, açıq şəkildə anti-Avropa mövqeyi nümayiş etdirən və **Avropa İttifaqı**na qarşı mənfi münasibət sərgiləyən administrasiya ilə üz-üzədir. Fransa Prezidenti qeyd edib ki, açıq aqressiya şəraitində güzəştlərə getmək və razılaşma əldə etməyə çalışmaq effektiv strategiya deyil. Onun sözlərinə görə, bu yanaşma son aylarda sınaqdan keçirilsə də, arzu olunan nəticə verməyib.

Makron həmçinin vurğulayıb ki, ABŞ-dan Qrenlandiya ilə bağlı səslənən təhdidlər fonunda Avropa iqtisadi islahatları sürətləndirməli və qlobal təsir imkanlarını gücləndirməlidir. O əlavə edib ki, Avropa eyni zamanda ticarət sahəsində Çinin artan təsiri və ABŞ tərəfindən qaynaqlanan qeyri-sabitliklə qarşılaşır. Prezidentin fikrincə, bu iki amil Avropa üçün ciddi çağırışlar yaradır.