Suriyada Bəşər Əsəd hakimiyyətinə qarşı vuruşan “Ceyş Əl-Fəth” qruplaşması Rusiyanın Türkiyədəki səfiri Andrey Karlovun qətlinə görə məsuliyyəti öz üzərinə götürüb.

Modern.az saytı xarici KİV-ə istinadən xəbər verir ki, bu qruplaşma Hələbdə “Ən Nüsrə Cəbhəsi”nin də daxil olduğu hərbi müxalifət koalisiyasının üzvüdür.

Xatırladaq ki, Rusiya səfiri Andrey Karlov dekabrın 19-da Ankarada öldürülmüşdü. Onu 22 yaşlı keçmiş polis işçisi Mövlud Mert tapançadan açdığı atəşlə qətlə yetirib.

Bu gün İstanbul boğazından keçməklə Asiya və Avropanı birləşdirən yeni tunel açılıb.

APA-nın Türkiyə mətbuatına istinadən verdiyi məlumata görə, Avrasiya tunelinin uzunluğu ümumilikdə 14,6 kilometrdir. Tunelin 5,4 km hissəsi dəniz dibindən 106 metr dərinlikdən keçir, bu hissə iki mərtəbəlidir. İstanbulun Avropa və Asiya sahillərində tunelin davamı olan  9,2 km qism isə yollar genişləndirilib. Tunel İstanbulun Avropa və Asiyadakı hissələri arasında gediş müddətini 100 dəqiqədən 15 dəqiqəyə endirəcək. Tunelin dənizin altından keçən hissəsi 4 dəqiqəyə qət ediləcək. Avrasiya tunelində sürət həddi saatda 70 km olacaq. Asiya qitəsində tunelə giriş Harem Üsküdar, Avropa qitəsində tunelə giriş Çatladıkapı Fatih istiqamətindən olacaq. Tuneldə 4,5 G  keyfiyyətində və fasiləsiz  mobil telefon və internet internet mövcuddur. Tunel 9 bal gücündə zəlzələyə davamlıdır.

Avrasiya tunelinin tikintisi özəl şirkətlər tərəfindən həyata keçirilib. Bu şirkətlər tunelin tikintisinə 1 milyard 245 milyon 121 min dollar xərc çəkib. Tunel 24 il 5 ay bu firmaların sərəncamında olacaq, daha sonra Türkiyə hökumətinə təhvil veriləcək. Tuneldən keçid minik avtomobilləri üçün 4 dollar, mikroavtobuslar üçün isə 6 dollar olacaq. Avtomobil və mikroavtobuslardakı sərnişinlər üçün isə ödəniş alınmayacaq. Hər gün bu tuneldən 120 min avtomobilin Avrasiya və Asiya qitəsinə keçəcəyi proqnozlaşdırılır.

Tədbirdə çıxış edən Türkiyə prezidenti Rəcəb Tayyib Ərdoğan deyib ki, yeni ilə qədər tuneldən keçid 15 lirə olacaq. Bu vəsait şəhid və qazilər üçün yaradılmış fonda toplanacaq. 

Rusiya səfirini öldürən şəxsi çəkən "Associated Press"in fotoqrafı Burhan Özbilici hadisənin təfərrüatlarını bölüşüb.

“Qafqazinfo” rus KİV-nə istinadən xəbər verir ki, Özbilici hadisənin “Kalininqraddan Kamçatkaya qədər səyyahların gözü ilə” adlı sərgidə baş verdiyini deyib. O, məkan evinə yaxın olduğu üçün sərgiyə qatıldığını bildirib. Tədbirin standart olduğunu deyən Özbilicinin sözlərinə görə, qara kostyumda və qalstukda bir kişinin tapança çıxardığını görəndə bunun diqqət çəkmək üçün oyun olduğunu zənn edib:

“Əslində isə bu, mənim, başqa insanların gözü qarşısında törədilən planlaşdırılmış soyuqqanlı sui-qəsd idi”.

Fotoqraf onu da vurğulayıb ki, qatil səfirə atəş açan zaman zaldakılar dəhşət içində sürünüb gizlənməyə çalışırdılar. Qalereyada 8 dəfə atəş səsi eşidildiyini deyən Özbilici o an yaşadıqlarını dilə gətirib: “Mən özümü itirmişdim və qorxmuşdum. Ancaq divarın arxasında gizləndim və öz işimlə məşğul oldum - fotolar çəkdim. Baş verənləri dərk etmək üçün bir neçə saniyəm getdi. Yanımda bir insan öldü, gözümün önündə bir həyat itdi”.

Ankarada baş verən sui-qəsddən sonra yenidən gözlər rəsmi Moskva və Ankaraya yönəlib. Təyyarənin vurulmasından sonra iki ölkə arasında gərginlik hələ təzə-təzə aradan qalxdığı bir zamanda baş verən hadisəyə ölkə başçılarının verəcəyi qərar maraqla gözlənilirdi. Ancaq liderlərin hardasa eyni dəqiqələrdə iki ölkə arasındakı münasibətlərin pozulmayacağını bəyan etməsi yaranmış qorxunu az da olsa aradan qaldırdı. Bəs dünyada bununla bağlı hansı analiz və şərhlər verilib?

“Qafqazinfo” sözügen hadisəylə bağlı xarici mətbuatda yer alan analizlərin qısa xülasələrini təqdim edir:

“Times”da “Qatil səfiri öldürdükdən sonra “bu Hələb üçündür”-deyə qışdırdı” başlığı ilə yer alan məqalədə bu cinayətin Putinlə Ərdoğan arasındakı münasibətləri yenidən pozacağı vurğulanıb:

“Sərgidə bir səfirin öldürülməsi İraqdakı vətəndaş müharibəsi, 1 milyon mühacirin Ağ dənizə köçməsi, Parisdəki qətliamla müqayisədə kiçik bir hadisə kimi görünə bilər. Ancaq bunun ciddi nəticələrinin olması gözlənilir. Əsrlərdir Qərbi Asiyada gücə sahib olmaq üçün vuruşan 3 böyük ölkə - Rusiya, Türkiyə və İran rəsmiləri bugünkü görüşündə müəyyən razılıq əldə edə və Suriyanın açdığı yaraları sağalda bilərdi. Ancaq bu həm də ABŞ-ın Yaxın Şərqdəki nüfuzunun dramatik bir şəkildə azalması deməkdir”.

Bu dəfə yaranın sağalmasının vaxt alacağını yazan qəzet daha sonra qatilin polis olmasının vəziyyəti daha da qəlizləşdirdiyini bildirib:

“Qatilin səsləndirdiyi şüar onun ya cihadçı, ya da Gülən hərəkatının üzvü olduğuna işarə edir. ABŞ-a olan güvənsizlik iki ölkə arasındakı çatların üstünü örtə bilər, ancaq bu, o qədər də uzun çəkməz. Çünki həm Putin, həm də Ərdoğan Yaxın Şərqə güc üçün girişib və birinin sünniləri, digərinin isə şiələri dəstəkləməsi yaraların sağalmasına mane olur”.

Gürcüstanın daxili işlər naziri Giorgi Mqebrişvili Ermənistana ilk işçi səfərini həyata keçirib. APA-nın Gürcüstan bürosunun məlumatına görə, bu barədə APA-ya Gürcüstan DİN-nin mətbuat xidmətindən bildirilib. Məlumata görə, G. Mqebrişvili Ermənistan prezidenti Serj Sarkisyan və Ermənistanın daxili işlər naziri  Vladimir Qasparyan ilə görüşüb.

Gürcüstan Daxili İşlər Nazirliyindən bildirilib ki, G. Mqebrişvili Ermənistan prezidenti ilə görüşdə Gürcüstan və Ermənistanın dövlət sərhədlərinin delimitasiyası prosesinin davam etdirilməsi ilə bağlı məsələ qaldırıb və ümid etdiyini bildirib ki, yaxın vaxtlarda bu proses uğurla başa çatacaq.

Görüşdə Gürcüstan və Ermənistan daxili işlər nazirləri əməkdaşlıq və gələcək planlar barədə müzakirələr aparıblar. G. Mqebrişvili erməni həmkarı ilə birlikdə “İki ölkə arasında polis idarələrinin əməkdaşlığın dərinləşdirilməsi” haqqında bəyannamə imzalayıb.

Xatırladaq ki, Gürcüstan və Ermənistan arasında 224 km sərhəd xəttinin təxminən 71% artıq razılaşdırılıb.

Türkiyənin Kayseri şəhərində baş verən terror aktı nəticəsində şəhid olanların sayı 14 nəfərə çatıb.

"Report" "Hürriyet"ə istinadən xəbər verir ki, bu barədə jurnalistlərə ölkənin daxili işlər naziri Süleyman Soylu məlumat verib. 

Onun sözlərinə görə, Kayseri Erciyes Universitetinin kampusunun qarşısında hərbçiləri daşıyan sərnişin avtobusunun partladılması nəticəsində 56 nəfər yaralanıb: "Yaralananlardan 12-si hazırda reanimasiyadadır. Onlardan 4 nəfərinin vəziyyəti ağırdır".

*** 14:44

Türkiyənin Kayseri şəhərində baş verən terror aktında yaralananların sayı artıb.

"Report" "Milliyet"ə istinadən xəbər verir ki, Kayseri Erciyes Universitetinin kampusunun qarşısında hərbçiləri daşıyan sərnişin avtobusunun partladılması nəticəsində 55 nəfər yaralanıb.

Ölkənin daxili işlər naziri Süleyman Soylu bildirib ki, yaralananlardan 12-si hazırda reanimasiyadadır: “Onlardan 6-sının vəziyyəti ağırdır. Bundan başqa, şəhid olanlardan 8-nin kimliyi də artıq məlum olub”.

Nazir qeyd edib ki, hazırda terroru törədənlərin kimliyi araşdırılır: “Türkiyədə terrora son qoyulacaq. Biz bu məsələdə qərarlıyıq. Səbrli olacağıq və bununla da terrorun qarşısını alacağıq. Ölkəmizin, millətimizin başı sağ olsun”. 

*** 12:10

Türkiyə Silahlı Qüvvələri Baş Qərargahı Kayseri şəhərində baş verən terror aktı nəticəsində ölən və yaralananların sayını açıqlayıb.  

"Report" "Hürriyet"ə istinadən xəbər verir ki, Kayseri Erciyes Universitetinin kampusunun qarşısında hərbçiləri daşıyan sərnişin avtobusunun partladılması nəticəsində 13 hərbçi şəhid olub, 48 nəfəri yaralanıb. 

*** 11:41

Türkiyədə Kayseri Erciyes Universitetinin kampusunun qarşısında hərbçiləri daşıyan sərnişin avtobusunun partladılması nəticəsində 9 nəfər şəhid olub. 

"Report" "Hürriyet"ə istinadən xəbər verir ki, bu barədə hakim Ədalət və İnkişaf Partiyasının (AKP) Kayseri şəhərindən olan millət vəkili İsmayıl Tamer "A Haber" telekanalına açıqlamasında bildirib.

Milliyyətçi Hərəkat Partiyasından (MHP) olan millət vəkili Yusif Halaçoğlu isə deyib ki, "CNN Türk"ə terror aktının bomba yüklənmiş "Şahin" markalı avtomobil vasitəsilə həyata keçirilb. 

AKP-nin Kayseridən olan digər millət vəkili Sami Dədəoğlu yaralıların sayının 15-20 nəfərə yaxın olduğunu söyləyib.

Yaralılar Erciyes Universitetinin tibb fakültəsinin xəstəxanasına və şəhərdəki digər səhiyyə müəssisələrinə yerləşdiriliblər. Onlardan bəzilərinin vəziyyətinin ağır olduğu bildirilir. 

Türkiyə prezidenti Rəcəb Tayyib Ərdoğan və baş nazir Binəli Yıldırım müvafiq qurumların rəhbərlərindən hadisə ilə bağlı ətraflı məlumat alıblar.

*** 10:21

Türkiyədə universitetlərdən birinin şəhərciyində partlayış olub.

“Report”un Türkiyə KİV-inə istinadən verdiyi məlumata görə, partlayış bu gün səhər saatlarında Kayseri Erciyes Universitetinin kampusunun qarşısında qeydə alınıb.

Partlayıcı qurğu quraşdırılmış minik avtomobili içərisində mülki geyimli hərbçilərin olduğu sərnişin avtobusuna çırpılıb, ölən və yaralananlar var.

Hadisə yerinə təcili yardım və yanğınsöndürən maşınları göndərilib.