Kütləvi informasiya vasitələrində Rusiyanın Ukrayna sərhədlərinə ordu cəmləşdirməsi xəbəri ABŞ - da narahatçılıqla qarşılanıb.

AzNews.az - ın xarici mətbuata istinadən xəbərinə görə, ABŞ prezidentinin məsləhətçisi Ben Rods bildirib ki, Rusiya Ukraynaya hərbi güc tətbiq etsə bu ona baha başa gələcək.
"Ukraynanın cənubunda və şərqində rus hərbi qüvvələrinin cəmlənməsi bizi çox narahat edir. Biz diqqətlə izləyirik və belə başa düşürük ki, Rusiyanın istənilən hərbi müdaxiləsi ona cox ağır itkilər bahasına başa gələcək", - deyə Ağ evin sözçüsü bildirib.

ABŞ Dövlət Departamentinin nümayəndəsi Mari Hoff Türkiyəni sosial şəbəkələrə girişi əngəlləməməyə çağırıb.

Xanım M.Hoff Vaşinqtonda brifinqdə qeyd edib ki, insanlar öz fikirlərini sərbəst şəkildə "Facebook" və "Twitter"də ifadə etməlidirlər: "Və hakimiyyət bu resurslara girişi bağlamamalıdır. Bu, "Instagram"a da aiddir".

Qeyd edək ki, bundan əvvəl Türkiyə hakimiyyəti məhkəmənin qərarına əsaslanaraq Twitter-ə girişi bağlamışdı. Türkiyənin Baş naziri Rəcəb Tayyib Ərdoğan bildirib ki, cürbəcür yalanların dərc olunduğu "Facebook", "Twitter" və "YouTube" kimi servisləri müdafiə etməyə ehtiyac yoxdur.

“Azərbaycanlıların vəhşi kimi təqdim edildiyi filmin Rusiya dövlət kanalında yayımlanması təəssüfləndirici haldır”. Bunu AzNews.az -a Azərbaycan Milli Televiziya və Radio Şurasında (MTRŞ) sədri Nuşiravan Məhərrəmli bildirib. O, hesab edir ki, indiki vəziyyətdə bu cür məsələlərə soyuqqanlı yanaşmaq lazımdır: “Bu məsələ Rusiyanın hazırda, həssas dövrdə yeritdiyi siyasətdir və bu da başadüşüləndir. Təbii ki, o siyasətə də Azərbaycan tərəfi də lazımi cavabı verəcək”.

Qurum rəhbəri deyib ki, bütün bunları nəzərə alaraq, “Rossiya 1”də yayımlanan “Svoya pravda” (“Onların həqiqətləri”) adlı filmdə Azərbaycan haqqında həqiqəti əks etdirməyən qərəzli məlumatlara görə MTRŞ tərəfindən hər hansı bir rəsmi məktub ünvanlamayacaq. O Azərbaycanın Rusiyanın dövlət kanalına cavabı müxtəlif səpkili yollarla olacağını da istisna etmədi.
Qeyd edək ki, anspress-in məlumatına görə, Rusiyanın dövlət kanalı “Rossiya 1”də yayımlanan “Svoya pravda” (“Onların həqiqətləri”) adlı filmdə Azərbaycan haqqında həqiqəti əks etdirməyən qərəzli məlumatlar Moskvada yaşayan Azərbaycan diasporunun da ciddi etirazına səbəb olub. Rusiyanın politoloqları da Krım hadisələrin davam etdiyi bir vaxtda dövlət kanalında belə bir filmin yayımlanmasının MDB respublikalarına siyasi mesaj məqsədi daşıdığı fikrindədirlər. Filmin nümayiş olunduğu “Rossiya 1” kanalı isə film haqqında hər hansı mövqe bildirməkdən yayınıb. Atıq Azərbaycanın Rusiyadakı səfirliyindən isə film haqqında lazımı tədbirlərin görüldüyü bildirilib. Film Sovet İttifaqının dağıldığı dövrləri əhatə edir. Xatırladaq ki, film Azərbaycanın ucqar dağ kəndindən Bakıya gələn rus qadının taleyi üzərində qurulub. Təxminən 3,5 saatlıq filmdə vəhşi və amansız kimi təqdim edilən azərbaycanlıların erməniləri və rusları döyməsi, erməni ailəni qətlə yetirməsi kimi səhnələr yer alıb. Etirazlara da səbəb Azərbaycanın bu cür yanlış təqdim edilməsidir.

Azərbaycanın Avropa Şurası (AŞ) yanında Daimi Nümayəndəliyindən AzərTAc-a bildirmişlər ki, Strasburqda- Avropa Şurasının iqamətgahında bu qurumun və Azərbaycan Respublikasının Mədəniyyət və Turizm Nazirliyinin təşəbbüsü və təşkilatçılığı ilə Beynəlxalq Novruz Günü münasibətilə böyük mərasim təşkil olunmuşdur.
Novruz bayramı tədbirində Avropa Şurasının rəsmiləri, quruma üzv ölkələrin daimi nümayəndəliklərinin rəhbərləri və təmsilçiləri, Avropa Şurasının Mədəniyyət üzrə Daimi Komitəsinin iclasının iştirakçıları və digər qonaqlar iştirak etmişlər.
Tədbiri açan Azərbaycanın AŞ yanında daimi nümayəndəliyinin rəhbəri, səfir Emin Eyyubov iştirakçıları salamlamış, xalqımızın ən əziz bayramı olan Novruz haqqında məlumat vermişdir.
Diplomat Novruz bayramının tarixi kökləri, özünəməxsus xüsusiyyətləri haqqında ətraflı söhbət açmış və bu bayramın sülh, dostluq, mənəvi saflıq, barışıq, birlik, yaxşı qonşuluq, bərəkətlilik, təbiətin oyanışı bayramı olduğunu diqqətə çatdırmışdır.
Xalqımızın dəyərləri arasında Novruz ənənələrinin müstəsna mövqeyə malik olduğunu xatırladan səfir onun mədəni müxtəliflik, dözümlülük, sağlam həyat tərzi kimi dəyərləri təcəssüm etdirdiyini bildirmişdir.
E. Eyyubov Novruz bayramının Azərbaycanın birinci xanımı, Heydər Əliyev Fondunun prezidenti Mehriban Əliyevanın səyi nəticəsində 2009-cu ildə UNESCO-nun Qeyri-Maddi Mədəni İrs Siyahısına daxil edildiyini vurğulamış, habelə 2010-cu ildə 21 mart tarixinin BMT-nin Baş Məclisi tərəfindən "Beynəlxalq Novruz Günü" elan olunduğunu diqqətə çatdırmışdır.
Sonra çıxış edən Azərbaycan Respublikası Mədəniyyət və Turizm nazirinin müavini Sevda Məmmədəliyeva dünyanın müxtəlif ölkələrində yaşayan 300 milyon insanın Novruzu bayram etdiyini bildirərək demişdir: “Bu gün Novruz bayramı münasibətilə Avropa Şurasında keçirilən tədbirin əhəmiyyəti isə xüsusilə vurğulanmalıdır. Azərbaycana belə bir şərait yaratdığına görə təşkilatın rəhbərliyinə təşəkkür edirəm.”
Nazir müavini Novruz bayramının xüsusiyyətləri, hər il ölkəmizdə Prezident İlham Əliyevin təşkilatçılığı ilə bu bayramın yüksək səviyyədə qeyd edilməsi haqqında da danışmışdır.
Avropa Şurasının demokratik idarəçilik üzrə direktoru Klaudia Luçiani Avropa Şurası baş katibinin müavini Qabriella Battaini Draqoninin adından Novruz bayramı münasibətilə mərasim iştirakçılarını təbrik etmiş və bu bayramın mədəni müxtəlifliyə, mədəniyyətlərarası dialoqa böyük töhfə verdiyini vurğulamışdır.
Çıxışlardan sonra Azərbaycanın Xalq Artisti Yusif Qasımovun rəhbərliyi ilə Bakı Xoreoqrafiya Məktəbinin gənc rəqqaslarından ibarət rəqs qrupunun təqdimatında Azərbaycanın milli rəqsləri ifa edilmişdir. Gənc rəqqasların məharətli çıxışları tədbir iştirakçıları tərəfindən böyük maraqla qarşılanmışdır
Sonda tədbir iştirakçılarına Azərbaycan milli mətbəxinin nümunələri və bayram şirniyyatları təqdim olunmuşdur.

Avropa Birliyi Ukraynaya yardımı 1 milyard avro artırır.

AzNews.az - ın UNN-ə istinadən verdiyi xəbərə görə, bunu Ukraynanın baş naziri Arseni Yatsenyuk bildirib.
"Avropa Birliyi Ukraynaya makromaliyyə yardımını 610 milyon avrodan 1,61 milyard avroya çatdırmaq barədə qərar qəbul edib" - deyə Yasenyuk qeyd edib.

Yasenyuk deyib ki, pul aprelin sonu və ya mayın əvvəlində köçürüləcək və vəsait Ukraynada iqtisadi vəziyyətin sabitləşməsi üçün istifadə olunacaq.

Ağ Evin rəsmi saytında ABŞ-ın ştatlarda yaşayan sakinlərin xahişi ilə yeni petisiya yerləşdirilib. Sakinlər yaşadığı ştatın Vaşinqtona bağlı olmağını istəmir.

Hazırda petisiyaya səs verən ABŞ vətəndaşlarının sayı 300 mini ötüb. ABŞ-dan ayrılmaq istəyən ştat sakinlərinin sözlərinə görə, onlar Müstəqillik bəyannaməsinin şərtlərinə uyğun hərəkət edirlər. Belə ki, bəyannamədə bildirilir: “Ölkədə elə vəziyyət yarana bilər ki, xalqlardan birinin təhlükəsizlik və xoşbəxtliyi naminə digər xalqla siyasi zəncirləri qırmasına icazə verilir”. Sözügedən prosesdə lokomotiv rolunu Texas ştatı oynayıb. Ştatın 70 min vətəndaşı Ağ Evin rəsmi saytında yerləşdirilmiş petisiyaya səs verib. Növbəti sıralarda Luiziana, Florida, Alabama, Missisipi, Nyu-Jersi, Kentukki ştatları gəlir. Petisiyaya ümumilikdə 29 ştat qoşulub. Ştat rəhbərləri məsələ ilə bağlı prezident Barak Obamaya müraciət edib. "Xahiş olunur ki, ştatlara ABŞ tərkibindən çıxmaq hüququ, ya da referendumun keçirilməsinə icazə verilsin”. Müraciətdə həmçinin qeyd olunur ki, 29 ştat ölkədə insanların şəxsi həyatına hakimiyyətin qeyri-adekvat addım atmasına, iqtisadi islahatların keçirilmədiyinə və ABŞ vətəndaşının hüquqlarının pozulduğuna görə ABŞ-dan ayrılmaq istəyir.