Azərbaycanın yəhudi icması milli bayramını qeyd edir.

 Dalgatv  “Qafqazinfo” - ya istinadən xəbər verir ki, yəhudilər Roş-ha-şana adlanan yeni il bayramını hal-hazırda Dənizkənarı Milli Parkda keçirirlər.

Onlar bundan əvvəl sinaqoqa baş çəkiblər, dua və bayram adətlərini yerinə yetiriblər. Daha sonra yəhudilər bulvarda bir araya gəliblər.

Bu bayramın gəlişi ilə yəhudi xalqı 5775-ci ilə qədəm qoyur. Roş-ha-şana mərasimləri ənənəyə görə 3 gün davam edir.

Kayseri Böyük Şəhər Bələdiyyə başqanı Mehmet Özhasaki Türkiyənin 11-ci prezidenti Abdullah Gül üçün dövlət qəbristanlığı hazırlanacağını deyib.

Modern.az Türkiyə KİV-nə istinadən xəbər verir ki, Mehmet Özhasaki bunu keçmiş prezident Abdulla Gülün vəsiyyəti olduğunu qeyd edib. Onun sözlərinə görə Abdulla Gül Kayseridə dəfn edilməsini vəsiyyət edib.

“Bu məqsədlə şəhər qəbiristanlığının girişində dövlət məzarlığı hazırlanacaq. Cənab Abdulla Gül ata yurdu olan Kayserini çox sevdiyini və qəbrinin burada olmasını istəyir. Onun bu sözlərindən sonra Böyük Şəhər Bələdiyyəsinin qərarı ilə şəhər qəbiristanlığının girişindəki hüzr məclisləri aparılan evin arxasındakı yaşıl sahədə dövlət məzarlığı olacaq”.,-deyə M. Özhasaki bildirib.

Qeyd edək ki, Abdulla Gül 2007-2014-cü illərdə Türkiyə prezidenti olub.

Tbilisidə şərq tərəfdaşlığı ölkələrinin işğal olunmuş ərazilərinə edilən qanunsuz səfərlərlə bağlı beynəlxalq konfrans keçiriləcək. Şuradan Modern.az-a verilən məlumata görə, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev 25-27 sentyabr 2014-cü il tarixlərində Tbilisidə “şərq tərəfdaşlığı ölkələrinin işğal olunmuş ərazilərinə qanunsuz səfərlərin hüquqi nəticələri” adlı beynəlxalq konfransda iştirak etmək üçün Gürcüstanda səfərdə olacaq.
Şuranın dəstəklədiyi layihə çərçivəsində təşkil olunan tədbir Gürcüstan, Moldova və Azərbaycanın işğal olunmuş ərazilərinə qanunsuz səfərlərin qarşısının alınması üçün müvafiq təklif və mexanizmlərin hazırlanmasına həsr olunacaq.
Konfransda BMT, ATƏT və Avropa İttifaqının təmsilçiləri ilə yanaşı şərq tərəfdaşlığı proqramına daxil olan Gürcüstan, Moldova, Azərbaycan və digər ölkələrin yüksək vəzifəli şəxslərinin iştirakı və çıxışı da nəzərdə tutulub.

Azərbaycan tərəfindən Şura sədri Azay Quliyev işğal altında olan Dağlıq Qarabağ və digər bölgələrə edilən qanunsuz səfərlər və onun nəticələri haqqında məruzə ilə çıxış edəcək.

Tədbirə həmçinin azərbaycanlı millət vəkilləri Bəxtiyar Əliyev, Asim Mollazadə və yerli vətəndaş cəmiyyəti təşkilatlarının nümayəndələri qatılacaq.

“ABŞ prezidenti Barak Obama Ağ Evə silahlı basqın zamanı ekstremal vəziyyəti dəyərləndirdi”. Modern.az saytı xarici KİV-ə istinadla xəbər verir ki, bunu Ağ Evin mətbuat katibi Coş Ernets deyib.

O, ötən cümə günü Ağ Evə basqın cəhdini şərh edərkən bildirib ki, bu xoşagəlməz hadisəyə baxmayaraq Barak Obama məxfi xidmətinə tam şəkildə etibar edir. Ağ Ev rəsmisi ABŞ prezidentinin basqına cəhd zamanı necə hərəkət etdiyini də açıqlayıb:

“ 42 yaşlı Omar Qonsales Ağ Evə girməyə cəhd edərkən Barak Obama ailəsi ilə birgə iqamətgahını tərk edib”,-deyə C. Ernest söyləyib.

Qeyd edək ki, Omar Qonsales Barak Obamanın iqamətgahının hasarını aşaraq bıçaqla Ağ Evə girməyə cəhd etmişdi. Lakin məxfi xidmətin əməkdaşları vaxtında onu zərərsizləşdirə bilmişdi.

Omar Qonsalesin vaxtilə 18 il ABŞ-ın quru qoşunlarında xidmət etdiyi bildirilir.

Güclü yağışlar Gürcüstanın qərb bölgəsində ciddi fəsadlar törədib. 

ANS TV-nin məlumatına görə, güclü leysan yağışları ən çox Gürcüstanın Batumi, Kobuleti, Poti və Qori şəhərlərində fəsadlar törədib. 10 minlərlə insanın elektrik enerjisi və içməli su ilə təchizatı dayandırılıb. Acarıstan hökumətinin rəhbəri Arçil Xabadzenin sözlərinə görə təbii fəlakət insan itkisinə səbəb olmayıb. Batumi meri Georgi Ermakov şəhərdə son 6 ildə belə güclü yağışın müşahidə edilməyini və hazırda Batumidə vəziyyətin ağır olduğunu deyib. 

İki gün yağan güclü yağış Poti şəhərində də ağır fəsadlar törədib. Evlərin birinci mərtəbələri su ilə dolub. Nəqliyyat vasitələrinin hərəkəti çətinləşib. Mer İrakli Kakulya şəhərdə işlək vəziyyətdə olan 7 nasos stansiyasının yaranmış vəziyyəti aradan qaldırmaq üçün kifayət etmədiyini bildirib.

Qori rayonu da güclü yağış səbəbindən daşqınlara məruz qalıb. Rayonun bir neçə kəndində onlarla ev su altında qalıb. Əhali hakimiyyət orqanlarından yardım etmələrini xahiş edir. Yaranmış vəziyyətdən çıxış yolu tapmaq üçün isə Acarıstan rəhbərliyi təcili iclas keçirib. Bütün xilasedici briqadaların, yanğınsöndürənlərin və tibbi heyətin fasiləsiz çalışması tapşırığı verilib. Qeyd olunub ki, hava şəraiti imkan verən kimi küçələrdən və zirzəmilərdən suyun kənarlaşdırılması işlərinə başlanacaq. 

Sinoptiklər isə bu gündən etibarən bir neçə gün ərzində sabit hava şəraitinin hökm sürəcəyini bildiriblər.

“Avrasiya İttifaqı haqqındakı situasiya aydın deyil. Bütün Avrasiya ərazisinin birləşməsi zəruridir, lakin Rusiya bu halda separatizm prinsipi üzrə hərəkət edir. Qazaxıstan, Belarus, Ermənistanda heç də hamı Avrasiya İttifaqına inteqrasiyanın tərəfdarı deyil”.

Modern.az saytının məlumatına görə bu sözləri 1in.am saytına müsahibəsində Beynəlxalq Avrasiya Hərəkatının lideri, Kremlin şovinist və imperiyapərəst ideoloqu, politoloq Aleksandr Dugin deyib. Ekspert Kremlin “yeni SSRİ” layihəsi hesab olunan Avrasiya İttifaqına postsovet məkanındakı ölkələrin cəlb olunması prosesinin perspektivini şərh edərkən bildirib ki, bu təşkilata qoşulan ölkələrin cəmiyyətlərində belə millətçi əhval-ruhiyyə hökm sürür.

Onun sözlərinə görə Belarus, Qazaxıstan, Ermənistandakı millətçiliyi Rusiya Avrasiya layihələri üçün təhdid kimi dəyərləndirir.

Kremlin siyasi texnoloqu Rusiyanın postsovet ölkələrində vətəndaş cəmiyyətləri ilə işləməməsini də Avrasiya İttifaqının reallaşmasında maneə kimi dəyərləndirib.

“Postsovet məkanında Qərb dairələri Avrasiyaya inteqrasiyaya mane olmaq üçün bütün imkanlarından istifadə edir. Bu, çox ciddi mübarizə olduğuna görə qələbə haqqında birmənalı danışmaq çətindir. Qərb vətəndaş cəmiyyətləri ilə işləyir, bizdə isə bu tendensiya yoxdur. Məsələn, Rusiyanın Ermənistanla yaxınlaşması üçün belə format yoxdur. Bu, bizim inteqrasiyamızın strateji səhvidir. Avrasiya İttifaqı ilə bağlı proseslərə ziyalılar klubu qoşulmalıdır”.

Aleksandr Dugin hesab edir ki, Avrasiyaya inteqrasiya ilə bağlı vahid şəbəkənin mövcud olmaması təhlükəlidir və əhəmiyyətli proseslərin qarşısını alır.

Kreml mütəxəssisi Ermənistanın Avrasiya İttifaqına girişi perspektivinə də aydınlıq gətirib. Dugin Ermənistanın bu layihədə iştirakının vacibliyini vurğulayıb. O qeyd edib ki, əks təqdirdə Ermənistan ümumiyyətlə mövcud olmaz. “Ermənistan Avrasiya sivilizasiyana aiddir.

Ermənistanın yeri Avrasiyadır, ona başqa yerdə sadəcə olaraq yer yoxdur. Ermənistan ya Avrasiya İttifaqında olacaq, ya da ümumiyyətlə olmayacaq”,-deyə A. Dugin Ermənistanı hədələyib.

Qeyd edək ki, bu ilin may ayının 29-da Astanada Rusiya, Belarus, Qazaxıstan prezidentləri Avrasiya İqtisadi Birliyinin təsis edilməsi ilə bağlı sənəd imzalayıblar. Ermənistanın isə quruma üzvlüyünün oktaybrda reallaşması gözlənilir. Avrasiya Birliyinin 2015-ci ilin ilk aylarından fəaliyyətə başlaması planlaşdırılır.