İranda Türkiyə əleyhinə daha bir etiraz aksiya keçirilib.

Dalgatv-nin APA-ya istinadən verdiyi məlumata görə, aprelin 16-da İran vətəndaşı olan ermənilər BMT-nın Tehrandakı ofisinin binasının qarşısına toplaşıb.

Aksiyada Türkiyə hökumətinin Suriya siyasəti pislənilib, rəsmi Ankaradan bu məsələ ilə bağlı siyasətini yenidən nəzərdən keçirməsi istənilib.

Onlar Türkiyə-Suriya sərhədində yerləşən Kəsəb bölgəsində “ən-Nüsra” üzvlərinin erməni kəndinə həyata keçirdikləri hücumu da qınayıb, rəsmi Ankaradan terrorçuları silah-sursatla təmin etməyi dayandırmağı tələb ediblər.

Nümayişçilər BMT və digər beynəlxalq təşkilatlardan Türkiyənin Suriyada müharibə alovunu körükləyən cəhdlərinin qarşısının alınması bu ölkəyə təzyiq göstərməsini istəyiblər.

Aksiya bəyanatın oxunması və qətnamənin BMT-nin Tehrandakı ofisinə təqdim olunması ilə başa çatıb.

Qeyd edək ki, bir qrup erməni aprelin 15-də də İranın İsfahan şəhərində Türkiyə əleyhinə aksiya keçirib.

"Rusiya neft-qazla yanaşı Ukraynaya terror ixrac etməyə başlayıb".

Bunu Ukrayna baş naziri Arseniy Yatsenyuk Nazirlər Kabinetinin iclasında deyib.

Dalgatv  APA-ya istinadən xəbər verir ki, "Mən belə başa düşürəm ki, artıq Rusiyanın ixrac üçün yeni məhsulu var. Neft və qaz ixracından əlavə Rusiya Ukraynaya terror ixrac etməyə başlayıb. Bu gün dünyada yalnız bir ölkə - Rusiya Ukraynada Rusiyanın təxribatçı qruplarının terror aktları həyata keçirdiyini görmür”, - deyə o vurğulayıb.

Yatsenyuk onu da qeyd edib ki, Rusiya hakimiyyəti son həftələrdə təxribatçıların Ukrayna əsgərlərinə və vətəndaşlarına qarşı törətdiklərinə normal yanaşır:

“Görünür, Vladimir Vladimiroviç yanaşmalarını dəyişib: əgər əvvəllər ayaqyolu haqqında danışırdısa, indi qonşu ölkələrdəki terrorçu qruplaşmalarını dəstəkləyir. Rusiyaya mesajımız odur ki, terrorçuları dəstəkləməyi dayandırsın”.

Suriya prezidenti Bəşər Əsəd ölkədə davam edən vətəndaş müharibəsi ilə bağlı açıqlama verib.

AzNews.az xəbər verir ki, o, üç ildir davam edən bu savaşda Suriya ordusunun üstün olduğunu açıqlayıb. Əsəd həmçinin qeyd edib ki, hazırda Suriyada müharibənin dönüş nöqtəsidir.

Məlumat üçün bildirək ki, Suriyada baş verən ölkədaxili münaqişlərdə indiyə qədər 150 min nəfər dünyasını dəyişib, milyonlarla insan isə ölkəni tərk edib.

Qeyd edək ki, Bəşər Əsədin üçüncü dəfə ölkədə keçiriləcək prezident seçkilərində iştirak edib- etməyəcəyi ilə bağlı qərarı yaxın günlərdə açıqlanacaq.

Ötən ilin noyabr ayında Ukraynada bir yerli vətəndaşın qətlində, birinin isə ağır yaralanmasında təqsirli bilinən azərbaycanlı tələbə Məhəmməd Arzu oğlu Abdullayevin cinayət işi üzrə məhkəmə prosesi başlayıb.

M.Abdullayevin də oxuduğu Odessa Milli Rabitə Akademiyasının beynəlxalq tələbə mübadilə şöbəsinin əməkdaşı, Azərbaycanlı Tələbələr Təşkilatının rəhbəri Həsən Əliyev APA-ya açıqlamasında bildirib ki, artıq məhkəmənin iki iclası olub.

Azərbaycanlı tələbənin son məhkəmə iclasında məhkəmə istintaqı yekunlaşıb və milliyyətcə erməni olan dövlət ittihamçısı (prokuror) çıxışında qətlin milli zəmində baş verdiyini iddia edərək, yerli qanunvericiliyə əsasən M.Abdullayevə ömürlük həbs istəyib. Məhkəmə son qərarı növbəti iclasa saxlayıb.

H.Əliyev qeyd edib ki, məhkəmənin növbəti iclasının tarixi ölkədə baş verən hadisələrlə əlaqədar olaraq naməlum müddətə təxirə salınıb.

Qeyd edək ki, ötən il noyabrın 18-də axşam saatlarında Odessada azərbaycanlı tələbələrin daha çox qaldığı yataqxananın qarşısında baş verən kütləvi dava nəticəsində ölüm hadisəsi qeydə alınıb. Məhəmməd Abdullayev iki-üç azərbaycanlı tələbə ilə hansısa əyləncə mərkəzindən qayıdan zaman yataqxananın qarşısında taksidən düşdükdən sonra yerli sakin olan üç nəfər orta yaşlı şəxs sərxoş halda onların qarşısını kəsib. Nəticədə milli zəmində mübahisə düşüb və əlbəyaxa davaya çevrilib. Bu zaman M.Abdullayev haradansa əldə etdiyi bıçaqla onlardan ikisini bıçaqlayıb. Bıçaq sərxoş şəxslərdən birinin ürəyinə işlədiyi üçün o, yerindəcə ölüb. Hadisədən sonra Məhəmməd Abdullayev oxuduğu Akademiyadan xaric edilib.

"Rusiya Viktor Yanukoviçin Ukraynaya verilməsi üçün əsas görmür".

Dalgatv-nin Trend-ə istinadən verdiyi xəbərə görə, bunu Rusiyanın Baş prokuroru Yuri Çayka bəyan edib.

Baş prokuror Simferopolda deyib: "Bizdə olan məlumata görə, o heç bir cinayət törətməyib və ona görə də onun ekstradisiyası üçün heç bir əsas yoxdur".

Çayka qeyd edib ki, Rusiya əvvəlki kimi Yanukoviçi legitim prezident hesab edir. "Viktor Yanukoviçi legitim prezidentdir. Bu gün Kiyevdəki hakimiyyət isə silahlı çevriliş nəticəsində hakimiyyətə gəlib. Mən bunu hüquqşünas kimi deyirəm".

Yeni Ukrayna hakimiyyəti devrilmiş prezidenti Kiyevin mərkəzində keçirilən etiraz aksiyaları zamanı insanların güllələnməsində iştirakda ittiham edir. Ukrayna MTİ-nin rəhbəri Valentin Nalivayçenkonun bir az əvvəl bildirdiyi kimi, hüquq-mühafizə orqanlarında Yanukoviçin və MTİ-nin sabiq rəhbəri Aleksandr Yakimenkonun tutulmasına məhkəmənin icazəsi var.

Həmçinin Yanukoviçi Ukraynanın cənub-şərqində etiraz aksiyalarının maliyyələşdirilməsində ittiham edirlər.

Ötən gün Vyanada İranla ABŞ arasında ikitərəfli müzakirələr keçirilib.

Dalgatv-nin  APA-ya istinadən verdiyi məlumata görə, İran xarici işlər nazirinin beynəlxalq və hüquqi məsələlər üzrə müavini, baş nüvə müzakirəçisi Seyid Abbas Əraqçı və ABŞ dövlət katibinin müavini Vendi Şerman bir araya gəlib.

Görüşün detalları barədə məlumat verilməsə də, İranın nüvə məsələsi ilə bağlı öz həllini tapmayan mövzularla əlaqədar fikirlərin yaxınlaşdırılması əsas müzakirə mövzusu olub. Bundan əvvəl A.Əraqçı Rusiya və Çin nümayəndələri ilə görüşüb. Eyni zamanda İranla Böyük Britaniya arasında da ikitərəfli nüvə müzakirələri keçirilib.

Qeyd edək ki, aprelin 8-də Vyanada İranla “altılıq” ölkələri arasında mübhaisəli məsələlərin həlli məqsədilə növbəti nüvə müzakirələri başlayıb. İki gün davam edəcək danışıqlar yekun razılaşmanın qaralamasının hazırlanması mərhələsinə daxil olacaq. Müzakirələrdə əsasən üç məsələ ətrafında fikir mübadiləsi aparılacaq, ancaq onların nədən ibarət olduğu açıqlanmayıb. Lakin Ərak ağır su nüvə reaktoru, uranın zənginləşdirilməsinin səviyyəsi, sanksiyaların aradan qaldırılması, dincməqsədli nüvə texnologiyası sahəsində beynəlxalq əməkdaşlıq, Cenevrə razılaşmasına uyğun olaraq Birgə Fəaliyyət Proqramındakı addımlar kimi məsələlər mübahisəli mövzular kimi qalmaqda davam edir. Danışıqlar İran xarici işlər naziri Məhəmməd Cavad Zərif və Avropa Birliyinin (AB) xarici işlər və təhlükəsizlik siyasəti üzrə ali nümayəndəsi Ketrin Eştonun rəhbərliyi altında öz işinə başlayıb, daha sonra müavinlər səviyyəsində davam etdirilib. Bundan bir gün əvvəl M.C.Zərif və K.Eşton işgüzar şam yeməyində bir araya gələrək, ikigünlük danışıqların əsas mövzularını təyin ediblər.