Sentyabrın 10-da Nyu-Yorkda keçirilmiş təntənəli mərasimdə inşaat sahəsində böyük beynəlxalq nüfuza malik “Engineering News Record” jurnalının (ENR) “İlin ən yaxşı inşaat və dizayn layihələri” müsabiqəsinin mükafatları təqdim olunub.

SOCAR-dan “APA-Economics”ə verilən məlumata görə, müsabiqənin “İdman və Əyləncə Qurğuları” nominasiyasında qalib olmuş Bakı Olimpiya Stadionunun layiq görüldüyü mükafat SOCAR-ın sosial məsələlər üzrə vitse-prezidenti Bədəl Bədəlova, layihənin məsul mühəndislərinə, həmçinin struktur üzrə layihəçi Thornton Tomasetti şirkətinin, əsas layihəçi “Heerim Architects and Planners” şirkətinin və podratçı “Tekfen İnşaat və Təchizat” şirkətinin nümayəndələrinə təqdim edilib.

Mərasimdə dünyanın müxtəlif yerlərində inşa olunmuş və digər nominasiyalarda qalib gəlmiş layihələrin sifarişçi, layihəçi, idarəetmə və podratçı şirkətlərinin nümayəndələri iştirak ediblər.

Xəbər verildiyi kimi, bu ilin avqustunda Bakı Olimpiya Stadionu ENR jurnalı tərəfindən “İdman və Əyləncə Qurğuları” nominasiyasında “İlin Ən Yaxşı Layihəsi” elan edilib. ENR jurnalının dünya miqyasında tanınmış ekspertlərdən ibarət münsiflər heyəti müsabiqəyə təqdim olunmuş layihələri təhlükəsizlik, innovasiya, ictimai əhəmiyyət, dizayn və inşaat üstünlükləri baxımından qiymətləndirmiş, eyni zamanda layihəni həyata keçirən şirkətlərin çətinliklərin öhdəsindən necə gəlməsi nəzərə alınıb. Builki müsabiqədə hava limanları, körpü və tunellər, inzibati binalar, mədəniyyət, təhsil və turizm obyektləri, sənaye əhəmiyyətli tikililər də yer alıb.

Jurnalın sentyabr sayında müsabiqənin bütün mükafatçıları, o cümlədən Bakı Olimpiya Stadionu haqqında ətraflı məlumat dərc edilib.

Neftçilər günü ərəfəsində Azərbaycan Dövlət Neft Şirkətinin (SOCAR) prezidenti Rövnəq Abdullayev və şirkət rəsmiləri Bakı şəhərinin Qaradağ rayonu, Sahil qəsəbəsinin Emin Quliyev prospektində tikilmiş iki yeni yaşayış binasının istifadəyə verilməsi ilə bağlı keçirilən mərasimdə iştirak ediblər.

"Dalğa TV"-nin verdiyi xəbərə görə, SOCAR prezidentinə məlumat verilib ki, istifadəyə verilən 1 ədəd 2 bloklu və 1 ədəd 1 bloklu yeni yaşayış binaları 12 mərtəbədən, mansarddan və ümumilikdə, 204 mənzildən ibarətdir.

Binalar bütün kommunal xidmətlərlə təchiz edilib. Ümumi sahəsi 14 109,5 kv. metr ərazini əhatə edən binaların yaşayış sahəsi 8 235,9 kv. metrdir. Bundan başqa, 1 bloklu binanın birinci mərtəbəsində 505,2 kv. metr, 2 bloklu binada isə 963,6 kv. metrlik qeyri-yaşayış sahəsi də var. Binalarda 24 ədəd birotaqlı, 132 ədəd ikiotaqlı, 36 ədəd üçotaqlı və 12 ədəd dördotaqlı mənzil var.

Qeyd olunub ki, binaların eskiz layihəsi Bakı Şəhər İcra Hakimiyyətinin Memarlıq və Şəhərsalma Baş İdərəsi ilə razılaşdırılıb, inşaat işlərinə isə FHN-in rəyi əsasında 2014-cü ilin yanvar ayında başlanılıb. Binaların istilik sistemi mərkəzləşmiş qazanxana ilə əlaqələndirilib. Ərazidə 2 ədəd 300 kubmetrlik hovuz tikilib ki, bu da sakinlərin daimi olaraq isti və soyuq su ilə təchizatına zəmin yaradır. Binalarda Cənubi Koreya istehsalı olan yük və sərnişin liftləri quraşdırılıb. İnşaat işlərinin podradçısı isə “Tikinti-Quraşdırma ANKZ-2” ASC olub. Binaların ətrafı abadlaşdırılıb, sakinlərin səmərəli istirahətinin təşkili üçün şərait yaradılıb.

Sakinlər qarşısında çıxış edən R.Abdullayev qarşıdan gələn Neftçilər günü münasibətilə çoxminli neftçilər ordusunu, bütünlüklə Azərbaycan xalqını təbrik edib. O, SOCAR-ın idarə və müəssisələrində çalışan işçilərin sosial problemlərinin həllinin hər zaman diqqət mərkəzində olduğunu bildirib, bu sahədə mühüm sosial proqramların həyata keçirildiyini vurğulayıb. Daha sonra R.Abdullayev yeni binanın rəmzi qırmızı lentini kəsərək, onu müşayiət edən şəxslərlə birlikdə mənzilləri gəzib, neftçilərin yaşayışı üçün yaradılmış şəraitlə tanış olub. SOCAR prezidenti neftçilərə mənzillərin order və açarlarını təqdim edib.

Gürcüstanın milli valyutası - larinin devalvasiyasıdaxili bazarda ajiotajasəbəb olub.

Ölkənin baş naziri İrakli Qaribaşvili larinin məzənnəsinin minimal həddə düşdüyünü, artıq böhranın əsas mərhələsinin geridə qaldığını və bundan sonra vəziyyətin sabitləşəcəyini vurğulayıb.

İ.Qaribaşvili xalqı təşvişə düşməməyə, sakitliyi qorumağa və yanlış ajiotaja yol verməməyə çağırıb.

Baş nazir həmçinin media nümayəndələrini larinin məzənnəsi ilə bağlı məsuliyyətsiz bəyanatlar və xəbərlər yaymaqda ittiham edib. O, bu tip xəbərlərin xalqa zərər verəcəyini bildirib.

Qeyd edək ki, lari keçən ilin noyabr ayından zəifləməyə başlayıb. Yay mövsümündə larinin məzənnəsi sabitləşsə də, iyul ayının ortalarından yenidən azalma başlayıb və dolların məzənnəsi 2,25 lari, avqustda isə 2,30-2,35 lariyə çatıb, sentyabr ayı ərzində isə 2,44 GEL/USD-yə kimi geriləyib.

 "Azərbaycan ixracımız baxımından bizim üçün mühüm ölkədir. Biz neftimizin təxminən 30 faizini Azərbaycandan idxal edirik".

"Dalğa TV"  xəbər verir ki, bu sözləri sentyabrın 15-də Bakıda səfərdə olan Çexiya prezidenti Miloş Zeman Azərbaycan prezidenti İlham Əliyev ilə keçirdiyi birgə mətbuat konfransında deyib.

Bununla belə, o qeyd edib ki, Azərbaycan digər səbəblərə görə də onlar üçün yaxın ölkədir:

"Əhalimizin sayı demək olar ki, eynidir. İqtisadi artım tempi kifayət qədər məqbuldur. İşsizliyin səviyyəsi isə aşağıdır. Lakin bir məsələni də qeyd etmək istərdim. Prezident Əliyev təvazökarlıq baxımından onu demədi. Azərbaycan öz öhdəliklərini yerinə yetirən ölkədir. Sizi əmin edə bilərəm ki, Azərbaycanda olan əla maliyyə durumu heç də bütün ölkələrdə yoxdur. Mənə bildirildi ki, Azərbaycan ərazisində apardığımız fəaliyyətin sığortalanmasına gəldikdə, heç bir işin pozulması və ya sığorta halı olmayıb. Cənab Prezident, mən bunu yüksək dəyərləndirirəm. Bütün bunlar hamıya aydın olan, lakin adı çəkilməyən ölkələrlə müqayisədə Azərbaycana olan etimadı daha da artırır.

Miloş Zeman bildirib ki, "biz, həmçinin bir sıra iqtisadi və ticari məsələləri müzakirə etdik".

"Qeyd etmək istərdim ki, Çex iş adamları Bakı-Tbilisi-Qars dəmir yolu xəttinin birinci mərhələsinə uğurla sərmayə qoyublar. Artıq tikintinin ikinci mərhələsi başlayır. Ümidvaram ki, bu sahədə də əməkdaşlığımız uğurlu olacaq. İnfrastruktur baxımından bu layihə kifayət qədər genişmiqyaslıdır. Azərbaycanın ikinci şəhəri Gəncənin icra hakimiyyətinin başçısı şəhər nəqliyyatı, o cümlədən aşağı gərginlik tramvayları ilə bağlı Çex Respublikasına müraciət edib. Çünki heç kəsin xətrinə dəyməmək üçün bildirim ki, adı çəkilməyən ölkənin verdiyi ilk təklif qəbuledilməz idi. Çexiyanın təklifi daha münasib oldu. Əlbəttə ki, işlədiyimiz ənənəvi sahələr, xüsusən də müdafiə sənayesi, eləcə də Azərbaycanın polis qüvvələri üçün istər radar, istərsə də digər silah növləri baxımından əməkdaşlığa hazırıq".

Çexiya prezidenti vurğulayıb ki, "iki ölkə arasında imzalanmış sənəddə göstərildiyi kimi, biz kənd təsərrüfatı sahəsində əməkdaşlığa açığıq. Bildiyimiz qədər, bu sahədə Azərbaycan öz məhsullarının bir hissəsini ixrac edir və bu baxımdan özünü təmin edən ölkədir. Bundan əlavə, onlarla digər nümunə gətirə bilərəm. Lakin, fikrimcə, onlar haqqında biz sabah biznes forumda söhbət aça biləcəyik. Hamınızı həmin tədbirdə görməyi arzulayıram. Sabah bu haqda daha dolğun danışacaq şəxsləri qabaqlamaq istəməzdim".

O yekun olaraq bildirib ki, "mən cənab prezidenti Çexiyaya səfərə dəvət etdim. Qeyd edim ki, prezidentin rəhbərliyi altında Çex Respublikasına da bir sıra Azərbaycan sərmayələri qoyulsa, çox şad olaram".

Onun sözlərinə görə, Çexiyada mehmanxanalar və kurortlar, investisiya baxımından digər münasib məkanlar var.

"Tam əmin ola bilərsiniz ki, Çexiyada qoyulmuş maliyyə sərmayələri özünü doğruldacaq. Çex Respublikası bu baxımdan Mərkəzi Avropada kifayət qədər təhlükəsiz yerdir. Təbii ki, digər tədbirlər çərçivəsində də görüşəcəyik. Lakin Praqada gələcək görüşümüzü səmimiyyətlə arzulayıram. İnanıram ki, bu görüş baş tutacaq və həmin görüşdə atılmış yeni iqtisadi addımları qeyd edə biləcəyik".

SOCAR “Palmali Holding”in sahibi, azərbaycanlı iş adamı Mübariz Mənsimova məxsus “Palmarina”nın alınması məqsədilə danışıqlar aparılması haqqında məlumatları təkzib edib.

SOCAR-ın mətbuat xidmətindən APA-ya verilən məlumatda deyilir ki, Türkiyənin bəzi media şəbəkələrində “Palmali Holding”in sahibi, azərbaycanlı iş adamı Mübariz Mənsimova məxsus “Palmarina”nın SOCAR tərəfindən alınması məqsədilə guya danışıqlar aparılması haqqında məlumatlar yayılıb.

"SOCAR-ın mətbuat xidməti bildirir ki, bu məlumat tam əsassızdır, hazırda şirkətimiz tərəfindən belə bir investisiya layihəsi nəzərdən keçirilmir, gündəliyimizdə belə bir məsələ yoxdur", - deyə məlumatda deyilir.

 Azərbaycan Dövlət Neft Şirkəti (SOCAR) bu ilin yanvar-avqust aylarında dövlət büdcəsinə 998,758 mln. manat həcmində vəsait ödəyib.

"Dalğa TV" şirkətə istinadən xəbər verir ki, bu həcmin 124,503 mln. manatı avqust ayının payına düşür.

Bu ilin yanvar-avqust aylarında büdcəyə ödənilən vəsait ötən ilin analoji dövründən 21% az olub. Avqustda isə azalma 16,5% təşkil edib.

Qeyd edək ki, avqust ayında SOCAR Dövlət Sosial Müdafiə Fonduna (DSMF) 11,477 mln. manat vəsait köçürüb. Bütövlükdə isə bu ilin yanvar-avqust aylarında şirkət tərəfindən DSMF-yə ödəniş 92,434 mln. manat təşkil edib. DSMF-yə ödənilən vəsait isə ötən ilin analoji dövründən 3,6% az olub.