Bakı-Tbilisi-Qars dəmir yolu layihəsi 2017-ci ilin birinci rübündə istismara veriləcək. "APA-Economics" "TRT Haber" telekanalına istinadən xəbər verir ki, bunu Türkiyənin baş naziri Binəli Yıldırım gürcüstanlı həmkarı Georgi Kvirikaşvili ilə görüşü zamanı bildirib.

Onun sözlərinə görə, layihə tamamlanmaq üzrədir.

Öz növbəsində G. Kvirikaşvili qeyd edib ki, Bakı-Tbilisi-Qars layihəsi Türkiyə, Gürcüstan və Azərbaycan arasında mövcud olan əməkdaşlığın vacib elementidir.

Bu gün Azərbaycan Dövlət Neft Şirkəti (SOCAR) ilə neft-kimya sənayesində mühüm texnologiyalara sahib olan “Technip”, “Univation”, “Axens” və “SinopecTech” şirkətləri arasında texnologiya lisenziyası müqavilələri imzalanıb. 

"Report" SOCAR-a istinadən xəbər verir ki, müqavilələr “SOCAR GPC” layihəsi çərçivəsində müasir texnologiyaların tətbiq olunması ilə təbii qazın mükəmməl emalı və yüksək keyfiyyətli polimer məhsulları istehsal edilməsi məqsədilə bağlanıb. 

Müqavilələrə əsasən, SOCAR həmin layihə çərçivəsində müvafiq texnologiyalardan istifadə lisenziyasını əldə edir, lisenziya verən şirkətlər isə Bakının 15 kilometrliyində, Qaradağda tikiləcək qaz emalı və qaz-kimya zavodları üçün müvafiq mühəndislik və dizayn həllərini SOCAR-a təqdim edirlər.

Tədbirin əvvəlində dekabrın 15-də “Azneft” İstehsalat Birliyinin N.Nərimanov adına NQÇİ-də baş vermiş hadisə nəticəsində itkin düşən neftçilərin, eləcə də 4 ölkənin səfirinin tədbirdə iştirak etdiyini nəzərə alaraq, dünən onların terror aktı nəticəsində faciəli surətdə həlak olmuş həmkarları - Rusiya Federasiyasının Türkiyədəki fövqəladə və səlahiyyətli səfiri Andrey Karlovun xatirəsi bir dəqiqəlik sükutla yad olunub.

“SOCAR GPC” layihəsi haqqında qısa videoçarxın nümayişindən sonra SOCAR-ın prezidenti Rövnəq Abdullayev iştirakçıları salamlayaraq, Azərbaycanda həyata keçirilən yeni enerji strategiyasının nailiyyətlərindən, bu strategiya çərçivəsində reallaşdırılan regional və beynəlxalq əhəmiyyətli layihələrin uğurundan və həmin layihələrin icrasında xarici şirkətlərlə SOCAR arasında yaranmış sıx əməkdaşlıq münasibətlərindən danışıb. Bildirilib ki, hazırda Azərbaycan dünyanın enerji təhlükəsizliyi üçün mühüm əhəmiyyət daşıyan bir sıra layihələrin təşəbbüskarı və əsas iştirakçısıdır. “Şahdəniz-2” layihəsi çərçivəsində hasil olunacaq təbii qaz ehtiyatlarının Avropaya nəqli üçün Cənub Qaz Dəhlizi çərçivəsində Trans-Anadolu və Trans-Adriatik qaz boru kəmərlərinin tikintisinin beynəlxalq əhəmiyyətini qeyd edən SOCAR prezidenti daha sonra şirkətin Azərbaycanda və Türkiyədə həyata keçirdiyi iri investisiya layihələrindən söz açıb, bu layihələrin maliyyələşdirilməsində və icra olunmasında iştirak edən xarici şirkətlərin rolunu vurğulayıb. Bugünkü tədbirlə “SOCAR GPC” layihəsinin həyata keçirilməsinə start verildiyini diqqətə çatdıran R.Abdullayev layihə iştirakçılarına uğurlar arzulayıb, tədbirdə iştirak etdikləri üçün ABŞ, Fransa, İtaliya və Çinin Azərbaycandakı səfirlərinə təşəkkürünü bildirib.

Sonra layihənin iştirakçıları - “Sinopec” şirkətinin baş menecerinin texniki məsələlər üzrə müavini Ju Yinquan, “Univation Technologies” şirkətinin prezidenti Stiv Stenli, “Axens” şirkətinin satışlar üzrə direktoru Fabyen Lundi, “Technip EMİA” şirkətinin prezidenti Marko Villa, “China Huanqiu Contracting&Engineering; Corporation” - HQC şirkətinin icraçı vitse-prezidenti Janq Laiyonq, “Fluor” şirkətinin vitse-prezidenti və mühəndislik və tikinti üzrə baş regional meneceri Mark van Heyningen çıxış ediblər.

Bildirilib ki, Azərbaycan üçün mühüm əhəmiyyət kəsb edən bu layihənin Çinin İpək Yolu İqtisadi Kəməri layihəsi çərçivəsində maliyyələşdirilməsi planlaşdırılır. “SOCAR GPC” layihəsi Azərbaycanda hasil edilən təbii qaz və qaz-kondensat xammalının emalı, C2+ fraksiyalarının polimerləşməsi, əldə olunan polietilen və propilen məhsullarının Türkiyə, Qərbi Avropa və Çin kimi ölkələrə ixrac edilməsini nəzərdə tutur. Polietilen məhsullarının ixracına 2022-ci ildə başlanılması proqnozlaşdırılır.

Yeni layihə şərçivəsində illik istehsal gücü 10 mlrd. m3 olan qaz emalı zavodu və qaz-kimya zavodunun (bu zavodların həmin seqmentlər üzrə dünyadakı ən böyük müəssisələrdən olması nəzərdə tutulur) inşa edilməsi, qaz-kimya zavodunun tərkibində fəaliyyət göstərəcək istehsal gücü ildə 610 min ton olan qazla işləyən piroliz qurğusunun, istehsal gücü ildə 600 min ton olan polietilen qurğusunun, habelə Buten-1 və Hexen-1 qurğularının quraşdırılması, həmin zavod və qurğulara xidmət göstərmək üçün ümumzavod təsərrüfatı və yeni İstilik Enerji Mərkəzinin yaradılması planlaşdırılıb. “SOCAR GPC” layihəsinin mühəndis-konstruktor və tikinti işlərinin dünyanın aparıcı lisenziarları tərəfindən hazırlanan layihələr əsasında Azərbaycan şirkətlərinin dəstəyi ilə mühəndislik, satınalma və tikinti layihələri sahəsində geniş təcrübəsi olan HQC şirkəti tərəfindən həyata keçirilməsi nəzərdə tutulub.

Müqavilələri SOCAR tərəfdən şirkətin prezidenti Rövnəq Abdullayev, qarşı tərəflərdən - “Sinopec” şirkətinin baş menecerinin texniki məsələlər üzrə müavini Ju Yinquan, “Univation Technologies” şirkətinin prezidenti Stiv Stenli, “Axens” şirkətinin satışlar üzrə direktoru Fabyen Lundi, “Technip EMİA” şirkətinin prezidenti Marko Villa imzalayıblar.

Tədbirdə ABŞ-ın Azərbaycandakı səfiri Robert Sekuta, Fransanın Azərbaycandakı səfiri Aurelia Bouchez, İtaliyanın Azərbaycandakı səfiri Giampaolo Cutillo və Çinin Azərbaycandakı səfiri Hong Jiuyin iştirak ediblər. 

Acarıstan Muxtar Respublikasının ərazisindən keçən magistral qaz kəmərində yaranmış problem tam aradan qaldırılıb. Qəza nəticəsində Batumi və Xelvaçauri bölgələrində “mavi yanacaq"sız qalmış 50 minə yaxın abonentin hamısına təbii qazın verilməsi bərpa olunub.

Bu fikirləri “Report”a “SOCAR Georgia Gas” şirkətinin Batumi üzrə nümayəndəsi David Likişvili söyləyib.

Onun sözlərinə görə, texniki səbəblərdən baş vermiş qəzanın nəticələri tam aradan qaldırlıb, magistral kəmər qazla doldurulub, abonentlərin hamısına təbii qazın verilməsi bərpa olunub.

Qeyd edək ki, dekabrın 15-dən 16-na keçən gecə Acarıstan ərazisində magistral qaz kəmərində təmir işləri aparılan zaman kiçik qəza baş vermişdi. Nəticədə Batumi və Xelvaçauri bölgələrində 50 minə yaxın abonentin qaz təchizatı dayandırılmışdı.

Bakını dünyanın əsas turizm mərkəzlərindən birinə çevirmək üçün atılacaq addımlar açıqlanıb.

"Dalğa TV" APA-ya istinadən xəbər verir ki, bu, Azərbaycan prezidenti İlham Əliyevin 6 dekabr 2016-cı il tarixli fərmanı ilə təsdiq edilmiş "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"ndə əksini tapıb.

Milli Turizm Təbliğat Bürosu ilk növbədə Bakı şəhərinə daha çox turist cəlb etmək üçün onlayn məlumat platforması yaradacaq və onu işçi heyət ilə təmin edəcək. Turizmlə bağlı düzgün qərarların verilməsi məqsədilə məlumatların toplanması üçün onlayn alətlərdən istifadənin artmasını nəzərə alaraq, işçi heyət Bakı və əsas onlayn səyahət və məlumat platformaları (məsələn, "Trip Advisor", "Four Square", "Lonely Planet" və s.) ilə əlaqədar lazımi məlumatların (məsələn, şəkil, şərh, təlimatlar və s.) prioritet hesab olunan ingilis, rus, türk, ərəb, fars və digər dillərdə tərtib olunmasını təmin edəcək. Bakı şəhərinə gələn və oradan regionlara səfər edən turistlərin məlumatlılığının artırılması üçün bir sıra tədbirlərin görülməsi Bakı və Qəbələdəki hava limanları prioritetləşdirilməklə orada yerləşən turizm məlumat ofislərinin fəaliyyət dairəsi genişləndiriləcək və sayı artırılacaq.

Turizm məlumat ofisləri Büro ilə əməkdaşlıq çərçivəsində və onun vəsaitlərindən istifadə edərək turistlər üçün Bakı və ətraf ərazilərlə bağlı (4 saatlıq məsafə) ingilis, fars, ərəb, türk və rus dillərində olan broşür və məlumat materialları nəşr edəcək və avtobus dayanacaqları, metro stansiyaları və hava limanlarında bu materialların paylanmasını təmin edəcək. Bu ofislərdə hazırda Azərbaycan dilində mövcud olan xəritə və ictimai nəqliyyata dair məlumat materialları da həmin dillərdə hazırlanaraq nəşr ediləcək. Turistlərin Bakı şəhərinə səfərlərini öz istəklərinə uyğun planlaşdırmaları və şəhərdə təklif edilən bütün imkanlardan tam aydalanmaları üçün bu materiallar, həmçinin mehmanxanalara, ticarət mərkəzlərinə, mühüm turizm məkanlarına və digər yerlərə də təklif ediləcək.

Bakı şəhərinin mühüm turizm sahələrinin cəlbediciliyini daha da artırmaq məqsədilə ölkə ərazisinə daxil olduqları zaman hava limanlarında və vağzallarda turistlərə muzeylərə aid həm vauçerlər, həm də endirimli biletlər təklif ediləcək. Bakıda şəhər gəzintisi təşkil edən şəhər turu nəqliyyat xidmətləri də vaxt, səmərəlilik və əhatə dairəsi baxımından təkmilləşdiriləcək və bu xidmətlər təcrübəli tur bələdçiləri, eləcə də rus və ingilis dillərində səsləndirilən audio yazılar da əlavə edilməklə zənginləşdiriləcək. Bakının ətraf qəsəbələrindəki "Yanardağ" Dövlət Tarix-Mədəniyyət və Təbiət Qoruğu, "Qobustan" dövlət tarixi-bədii qoruğu və palçıq vulkanları kimi turizm məkanları da bu avtobusların əhatə dairəsinə daxil ediləcək.

Büro işlərini xarici və yerli turoperatorlar ilə əlaqələndirərək Novruz bayramı ərəfəsində yerləşdirmə vasitələri və təyyarə biletlərini əhatə edən turist xidmət paketlərinin hazırlanmasını təşviq edəcək. Bundan əlavə, Azərbaycanın, əsasən də Bakının Novruz bayramı ərəfəsində cəlbediciliyini artırmaq məqsədilə çərşənbə axşamlarında və bayram zamanı açıq havaaltında festivallar, Azərbaycan və regiondakı qonşu ölkələrdən folklor musiqi ifaları və Novruz süfrələri ətrafında fəaliyyətlər təşkil ediləcək və həmin tədbirlərdə iştirak da bu paketlərə əlavə ediləcək. Mədəniyyət və Turizm Nazirliyi dövlət və özəl sektorun nümayəndələri ilə əməkdaşlıq edərək Bakı turizm tədbirləri təqviminə uyğun olaraq, ticarət festivalını təşkil edəcək. Bu tədbirlərə pərakəndə ticarət, bədii tamaşalar, paradlar, Naftalan nefti və Naxçıvan Muxtar Respublikasının duz dağı ilə bağlı seminarların təşkili kimi digər turizm tədbirləri də daxil ediləcək. Festivalda sənətkarların hazırladığı mis məmulatlar kimi Azərbaycan məhsullarının təklifinə də xüsusi önəm veriləcəkdir.

Bu prioritetin tətbiqinin 2020-ci ildə real ÜDM-in artımına birbaşa 30 milyon manat, dolayı şəkildə 20 milyon manat olmaqla, ümumilikdə 50 milyon manat təsir edəcəyi, eləcə də 2020-ci ildə ümumilikdə 8500 olmaqla, bilavasitə turizm sektorunda 6100 yeni iş yerinin açılacağı proqnozlaşdırılır. Bakıda mehmanxanalarda və mehmanxanatipli müəssisələrdə yerləşdirilmiş xarici turistlərin sayının 2015-ci il üzrə hesablanmış 0,5 milyon nəfərdən 2020-ci ildə 0,9 milyon nəfərədək, hər turistin orta qalma müddətinin 2 gündən 3 günədək artacaq. Ümumi daxili məhsulun, əsasən ölkədə daha uzun müddət qalan turistlərin istirahət və əlavə yerləşmə vasitələrinə xərclədikləri vəsaitdən yaranacağı ehtimal olunur. Gündəlik xərclərin real şərtlər üzrə hər bir şəxs üçün 195 manat qalacağı ehtimal olunur.

Bu nəticəyə nail olmaq üçün, yəni turistlərə göstərilən xidmətin keyfiyyətinin artırılması, turist xidmət paketlərinin hazırlanması və festivalların keçirilməsi məqsədilə 15 milyon manat birdəfəlik investisiya tələb edilir. Hədəf ölkələrdən Bakıya gələn turist sayındakı potensial artım nəzərə alınmaqla, bu prioritetin 2020-ci ildə 150 milyon manat birbaşa, 80 milyon manat dolayı olmaqla, ümumilikdə real ÜDM-də 230 milyon manat artıma səbəb olacağı proqnozlaşdırılır. Bu təsirə ailə səfərləri üzrə turistlərin gəlişi daxil deyil. Eyni zamanda turistlərin sayındakı artımın 2020-ci ildə ümumilikdə 16000 olmaqla, bilavasitə turizm sektorunda 11500 yeni iş yerinin açılmasına səbəb olacağı proqnozlaşdırılır.

Azərbaycan Mərkəzi Bankı (AMB) manatın bu günə olan rəsmi məzənnəsini açıqlayıb.

AMB-dən "APA-Economics"ə verilən məlumata görə, bu gün ABŞ-ın milli valyutası olan dolların məzənnəsi dekabrın 13-ü ilə müqayisədə 0,26% artaraq 1,7475 manat təşkil edib.
Avro da manata nisbətən bahalaşıb. Avrozonanın vahid valyutası 0,3% möhkəmlənərək 1,8590 manat olub.
Əsas ticarət tərəfdaşlarımızdan biri olan Rusiyanın milli valyutası rubl 0,35% bahalaşaraq 0,0287 manata çatıb.
Türkiyə lirəsinin məzənnəsi 0,14% zəifləyərək 0,5007 manat təşkil edib.
Rəsmi məzənnəyə əsasən, 1 ingilis funt sterlinqi 2,2116 manatdır. Beləliklə, funt sterlinqin 0,12%-lik bahalaşması baş verib.

Gürcüstan larisinin məzənnəsi isə 0,68% geriləyərək 0,6570 manat olub.

Azərbaycanlıların kompakt yaşadığı Gürcüstanın Marneuli rayonundan "Marneuli 500" adlı elektrik yarımstansiyasının açılış mərasimi keçirilib.

APA-nın Gürcüstan bürosunun məlumatına görə, Gürcüstanın baş naziri Georgi Kvirikaşvili yarımstansiyanın böyük əhəmiyyətə malik olduğunu bildirib: "Bu yarımstansiya yerli sahibkarlıq subyektləri üçün, xüsusilə emal müəssisələrinin tikintisi üçün vacib bir obyektdir. "Marneuli 500" "Regional enerji təchizatının yaxşılaşdırılması" layihəsi çərçivəsində həyata keçirilib. Bu investisiya layihəsi ölkəmizin enerji təhlükəsizliyini yaxşılaşdıracaq".

Gürcüstanın energetika naziri Kaxa Kaladze APA-ya açıqlamasında yeni istifadəyə verilən yarımstansiya qonşu ölkələr arasında idxal, ixrac və tranzit üçün əsas enerji təsislərindən biri olacağını bildirib: "Bu yarımstansiyaya Azərbaycandan və digər qonşu ölkələrdən elektrik enerjisi nəql olunur və burdan Tiflisə nəql olunacaq, ehtiyac olduğu halda isə Türkiyəyə də ixrac olunacaq. Bundan başqa, biz ölkə üzrə əsas enerji sistemini modernləşdirmək istəyirik. Bunun işlərin həyata keçirilməsi üçün 735 mln. avronun ayrılması təsdiqlənib. İşlər 2017-2027-ci illəri əhatə edəcək".

Gürcüstanın "Dövlət Elektrik İdarə Edilməsi Sisteminin sədri Sulxan Zumburidze isə qeyd edib ki, "Marneuli 500" yarımstansiyasının tikintisinə Asiya İnkişaf Bankının maliyyə dəstəyi ilə reallaşıb və layihəyə 20 mln. dollar xərclənib.