Bu ilin fevral ayında SOCAR tərəfindən dövlət büdcəsinə 134 mln. 471 min manat vəsait ödənilib.

“APA-Economics”in SOCAR-ın açıqladığı rəqəmlərə istinadən verdiyi məlumata görə, bu göstərici 2016-cı ilin fevral ayı ilə müqayisədə 36 mln. 271 min manat və ya 36,93% çox olub.

Ümumiyyətlə, bu ilin yanvar-fevral aylarında büdcəyə 262 mln. 658 min manat vəsait ödənilib ki, bu da ötən ilin analoji dövrü ilə müqayisədə 46 mln. 776 min manat və ya 21,66% çox olub.

Bundan əlavə, bu ilin fevral ayında SOCAR Dövlət Sosial Müdafiə Fonduna (DSMF) 12 mln. 656 min manat vəsait köçürüb. Bu, ötən ilin müvafiq dövrünə nisbətən 1 mln. 734 min manat və ya 15,87% çox olub.

Bu ilin yanvar-fevral aylarında SOCAR tərəfindən DSMF-yə ödəniş 25 mln. 163 min manat təşkil edib ki, bu da 2016-cı ilin yanvar-fevral ayları ilə müqayisədə 4 mln. 113 min manat və ya 19,54% çox olub.

"SOCAR Türkiye Enerji" "Petkim Petrokimya Holding A.Ş."-dəki ümumi dəyəri 87,912  mln. lirə olan payını satıb.

"APA-Economics" şirkətin yaydığı məlumata istinadən xəbər verir ki, birjada satılan səhmlərin nominal dəyəri 4,44 lirə, səhmlərin sayı isə 19,8 mln. ədəddir.

"Bununla da "SOCAR Türkiye Enerji"nin birbaşa və dolayı payını 52,32%-dən 51%-dək azalıb. "SOCAR Türkey Petrokimya A.Ş."-nin ümumilikdə "Petkim"də sahibi olduğu 51%-lik payında heç bir dəyişiklik olmayıb, birbaşa sahib olduğumuz səhmlər 1,32%-dən 0%-ə düşüb", - deyə şirkətin açıqlamasında deyilir.

Ötən il dekabrın 15-də Xəzər dənizində 41 metr/saniyə sürəti ilə əsən güclü külək nəticəsində SOCAR-ın “Azneft” İstehsalat Birliyinin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin sağ və sol hissəsində yerləşən estakadanın uzunluğu təqribən 150 metr olan hissəsini dənizə uçurub. "Azneft"dən "APA-Economics"ə verilən məlumata görə, qəza nəticəsində Neft Yığım Məntəqəsinin növbədə olan 5 nəfər və yaşayış budkasında olan 5 nəfər (cəmi 10 nəfər) əməkdaşı itkin düşüb. Hadisə baş verən andan etibarən müvafiq orqanlar tərəfindən axtarış-xilasetmə işlərinə cəlb edilib.

Həmçinin, Azərbaycan prezidentinin 16 dekabr 2016-cı il tarixli sərəncamına əsasən Dövlət Dəniz Administrasiyasının Gəmilərin Hərəkətinin İdarəolunması Milli Mərkəzində Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, Dövlət Dəniz Administrasiyası, SOCAR və Azərbaycan Xəzər Dəniz Gəmiçiliyi QSC-nin aparıcı mütəxəssislərindən ibarət tərkibdə yaradılan Qərargah tərəfindən təsdiq edilən plana uyğun olaraq, müəyyən edilən sektorlar üzrə axtarış-xilasetmə əməliyyatları davam etdirilir.

Eyni zamanda, itkin düşən neftçilərə operativ məlumat vermək məqsədilə N.Nərimanov adına NQÇİ-də qərargah yaradılıb. Qərargah yarandığı andan "Azneft"in nümayəndələri və rəhbərliyi tərəfindən itkin düşmüş neftçilərin ailə üzvləri və yaxınları qəbul edilib, baş vermiş qəza zamanı itkin düşənlərin axtarışı ilə əlaqədar görülən tədbirlər haqqında onlara mütəmadi olaraq  məlumatlar verilib. İtkin düşmüş neftçilərin ailələri ilə əlaqə saxlanılması məqsədi ilə telefon nömrələri qərargahda qeydə alınıb. Qərargah üzvləri itkin düşmüş hər bir neftçinin ailəsinə baş çəkmiş, onlara, aparılan axtarışlar haqqında məlumatlar verilib, sosial məişət şəraitləri və problemləri ilə maraqlanıblar.

Bütün bunlarla yanaşı, qəza nəticəsində itkin düşənlərin ailələrinə SOCAR və müvafiq dövlət qurumları tərəfindən müxtəlif maddi yardımlar göstərilib. Bu yardımlar kateqoriyasına görə, SOCAR tərəfindən iki dəfə olmaqla 9 ailəyə hər dəfə 1000 manat ümumilikdə, 2000 (iki min) manat maddi yardım göstərilib. İtkin düşənlərdən ilk tapılan vəfat etmiş neftçi İlham Qafarovun ailəsinə isə 3000 min manat maddi yardım göstərilib.

Bundan başqa, SOCAR-ın 28.12.2016-cı il tarixli sərəncamına əsasən hər bir ailəyə 5000 manat maddi yardım göstərilib. Bundan əlavə, Azərbaycan Neft və Qaz Sənayesi İşçiləri Həmkarlar İttifaqının Respublika Komitəsi tərəfindən hər bir ailəyə 1000 manat, N.Nərimanov adına NQÇİ-nin Həmkarlar İttifaqı Komitəsi tərəfindən 500 manat məbləğində maddi yardım göstərilib.

17.01.2017-ci il tarixli sərəncama əsasən, itkin düşmüş neftçilərdən Abasov Ramiz Qulu oğlunun 2 övladı, Əsədov Samir Atabala oğlunun 3 övladı, Zülfüqarov Güloğlan Hacıbala oğlunun 3 övladı, Zülfüqarov Azay Hacıbala oğlunun 2 övladı, ümumilikdə, 10 nəfər uşaq N.Nərimanov adına NQÇİ tərəfindən himayəyə götürülüb.

“Azneft”in N.Nərimanov adına Neft və Qazçıxarma İdarəsinin 1 saylı NQÇS-nin 3 saylı Neft Yığma Məntəqəsinin işçilərinin banklara olan qalıq borclarının ödəniş gününə hesablanaraq ödənilməsi təmin edilib:

-        itkin düşmüş 5-ci dərəcəli əmtəə operatoru Cavid Həyətxan oğlu Bəhrəmovun – “Dəmir Bank” ASC-yə 7000 (yeddi min) manat, “Unibank” Kommersiya Bankına 3 063,00 ABŞ dolları ödənilib.

- itkin düşmüş 5-ci dərəcəli əmtəə operatoru Samir Atabala oğlu Əsədovun - “Unibank”a 258 manat, “Bank of Baku”ya 173 manat;

- itkin düşmüş 4-cü dərəcəli əmtəə operatoru Azay Hacıbala oğlu Zülfüqarovun həyat yoldaşı Zülfüqarova Çimnaz Qaraş qızına 12 oktyabr 2016-cı il tarixli 58 saylı müqavilə ilə “Sumqayıt” Mənzil Tikinti Kooperativindən Sumqayıt şəhəri, S. Vurğun küçəsində tikilməkdə olan yaşayış binasından 63,7 kv.m. sahəsi olan 2 otaqlı ayrılmış mənzilə görə “Sumqayıt” Mənzil Tikinti Kooperativinə 38 800 (otuz səkkiz min səkkiz yüz) manat qalıq dəyərinin ödəniş gününə hesablanaraq ödənilməsi təmin edilib.

Əlavə olaraq, cəsədləri tapılmış itkin düşən neftçilərin dəfn mərasiminin təşkili məsələləri “Azneft” İstehsalat Birliyi tərəfindən həyata keçirilmiş və bir sıra maddi yardımlar göstərilib.

27.12.2016-cı il tarixində Qafarov İlham Əlhüseyin oğlunun həyat yoldaşı Qafarova Rəsmiyyə N.Nərimanov adına NQÇİ-nin rəisinə ərizə ilə müraciət etmiş və ona DFGK tərəfindən 31.12.2016-cı il tarixli  protokolla bir dəfəlik 2100 manat məbləğində yardım göstərilib.

SOCAR 17.01.2017-ci il tarixli sərəncamına əsasən vəfat etmiş Hacıəliyev Həsənağa Hüseynağa oğluna “Neftçi” MTK-dan ayrılmış mənzilə görə, H.Hacıəliyev “Xalq Bank” ASC arasında bağlanmış kredit müqaviləsi üzrə 11.01.2017-ci il tarixinə olan 31 min 939,33 manat məbləğində qalıq borcu “Azneft” İB tərəfindən “Xalq Bank” ASC-yə ödənilməsi təmin edilib.

SOCAR 20.02.2017-ci il tarixli sərəncamına əsasən Hacıəliyev Həsənağa Hüseynağa oğluna “Unibank”a 434 manat, ”Bank of Baku”ya 5630 manat, “Bank of Baku” (“Bolkart”) 1060 manat, “Azərbaycan Beynəlxalq Bank” ASC-nin Qaradağ filialına 9998 manat məbləğində  kredit borcları ödənilib.

10.02.2017-ci il tarixində Hacıəliyev Həsənağa Hüseynağa oğlunun həyat yoldaşı Hacıəliyeva Zenfira Qırxlar qızı  N.Nərimanov adına NQÇİ-nin rəisinə ərizə ilə müraciət edib və ona DFGK tərəfindən 28.02.2017-ci il tarixli  protokolla bir dəfəlik 2320 manat məbləğində yardım olunub.

Cəsədləri tapılan dörd neftçinin hamısının dəfn mərasimlərində “Azneft” İB-nin və N.Nərimanov adına NQÇİ-nin kollektivi iştirak edib.

Türkiyənin nəqliyyat, dənizçilik və kommunikasiya naziri Əhməd Arslan Bakı-Tbilisi-Qars dəmir yolu layihəsi çərçivəsində inşaat işlərinin nə zaman başa çatacağını açıqlayıb. "APA-Economics"in "Anadolu" agentliyinə istinadən verdiyi xəbərə görə, inşaat işləri 2 ay sonra başa çatacaq.

Onun sözlərinə görə, bundan sonra iki ay ərzində test yürüşləri həyata keçiriləcək. "İyun ayından artıq Bakı-Tbilisi-Qars dəmir yolunda dizel lokomotivləri işə salınacaq", - deyə nazir qeyd edib.

Bu ilin fevral ayı ərzində SOCAR tərəfindən (Müştərək Müəssisələr və Əməliyyat Şirkətləri istisna olmaqla) 7 438 metr qazma işi həyata keçirilib.

SOCAR-dan “APA-Economics”ə verilən məlumata görə, bu, ötən ilin fevral ayı ilə müqayisədə 394 metr və ya 5,59% çoxdur.

Bu ilin yanvar-fevral aylarında isə 18 584 metr qazma işi həyata keçirilib. Bu, 2016-cı ilin 2 ayı ilə müqayisədə 1 731 metr və ya 10,27% çoxdur. Qeyd edək ki, bu sahədə görülmüş işlərin hamısı istismara aid olub.

Bu ilin fevral ayında qazmadan alınmış 7, il ərzində isə 13 yeni quyu tikinti ilə başa çatdırılaraq mədənçilərə təhvil verilib.