Azərbaycan Mərkəzi Bankı (AMB) manatın bu günə olan rəsmi məzənnəsini açıqlayıb.

AMB-dən "APA-Economics"ə verilən məlumata görə, bu gün ABŞ-ın milli valyutası olan dolların məzənnəsi dekabrın 30-u ilə müqayisədə dəyişməyərək 1,7707 manat təşkil edib.

Avro manata nisbətən ucuzlaşıb. Avrozonanın vahid valyutası 0,03% zəifləyərək 1,8638 manat olub.

Əsas ticarət tərəfdaşlarımızdan biri olan Rusiyanın milli valyutası rublun məzənnəsi dəyişməyərək 0,0293 manat səviyyəsində qərarlaşıb.

Türkiyə lirəsinin məzənnəsi 1,1% zəifləyərək 0,4967 manat təşkil edib.

Rəsmi məzənnəyə əsasən, 1 ingilis funt sterlinqi 2,1841 manatdır. Beləliklə, funt sterlinqin məzənnəsində 0,4%-lik artım baş verib.

Gürcüstan larisinin məzənnəsi də 1,5% zəifləyərək 0,6564 manat olub.

“Biz Azərbaycanla keçən il Gürcüstana təbii qazın verilməsi  ilə bağlı müqavilə imzalamışıq. Müqavilədə Gürcüstana verilən təbii qazın çatışmayan əlavə hissəsinin “Şahdəniz 2” layihəsi vasitəsi ilə ötürüləcəyini də qeyd etmişik. “Şahdəniz 2” layihəsi Gürcüstan üçün əhəmiyyətli layihədir”

APA-nın Gürcüstan bürosunun məlumatına görə, bu barədə Gürcüstanın energetika naziri Kaxa Kaladze bildirib.

Nazir Gürcüstanda qaz anbarının tikintisi barədə də jurnalistlərə məlumat verib: “Anbarın tikintisi 2017-ci ildə başlanacaq və təxminən 2019-2020-ci illərdə başa çatacaq.”

Kaxa Kaladze qaz anbarı layihəsinin tikintisi ilə bir çox beynəlxalq şirkətlərin maraqlandığını və tezliklə tender elan olunacağını bildirib: “Bu layihənin tikintisində SOCAR-da iştirak etmək istəyir, lakin hələlik bu barədə ətraflı məlumatımız yoxdur.”

“Gürcüstanda ilk yeraltı qaz anbarının tikintisi ilə əlaqədar yaxın vaxtlarda tender elan olunacaq. Anbarın inşasında xarici ölkələrin korporasiyaları və beynəlxalq şirkətlər iştirak etmək istəyirlər. Onların arasında SOCAR şirkəti də var”.

“Qafqazinfo” xəbər verir ki, bu sözləri “Report”a müsahibəsində Gürcüstan baş nazirinin müavini, energetika naziri Kaxa Kaldze söyləyib.

Nazir deyib ki, tenderdə iştirak edəcək şirkətlərin təklifləri diqqətlə öyrəniləcək və indidən kimin qalib gələcəyini söyləmək mümkün deyil. Onun sözlərinə görə, anbarın tikintisinə 2017-ci ilin sonlarında başlanacaq və işlərin 2019-cu ilin sonu, 2020-ci ilin əvvəlində başa çatdırılması nəzərdə tutulur.

"Bu anbar Gürcüstanın təbii qaza olan tələbatının ödənilməsində mühüm rol oynayacaq", - deyə energetika naziri qeyd edib.

Kaladze anbarın, əsasən Azərbaycanın təbii qazı hesabına doldurulacağını vurğulayıb: “Aparılan danışıqlar zamanı əldə olunmuş razılığa əsasən, Gürcüstanın “mavi yanacağa” olan tələbatı Azərbaycanın təbii qazı hesabına ödəniləcək”.

Qeyd edək ki, Gürcüstan Cənubi Qafqaz regionunda yeraltı qaz anbarı olmayan yeganə ölkədir. Bu da onun təbii qaza olan tələbatının ödənilməsində və enerji təhlükəsizliyində ciddi problemlər yaradır. Problemi həll etmək üçün Gürcüstan hökuməti yeraltı qaz anbarının tikintisi barədə qərar qəbul edib. Anbarın texniki layihəsini Fransanın “Jeostik” şirkəti hazırlayıb. Anbarda 210-280 milyon kubmetr təbii qaz saxlamaq mümkün olacaq. Bu isə Gürcüstanın istehlak etdiyi mavi yanacağın 15 faizini təşkil edəcək.

Yeni anbar Tbilisinin Samqori adlanan ərazisindəki köhnə cənub qaz günbəzinin bazasında tikiləcək.

Prezident İlham Əliyev qəbul keçirib.

 Prezident İlham Əliyev dekabrın 22-də BP şirkətinin prezidenti Robert Dadlini qəbul edib. 

Azərbaycan Dövlət Neft Şirkəti (SOCAR) xarici ölkələrdə genişlənməni davam etdirməyi planlaşdırır. Şirkət xarici ölkələrdəki layihələrinə bu ilin əvvəlinədək 4,487 mlrd.dollar həcmində vəsait yatırıb.

“Dalga TV ” “Natural Gas World” nəşrinə istinadən xəbər verir ki, bu barədə SOCAR-ın Sərmayələr İdarəsindən məlumat verilib.

İnvestisiyanın 3,334 mlrd. dolları Türkiyədəki layihələrə yatırılıb. SOCAR İsveçrəyə 414,5 mln. dollar, Gürcüstana 334,3 mln.dollar, Ukraynaya 280,8 mln.dollar, Rumıniyaya isə 71,3 mln.dollar sərmayə qoyub.

İdarənin rəisi Vaqif Əliyev bildirib ki, Şirkət gəlirlərini müxtəlif sektorlar üzrə şaxələndirib: “Neftin aşağı qiymətinə baxmayaraq, gəlirli biznes fəaliyyətimizi davam etdirə bilərik. Türkiyədə 2018-ci ildə bir neçə layihəmiz başa çatdırılacaq və bu, SOCAR-ın gəlirləri üçün dönüş nöqtəsi ili olacaq”.

V.Əliyev “SOCAR Aurora Fujairah Terminal”ından da danışaraq qeyd edib ki, bu layihə şirkətin fəaliyyətini uzaq bazarlara da genişləndirib. Onun sözlərinə görə, SOCAR 2015-ci ildə bu layihədən 948 mln.manat (532 mln. dollar) qazanıb, bu isə əvvəlki ildən 257 mln. manat və ya 37% çoxdur.

“SOCAR Aurora Fujairah Terminal”ı SOCAR, “Aurora Progress” və Fujairah hökumətinin birgə müəssisəsidir.

Gürcüstan

Gürcüstan SOCAR-ın investisiya yatırdığı ilk xarici bazar olub. 2015-ci ilin sonuna “SOCAR Georgia Petroleum” 3,336 mln. ton yanacaq və benzin idxal edib. Şirkətin Gürcüstanda 114 yanacaqdoldurma stansiyası var. Bura 105 qaz stansiyası, 8 sıxılmış təbii qaz stansiyası (CNG) və 1 LPG stansiyası daxildir.

Neft məhsulları ilə yanaşı SOCAR Gürcüstanda təbii qaz sektoruna da cəlb olunub.

Rusiyanın Gürcüstana verdiyi qazın qiymətini 180 dollar/1000 kubmetrdən 320 dollar/1000 kubmetrə qaldırmasından sonra rəsmi Tbilisi 2007-ci ildə Azərbaycandan qaz nəqlini xahiş edib. Azərbaycan Gürcüstana 1000 kubmetr qazı 150 dollardan nəql edib. Sonra Gürcüstanın keçmiş prezidenti Mixail Saakaşvili SOCAR-a 9 region üçün qazpaylayıcı sistemini simvolik olaraq 1 dollar qiyməti ilə idarəetməyə verib. Həmin vaxtdan SOCAR öz fəaliyyətini genişləndirib və bütün regionların qaz paylayıcı sisteminin operatorudur. “SOCAR Georgia Gas” şirkəti 2007-ci ildə yaradılıb və fəaliyyətini genişləndirib. Şirkətin  500 mindən çox abonenti var. “SOCAR Georgia Gas” 2017-ci ilin sonuna 250 mln. dollardan çox sərmayə yatırmağı planlaşdırır.

SOCAR 2009-cu ildən Gürcüstanda ən böyük vergi ödəyicisidir və 2015-ci ildə onun Gürcüstandakı layihələrdən gəliri 748 mln. manat olub.

Türkiyə

Türkiyə SOCAR-ın ən böyük tərəfdaşıdır. SOCAR 2008-ci ildə “Petkim” neft-kimya kompleksində 2,05 mlrd. dollarla səhmdara çevrilib.

SOCAR, eyni zamanda "STAR" neft emalı zavodu (5,67 mlrd. dollar), “Petlim” limanı (400 mln. dollar) və “SOCAR Power” (100 mln. dollar) layihələrini həyata keçirir.

SOCAR-ın Azərbaycanın “Şahdəniz” yatağının ikinci mərhələsinin işlənməsindən hasil olunan ilkin mərhələdə illik 16 mlrd. kubmetr qazın Türkiyəyə (6 mlrd. kubmetr) və Avropaya nəqlini nəzərdə tutan, dəyəri 9,3 mlrd. dollar hesablanan Trans-Anadolu Qaz Boru Kəmərinin (TANAP) inşası ilə də bağlı bir neçə layihəsi var. Boru kəmərinin son ötürücülük gücü 31 mlrd. kubmetrə çatdırılacaq. Türkiyəyə qaz nəqli 2018-ci ildən həyata keçiriləcək.

Hazırda Azərbaycan “Şahdəniz-1” layihəsindən Türkiyəyə ildə 6 mlrd. kubmetr qaz nəql edir. “Cənub Qaz Dəhlizi” QSC TANAP-da 58% paya malikdir (SOCAR-ın QSC-də payı 49% təşkil edir). İllik 10 mln. ton neft emalı gücünə malik "STAR" zavodu 2018-ci ilin I rübündə istismara veriləcək. “Petlim” isə gələn il tam olaraq fəaliyyətə başlayacaq.

Hazırda SOCAR-n bir neçə törəmə şirkəti Türkiyədə terminaldan təbii qaz, neft məhsulları və elektrik sektoru kimi müxtəlif sektorlarda aktivdir. Ötən il SOCAR-ın Türkiyədəki layihələrdən gəliri 2,571 mlrd. manat olub, bu isə 2014-cü ildən 375 mln. manat və ya 17,1% çoxdur.

SOCAR eyni zamanda 1 078 km-i Türkiyə ərazisində olan (ümumi uzunluq 1 768 km) Bakı-Tbilisi-Ceyhan neft kəmərində 25% paya malikdir.

Şirkət 2020-ci ilədək Türkiyədəki investisiyalarının həcmini 18 mlrd. dollar çatdrımağı planlaşdırır.

Ukrayna

"SOCAR Energy Ukraine” 2008-ci ildə fəaliyyətə başlayıb və hazırda 51 yanacaqdolruma stansiyası var. SOCAR növbəti illərdə bu rəqəmi ikiqat artırmağı planlaşdırır. Bu il mayeləşdirilmiş qazın satışı üçün Ukraynada “SOCAR LPG” şirkətini təsis edib.

Rumıniya

“SOCAR Petroleum” 2011-ci ildə yaradılıb və hazırda 35 yanacaqdoldurma stansiyası var.

Şirkət 2017-ci ildə 10-dan artıq stansiya açmağı və növbəti illərdə onların sayını 100-ə çatdırmağı planlaşdırır.

“SOCAR Trading”

SOCAR-ın əsas bazarlarından biri İsveçrədir. Şirkət 2012-ci ildə “ExxonMobil” şirkətindən burada 340 mln. dollara 170 yanacaqdoldurma stansiyası və 2 təyyarə yanacağı anbarı alıb.

“SOCAR Trading”in ofisi 2008-ci ildə İsveçərədə fəaliyyətə başlayıb. Şirkət 2015-ci ildə 253 mln. barel xam neft satıb. Bu həcmin 166 mln. bareli isə Azərbaycanın öz nefti olub. Ötən il şirkət 14 mln. barel həcmində neft məhsulları da satıb.

“SOCAR Trading” bu il Kanadada ofis açıb. Şirkət 2020-ci ilədək LNG bazarına daxil olmaq niyyətindədir.

“SOCAR Trading” Almaniyanın “Siemens” şirkətinin də daxil olduğu konsorsiumla Maltada LNG tədarükü, 175 mln. avro dəyərində qazla işləyən elektrik stansiyanın tikintisi üzrə tenderin qalibi olub.

İqtisadiyyat naziri Şahin Mustafayevin Türkdilli Dövlətlərin Əməkdaşlıq Şurasına üzv dövlətlərin iqtisadiyyat nazirlərinin VI görüşündə iştirak etmək məqsədilə ölkəmizdə səfərdə olan Türkiyənin iqtisadiyyat naziri Nihat Zeybekci ilə görüşündə Azərbaycan və Türkiyə arasında iqtisadi əlaqələr, xüsusilə də ticarət sahəsində əməkdaşlığın genişləndirilməsi, eləcə də V Azərbaycan-Türkiyə-Gürcüstan biznes forumunun keçirilməsi məsələləri müzakirə edilib.

İqtisadiyyat Nazirliyinin mətbuat xidmətindən AZƏRTAC-a bildiriblər ki, nazir Şahin Mustafayev Azərbaycan-Türkiyə əlaqələrinin strateji səviyyədə olduğunu, əməkdaşlığın bütün istiqamətlər üzrə inkişaf etdiyini, birgə layihələrin reallaşdırıldığını vurğulayıb. Bildirilib ki, bu il iyulun 15-də Türkiyədə dövlət çevrilişi cəhdi zamanı Azərbaycan xalqı böyük narahatçılıq keçirdi. Lakin Türkiyə xalqının və dövlətinin nümayiş etdirdiyi birlik nəticəsində bu dəhşətli cinayətin qarşısı alındı. Şahin Mustafayev bu ilin dekabrında İstanbulda və Kayseridə baş vermiş terror aktlarını xatırladaraq bu hadisələrlə bağlı Türkiyəyə bir daha başsağlığı verib.

Müxtəlif sahələrdə əməkdaşlığın genişləndirilməsi imkanlarını diqqətə çatdıran Şahin Mustafayev ölkələrimiz arasında ticarət əlaqələrinin inkişafı üçün böyük potensialın olduğunu və bu istiqamətdə ətraflı müzakirələrin aparılmasının əhəmiyyətini qeyd edib. Bildirilib ki, Türkiyənin idxal etdiyi hər hansı məhsul Azərbaycanın ixrac məhsulları siyahısında mövcuddursa, həmin məhsullar Azərbaycandan idxal edilə bilər. Bundan başqa, Naxçıvan Muxtar Respublikasından Türkiyəyə ixracın genişləndirilməsi də vacibdir.

Azərbaycanın hər zaman Türkiyənin yanında olduğunu və ölkəmizin dəstəyini hər zaman hiss etdiklərini vurğulayan Türkiyənin iqtisadiyyat naziri Nihat Zeybekci ölkələrimiz arasında siyasi münasibətlərin yüksək səviyyədə olduğunu, iqtisadi əlaqələrin də bu səviyyəyə çatdırılmasının vacibliyini qeyd edib, bu sahədə əməkdaşlığın genişləndirilməsinə dair fikirlərini bölüşüb.