Dünya üzrə, o cümlədən ABŞ, Böyük Britaniya və Braziliyadan olan neft treyderləri Asiyaya satışları artırıb. "APA-Economics" "Reuters" agentliyinə istinadən xəbər verir ki, treyderlər OPEC ölkələri tərəfindən hasilatın azaldılmasına dair əldə olunan razılaşma nəticəsində yaranan boşluqdan istifadə edib.

Tədqiqatların nəticəsi göstərir ki, bu ay 30-dək supertanker uzaq məsafəyə səfərə çıxaraq Amerikadan, həmçinin Şimal və Aralıq dənizlərindən əldə etdiyi xam nefti Asiyadakı neft emalı zavodlarına çatdırıb. Məhz bu bölgə dünyanın ən iri və sürətlə inkişaf edən bazarı hesab olunur.

Bildirilir ki, tankerlərin bu cür qeyri-adi yerdəyişmələri OPEC və kartelə üzv olmayan ölkələr tərəfindən sutkalıq hasilatın 1,8 mln. barel azaldılmasına dair razılaşmanın əldə olunmasından sonra baş verib.

Daşımalarda daha aktiv iştirak edən şirkətlər arasında BP, "Royal Dutch Shell", "Trafigura", "Vitol", "Mercuria" və "Unipec" kimi treyderlərin adını qeyd etmək olar.

"Glencore", SOCAR və "Petrobras" da daşımalarda aktiv şəkildə iştirak edib.

"Treyderlər daşımaların nisbətən aşağı qiymətə olmasından və müxtəlif regionlarda neftin qiymətindəki fərqdən istifadə edərək gəlir edib. Belə ki, bir regionda xammal defisiti olduğu halda, digər regionda əks proses müşahidə olunur", - deyə adının açıqlanmasını istəməyən treyder bildirib.

Məsələn, hazırda WTI markalı neftin 1 barelinin dəyəri 54,50 dollar təşkil etdiyi halda, "Brent" markalı neftin 1 barelinin dəyəri 56,90 dollardır. Beləliklə, qiymətlərin arasına 2,40 dollarlıq fərq yaranır. Halbuki, OPEC tərəfindən hasilatın azaldılmasına dair razılaşma əldə olunanadək fərq sıfıra bərabər olub.
 

Nəql qrafiki göstərir ki, ABŞ-dan Asiyaya bu ay 3,5 mln. barel xam neft daşınıb. Oktyabrda bu göstərici 1 mln. barel olub. Britaniyadan Asiya istiqamətində daşımaların həcmi 1,6 mln. bareldən 10,5 mln. barelədək artıb.

Braziliyadan Asiya istiqamətində daşınan xam neftin həcmi tarixi rekord yeniləyərək 16,7 mln. barelə çatıb. Qeyd edək ki, oktyabrda Braziliyadan Asiyaya 6,9 mln. barel xam neft nəql edilib.

Qrafiklər göstərir ki, bu tendensiya martda da qorunacaq.

Aprelin 1-dən etibarən 38/37 №-li Bakı-Tbilisi-Bakı sürət qatarında gediş haqqı tarifləri aşağı salınacaq.

“Azərbaycan Dəmir Yolları” Qapalı Səhmdar Cəmiyyəti İctimaiyyətlə əlaqələr şöbəsinin rəisi  Sevinc Qədirovanın APA-ya verdiyi məlumata görə, İsveçrə frankının Azərbaycan manatına qarşı bu günə olan məzənnəsinə uyğun olaraq, Bakıdan Tbilisiyə kimi gediş haqqı, yataq dəstinin istifadəsi və komisiyon yığım daxil olmaqla, plaskart vaqonda – 30,16 AZN, kupe vaqonda – 44,50 AZN və SV vaqonda - 83,77 AZN təşkil edirsə, gediş haqqları aşağı salındıqdan sonra bu günə olan məzənnə ilə gediş haqqı plaskart vaqonda – 24,54 AZN,  kupe vaqonda –35,32 AZN və SV vaqonda -58.43 AZN təşkil edəcək.

Qeyd edək ki, İsveçrə frankının Azərbaycan manatına olan məzənnəsi dəyişdiyi halda gediş haqqı da uyğun olaraq dəyişdiriləcək.

Bu gün SOCAR-da Yaponiya-Azərbaycan İqtisadi Əməkdaşlıq Komitəsinin IX iclasında iştirak etmək üçün Bakıya gələn Yaponiya nümayəndə heyəti ilə görüş keçirilib.

SOCAR-dan "APA-Economics"ə verilən məlumata görə, SOCAR-ın yataqların işlənməsi üzrə vitse-prezidenti Yaşar Lətifov yapon şirkətlərinin Azərbaycanda müxtəlif istiqamətlərdə fəaliyyət göstərmələrindən, Azərbaycan şirkətləri ilə birgə layihələr üzrə qazanılan uğurlardan danışıb. O qeyd edib ki, yapon şirkətləri ölkəmizin neft-qaz sektorunda ən etibarlı tərəfdaşlardandır.

1996-cı ildə "Itochu" şirkətinin "Əsrin müqaviləsi"nə qoşulduğunu və artıq 20 ildir ki, SOCAR ilə uğurlu əməkdaşlıq etdiyini xatırladan Y. Lətifov Azərbaycanda neft-qazçıxarmanın zəngin və qədim tarixindən söz açıb, dünya neft sənayesi tarixinə Azərbaycan neftçilərinin verdiyi töhfələrdən danışıb.

Yapon nümayəndə heyətinin rəhbəri, "Itochu" korporasiyasının vitse-prezidenti Yoiçi Kobayaşi qeyd edib ki, bu il Yaponiya ilə Azərbaycan arasında diplomatik münasibətlərin qurulmasının 25-ci ildönümü tamam olur və bu baxımdan, hazırkı səfər və keçirilən görüşlər olduqca simvolikdir. Azərbaycanın coğrafi mövqeyinin əlverişli olduğunu və bunun yeni bir enerji habı olaraq ölkəmizin əhəmiyyətini artırdığını vurğulayan Y. Kobayaşi bildirib ki, yapon şirkətləri SOCAR-ın həyata keçirdiyi layihələrə həmişə diqqət yetirir, istər neft-qaz hasilatı, istərsə də emal, treydinq və digər istiqamətlərdə əməkdaşlığın genişləndirməsinə böyük maraq göstərirlər.

Daha sonra o, görüşdə iştirak edən Yaponiya nümayəndə heyətinin geniş tərkibini təqdim edib. “Sumitomo Corporation LLC”, “Mitsubishi Corporation”, “Panasonic Marketing CIS Oy” və digər şirkətlərin rəhbərləri təmsil etdikləri qurumların Azərbaycanla əlaqələrindən danışıb, SOCAR-la bütün istiqamətlərdə və formatlarda əməkdaşlıqda maraqlı olduqlarını söyləyiblər.
 

SOCAR-ın vitse-prezidentləri Tofiq Qəhrəmanov, David Məmmədov, Yaşar Lətifov, Bəhram Hüseynov, Sərmayələr İdarəsinin rəis müavini Davud Yaqubov, İqtisadiyyat və Uçot İdarəsinin rəis müavini Rəşid Hüseynov, “Neftqazelmitədqiqatlayihə” İnstitutunun direktoru Fəxrəddin İsmayılov və başqaları qonaqları maraqlandıran məsələlərə aydınlıq gətirmiş, onların suallarını cavablandırıblar.

Tədbirin sonunda SOCAR və "Itochu Oil Exploration Co. Ltd." şirkəti arasında elmi-texniki əməkdaşlığa dair Anlaşma Memorandumu imzalanıb.

Cari ilin yanvar ayı ərzində Gürcüstan Azərbaycandan 8 mln. 444,5 min dollar dəyərində elektrik enerjisi idxal edib. "APA-Economics" xəbər verir ki, bu barədə Gürcüstan Statistika Xidmətinin açıqladığı statistikada qeyd edilib.

Rəqəmlərin təhlili göstərir ki, 2016-cı ilin yanvar ayı ilə müqayisədə ötən ay Azərbaycan Gürcüstana 8 mln. 240,5 min dollar və 41,39 dəfə çox elektrik enerjisi ixrac edib. Belə ki, ötən ilin yanvar ayında qonşu ölkə Azərbaycandan 204 min dollar dəyərində elektrik enerjisi alıb.
 

Gürcüstanın Rustavi şəhərindən Azərbaycanla sərhədə qədər avtomobil yolu təmir olunacaq.

APA-nın Gürcüstan mətbuatına istinadən verdiyi məlumata görə, Rustavi-Qırmızı Körpü yolunun təmirinə 689 min dollar ayrılacaq.

Uzunluğu 35 kilometr olan avtomobil yolunun təmiri Şərq-Qərb sürətli magistralın müasirləşdirilməsi layihəsi çərçivəsində həyata keçiriləcək. Layihə Dünya Bankı tərəfindən maliyyələşdirilir.

Gürcüstan hökuməti paralel olaraq Rustavi-Sadaxlı yolunu təmir etməyi planlaşdırılır. Ermənistanla sərhədə qədər 40 kilometrlik yolun təmirinə təxminən 651 min dollar xərclənəcək.

Layihələndirilmə işlərinin 17 ay davam edəcəyi gözlənilir. Bundan sonra tender elan olunacaq.

"Azərbaycan xalqı və rəhbərliyi ötən ilin iyul ayının 15-də Türkiyədə baş verən çevriliş cəhdini kəskin pisləyir və qardaş ölkənin xalqı tərəfindən seçilmiş iqtidarını qeyd-şərtsiz dəstəkləyir". APA-nın Türkiyə bürosunun məlumatına görə, bunu İstanbulda keçirilən V Türkiyə-Azərbaycan-Gürcüstan biznes forumunda çıxışı zamanı Azərbaycanın iqtisadiyyat naziri Şahin Mustafayev deyib.

Nazir qeyd edib ki, Türkiyə-Azərbaycan-Gürcüstan arasındakı yüksək səviyyəli əməkdaşlıq ilk növbədə sabitliyə əsaslanır: "Türkiyə bu gün yaşayır, inkişaf edir və öz dostlarını sevindirir. Əməkdaşlığımızın  arxasında ölkə rəhbərlərinin siyasi iradəsi dayanır. Tarixən formalaşan dostluq və qardaşlıq münasibətləri ölkələrimizi daha da yaxınlaşdırır".

Ş. Mustafayev qeyd edin ki, Azərbaycan Türkiyə iqtisadiyyatının ən iri investorlarından biridir. Bu xüsusda nazir SOCAR-ın rolunu yüksək qiymətləndirib: "Təkcə SOCAR-ın qardaş ölkəyə investisiyalarının həcmi 2020-ci ilə qədər 17 milyard dollara çatacaq".

Türkiyə və Gürcüstan şirkətlərinin Azərbaycana yatırdığı investisiyalar barədə məlumat verən Ş. Mustafayev bildirib ki, ötən il Gürcüstan və Azərbaycandan keçərək Orta Asiyaya gedən türk yük maşınlarının sayının ikiqat artıb.

Nazir həmçinin Bakı-Tbilisi-Qars layihəsinin icrasına da toxunub. Onun sözlərinə görə, layihənin icrası bu ilin sonunadək başa çatdırılacaq. "Qars dəmir yolunun Naxçıvana qədər uzadılacaq. Azərbaycan torpaqlarını işğal edən Ermənistan isə bu cür layihələrdən təcrid olunub. TANAP və digər nəhəng layihələrin icrası vaxtında başa çatdırılacaq", - deyə o qeyd edib.

Nazir əlavə edib ki, Azərbaycan Gürcüstan iqtisadiyyatına 3,4 mlrd. dollarlıq investisiya yatırıb.
 

Onun sözlərinə görə, forumda 50-yə yaxın azərbaycanlı iş adamı iştirak edir: "Şübhəsiz, bu forum əməkdaşlığımızın daha da genişləndirilməsinə töhfə verəcək. Azərbaycan prezidenti İlham Əliyev bu foruma böyük əhəmiyyət verir", - deyə nazir bildirib.

Çıxışının sonunda Ş. Mustafayev qeyd edib ki, növbəti forum Azərbaycanda keçiriləcək və tədbirdə iştirak edən rəsmi şəxsləri və iş adamlarını orada iştirak etməyə dəvət edib.