Türkiyə Silahlı Qüvvələrinin dəstək verdiyi Suriya silahlı müxalifəti Əl-Bab şəhərini, demək olar ki, tam nəzarətə götürüb.     

APA-nın TRT telekanalına istinadən verdiyi xəbərə görə, bu barədə Türkiyənin müdafiə naziri Fikri Işık bildirib.  

“Əl-Babın mərkəzinə daxil olmuşuq. Demək olar ki, bütün şəhər nəzarətə götürülüb”, - deyə nazir bildirib.

Qeyd edək ki, Türkiyə ordusu Suriya silahlı müxalifətinin iştirakı ilə avqustun 24-dən şimalında İŞİD silahlı qüvvələrinə qarşı “Fərat qalxanı” əməliyyatı keçirir. 

Türkiyənin İğdır vilayətində baş vermiş ağır yol qəzası nəticəsində ölən Azərbaycan vətəndaşlarından ikisinin şəxsiyyəti məlum olub.

Dalga tv Trend-ə istinadən xəbər verir ki, hadisə nəticəsində ölən 8 nəfərdən 4-ü Azərbaycan vətəndaşıdır.

Onlardan ikisi Naxçıvan sakinləri Süleyman Əliyev və Fərhad Fərhadlıdır. Üzərində sənədi olmayan, lakin azərbaycanlı olduğu ehtimal edilən yaşlı bir qadınla 13 yaşındakı qız uşağının şəxsiyyəti isə hələ müəyyənləşməyib.

Qeyd edək ki, bundan əvvəl qəza nəticəsində 5 Azərbaycan vətəndaşının öldüyü bildirilirdi. Hadisə zamanı 28 nəfər xəsarət alıb ki, onlardan da 26-sı Azərbaycan vətəndaşıdı.

Bakı-Tiflis- Qars (BTQ) dəmir yolu layihəsinin tikintisi Azərbaycan, Gürcüstan və Türkiyəni birləşdirir.

APA-nın Gürcüstan bürosunun məlumatına görə, bu barədə 53-cü Münhen Təhlükəsizlik Konfransında Gürcüstanın baş naziri Giorgi Kvirikaşvili Cənubi Qafqazda regional əməkdaşlıq mövzusunda müzakirələr çərçivəsində çıxışı zamanı bildirib.

Gürcüstan hökumətinin mətbuat xidməti məlumat yayıb ki, baş nazir müzakirələr zamanı BTQ layihəsinin əhəmiyyətindən danışaraq tikintinin ölkədə sabitliyi təmin etmək üçün ən vacib mexanizm olduğunu bildirib: “Baş nazir çıxışında “İpək yolu” iqtisadi zona layihəsi çərçivəsində Bakı-Tiflis- Qars dəmir yolu layihəsinin Avropa ilə Asiyanı bir-biri ilə bağlayan bir kəmər olduğunu qeyd edib. O, BTQ layihəsinin istismara veriləcəyinin vacibliyini və Asiyanın təşəbbüsü ilə Avropa və İpək Yolunun bir kəmərdə yeni imkanlar ortaya çıxaracağını vurğulayıb”.

NATO-nun baş katibi Yens Stoltenberq Rusiyanı Abxaziya və Cənubi Osetiyanı müstəqil dövlət kimi tanımaq qərarından vaz keçərək öz ordusunu Gürcüstan ərazisindən çıxarmağa çağırıb.

APA-nın “112.ua” saytına istinadən verdiyi xəbərə görə, Y. Stoltenberq bunu Brüsseldə keçirdiyi mətbuat konfransında bildirib.

“NATO Gürcüstanın ərazi bütövlüyü və təhlükəsizliyinə sıx bağlıdır. Biz Rusiyanın Gürcüstanın regionları – Abxaziya və Cənubi Osetiya ilə əlaqələrini dərinləşdirməsindən narahatlıq keçiririk. Biz Rusiyanı bu regionları tanımaq qərarından imtina etməyə və öz hərbi qüvvələrini Gürcüstan ərazisindən çıxarmağa çağırırıq”, - deyə baş katib vurğulayıb.   

Y. Stoltenberq NATO-nun Gürcüstanla əməkdaşlığı davam etdirəcəyini və bu ölkəyə NATO-ya üzvlük yolunda irəliləməsi üçün müvafiq praktik vasitələr təqdim edəcəyini söyləyib.

Xatırladaq ki, 2008-ci ildə Cənubi Osetiyadakı müharibədən sonra Rusiya bu bölgəni və Abxaziyanı müstəqil dövlət kimi tanıyıb.

Dünyaca məşhur “Vogue” jurnalının tarixində bir ilk yaşanıb.

“Dalga Tv”nin “Hurriyet”ə istinadən verdiyi məlumata görə, oğlan uşağı olaraq dünyaya gələn, daha sonra estetik əməliyyatla qız olan Valentina Sampaio jurnalın mart nömrəsinin üz qabığının siması olub. Gənc model bununla da “Vogue”nun üz qabığında yer alan ilk transseksual olaraq tarixə düşüb.

Jurnalın istehsal üzrə direktoru Emmanuelle Alt bununla cinsi ayrıseçkiliyə qarşı olduqlarını, insan haqqlarının vacib olduğunu bildirib.

Braziliyalı modelin şəkillərini fotoqraflar Mert Alaş və Marcus Piggot çəkib.

V. Sampaio bundan öncə “Elle” jurnalının üz qabığı üçün çəkilib.

Azərbaycan cinayətkarlıq səviyyəsinin göstəricisinə görə dünyanın 20 ən təhlükəsiz ölkələri siyahısına daxil edilib. 

“Dalga Tv” “APA”ya istinadən xəbər verir ki, reytinq ölkələr və şəhərlər barədə dünyanın ən böyük statistik məlumat bazasına malik “Numbeo” resursu tərəfindən hazırlanıb. 

Resursun 125 ölkədə apardığı araşdırmanın nəticələrinə əsasən, Azərbaycan dünyanın ən təhlükəsiz ölkələri siyahısında 18 yerdə qərarlaşıb. İlk onluqda Qətər, Sinqapur, Avstriya, BƏƏ, Honqkonq, Gürcüstan, Yaponiya, Danimarka və Belarus yer alıb.  

Venesuela, Honduras, Cənubi Sudan, Cənubi Afrika, Nigeriya, Braziliya və Salvador ən kriminal ölkələr siyahısında yer alıb.