Brüsseldə NATO-nun Şimali Atlantika Şurasının xarici işlər nazirləri səviyyəsində ikigünlük iclası keçiriləcək.

APA-nın məlumatına görə, bu barədə NATO-nun mətbuat xidmətindən bildiriblər.

Toplantı aprelin  5-6-da NATO-nun mənzil qərargahında keçiriləcək. İclasa NATO-nun baş katibi Yens Stoltenberq sədrlik edəcək. İclasın gündəliyinə dair əlavə məlumat veriləcək. 

"Almaniya hökuməti Türkiyənin daxili işlərinə qarışmamalı, tərəf tutmamalıdır".

APA-nın Türkiyənin NTV telekanalına istinadən verdiyi məlumata görə, bunu bu gün almaniyalı həmkarı Sigmar Gabriel ilə görüşdən sonra keçirdiyi mətbuat konfransında Türkiyə xarici işlər naziri Mövlud Çavuşoğlu bildirib.

M. Çavuşoğlu deyib ki, hazırda gözlənilən referendumla bağlı Türkiyədə həssas dövrdür: “Belə bir həssas dövrdə Almaniyada referendum əleyhdarlarına aksiyalar keçirmək üçün icazə verilir, ancaq Türkiyə hökumətinin üzvlərinə referendumla bağlı görüşlər üçün icazə verilmir. Bu, yolverilməzdir. Türkiyə olaraq heç vaxt Almaniyada siyasi proseslərdə tərəf tutmadıq, çünki bu, Almaniyanın daxili işidir. Almaniya da Türkiyənin daxili işlərinə qarışmamalıdır”.

M. Çavuşoğlu qeyd edib ki, Almaniyada siyasətçilərin, medianın Türkiyəyə qarşı sərt münasibət bəslədiyi, hətta islamafobiya həddinə gəldiyi müşahidə olunur: “Bu, yolverilməzdir. Türkiyədə insan hüquqları və digər məsələlərlə bağlı Almaniya mövqeyini səsləndirir, bu, Türkiyənin daxili işlərinə qarışmaq sayılmır. Amma Türkiyə rəsmiləri Almaniyada demokratiya ilə bağlı fikirlər səsləndirəndə, bu, Almaniyanın daxili işlərinə qarışmaq kimi qiymətləndirilir. Bu yanaşma düzgün deyil”.

Türkiyədə həbs edilən türk əsilli almaniyalı jurnalist Dəniz Yucelin nə vaxt azadlığa buraxılacağı ilə bağlı sualın ona ünvanlanmasını yanlış sayan M. Çavuşoğlu. D. Yucelin jurnalist fəaliyyətinə görə deyil, konkret əməlinə görə həbs edildiyini söyləyib. Türkiyə xarici işlər nazirliyi D. Yucellə bağlı son qərarın məhkəmə tərəfindən veriləcəyini vurğulayıb. 

Tiflisdə “Polis sıralarında çalışan qadınlar” adlı 6-cı beynəlxalq konfrans keçirilir.

APA-nın Gürcüstan bürosunun məlumatına görə, tədbirdə çıxış edən Gürcüstan daxili işlər naziri Giorgi Mqebrişvili polis sıralarında çalışan qadınların ölkədə həyata keçirilən islahatlara təkan verdiklərini bildirib.

Onun sözlərinə görə, Gürcüstanda hüquq-mühafizə orqanlarında çalışan qadınların sayı artıb. G. Mqebrişvili onların arasında azərbaycanlıların olduğunu da bildirib.

G. Mqebrişvili Azərbaycan Daxili İşlər Nazirliyi ilə sıx əməkdaşlıq etdiklərini vurğulayıb: “Kriminal elementlərin nə sərhədi, nə dini, nə də milləti var. Biz azərbaycanlı həmkarlarımızla bu sahədə birgə mübarizə aparırıq, gələcək planlarımızı birlikdə müzakirə edirik”.

Nazir Azərbaycan Sərhəd Xidməti ilə birlikdə hər iki ölkənin sərhədlərinin delimitasiyası və demarkasiyası sahəsində müsbət işlər gördüklərini vurğulayıb: “Delimitasiya incə bir işdir. Düşünürəm ki, ölkələrimiz arasında həll olunmayan problem yoxdur. Biz Azərbaycanla bu sahədə sıx əməkdaşlıq edirik. Fikrimcə, yaxın gələcəkdə sərhədlərin demarkasiya işini uğurla başa çatdıracağıq”.

ABŞ prezidenti Donald Tramp növbəti dəfə sələfi Barak Obamanı Rusiyaya qarşı zəiflik göstərməkdə ittiham edib.

APA-nın xəbərinə görə, D. Tramp özünün “Twitter” səhifəsində yazıb: “Rusiya səkkiz il ərzində prezident Obamanın “üstündən keçib”, gücləndikcə güclənib, Krımı ələ keçirib və raketlərinin sayını artırıb. Aciz!”

Qeyd edək ki, D. Tramp daha öncə də B. Obamanı Rusiyaya qarşı yumşaq münasibətdə günahlandırıb. “Rusiya Obama administrasiyasının dövründə Krımı özünə birləşdirib. Obama Rusiyaya qarşı çox yumşaq olmayıbmı?” – deyə o, fevralın ortalarında yazdığı “tvit”də vurğulayıb.

Bu gün Gürcüstanda azərbaycanlıların kompakt yaşadığı Qardabani rayonunda etiraz aksiyası keçirilib.

APA-nın Gürcüstan bürosunun məlumatına görə, aksiyada Vaxtanqisi Gürcüstan-Azərbaycan sərhəd nəzarət-keçid məntəqəsinə yaxın kəndlərin (Vaxtanqisi, Nəzərli və Kosalı), eləcə də Ağstafa rayonunun Sadıxlı, Muğanlı kəndlərinin sakinləri iştirak ediblər.

Aksiya iştirakçıları Gürcüstan tərəfinin süni yaratdıqları problemlərin həll edilməsini tələb ediblər. Aksiyada 25 nəfərdən çox Gürcüstan və Azərbaycan vətəndaşları iştirak edib.

Aksiya iştirakçıları son aylarda sürücülərə 1000 lari həcmində cərimə yazılmasından şikayət ediblər. Aksiya iştirakçılarından Azərbaycan vətəndaşları Rafiq Mustafayev, Rövşən Yusubov, Ceyhun Namazov, Gürcüstan vətəndaşlarından isə Kamran Əliyev və digərləri Vaxtanqisi sərhəd nəzarət-keçid məntəqəsinin əməkdaşlarının onları sorğu-suala tutduqlarını, Gürcüstan və Azərbaycana hansı məqsədlə getdiklərini, özləri ilə nə apardıqlarını, habelə nə vaxt qayıdacaqları barədə suallar verdiklərini bildiriblər. Qeyd olunub ki, idarə etdikləri avtomobillərin yanacaq çənində 10 litrdən artıq yanacaq aşkar edildiyi halda 1000 lari cərimə yazılıb, habelə bəzi hallarda gürcü və rus dillərində suallara cavab verməyən kənd sakinlərinə nəzarət-keçid məntəqəsindən keçməyə icazə verilməyib.

Aksiya iştirakçısı olan Sadıxlı kənd sakini Ceyhun Namazov onun avtomobilinin qapılarının içəri üzlüklərinin söküldüyünü və heç nə tapılmadıqda, yenidən geri yığıldıqda, nəqliyyat vasitəsinin yararsız hala düşdüyünü bildirib. Qardabani rayonunun Kosalı kənd sakini Kərəm Əliyev isə sərhədi keçərkən onlara prosedur qaydaları haqqında ətraflı məlumat verilmədiyini deyib.

Aksiya iştirakçıları sərhəddə qarşılaşdıqları problemlər və əngəllər barədə Gürcüstan Maliyyə Nazirliyinin müvafiq departamentinə məlumat veriblər. Nazirlik rəsmisi Xatiya Moistrapişvili bildirib ki, istər Gürcüstan, istərsə də Azərbaycan vətəndaşlarına Vaxtanqisi sərhəd nəzarət-keçid məntəqəsini keçərkən yazılan cərimələr və protokollarla bağlı faktlar təsdiqlənsə, müəyyən ölçü götürüləcək.