İraq ordusunun hərbi qulluqçuları Mosul şəhərində “Ən-Nuri” məscidini mühasirəyə alıblar.

Dalga tv -nin xəbərinə görə, bu barədə məlumatı martın 29-da “BBC News” nəşri yayıb. 

Qeyd olunur ki, məhz bu məsciddə 2014-cü ildə “İslam dövləti” terror təşkilatının lideri Əbu Bəkr əl-Bağdadi xilafət elan edərək özünü xəlifə təyin edib. 

Nəşr bildirir ki, İraq ordusu “Əl-Məlyab” stadionunu nəzarətə götürüb, xüsusi təyinatlı dəstələr isə Köhnə şəhərə daxil olurlar.

Mosulun qərb hissəsində hərbi əməliyyatlar beynəlxalq koalisiya qüvvələrinin iştirakı ilə 2016-cı ilin oktyabr ayında başlayıb.

Meksikada uçuş zolağında iki qız ölüb. Onları selfi çəkdirərkən təyyarə vurub. 

Dalga tv xəbər verir ki, bu barədə “Teletica” məlumat yayıb. 

Hadisə Çiuaua ştatında baş verib. Qızlar uçuş zolağı yanında şəkil çəkdirərək sosial şəbəkədə yerləşdirmək istəyirdilər. Bunu isə təyyarələrin enişi və uçuşu həyata keçirdikləri zaman ediblər. 

Qızların strateji və mühafizə edilən obyektə heç kim görmədən necə keçdikləri məlum deyil. 

Baş verənlərin araşdırılması ilə yerli hüquq-mühafizə orqanlarının əməkdaşları məşğul olur. 

17 və 18 yaşları olan iki meksikalı qız hadisə yerində ölüb. Hərəkətdə olan təyyarənin qanadı onlara dəyib.  

Türkiyə parlamenti ölüm hökmü cəzasının bərpa edilməsi məsələsinə konstitusiyaya dəyişikliklərlə bağlı referendumdan sonra baxacaq.

Dalga tv-nin RİA Novosti-yə istinadən məlumatına görə, bu barədə Türkiyə prezidenti Rəcəb Tayyib Ərdoğan bəyan edib.

Türkiyədə ölüm hökmünün bərpa edilməsi məsələsi ölkədə ötən ilin iyulun 15-də baş verən dövlət çevrilişinə cəhddən sonra gündəmə gəlib.

“Ölüm hökmünün bərmasına dair müraciət parlamentə aprelin 16-dan sonra göndəriləcək. Müxəlifət partiyalarının liderləri Kemal Kılıçdaroğlu və Dövlət Bahçəli bu layihəni dəstəkləməyə söz veriblər. Əgər parlament qanun layihəsini qəbul etsə, mən bu qərarı dəstəkləyəcəm”, - Ərdoğan deyib.

Türkiyədə sonuncu ölüm hökmü 1984-cü ildə icra edilib. 2004-cü ilin may ayında Avropa İttifaqına daxil olmaq üçün ölkədə ölüm hökmü ləğv olunub.  

Gürcüstanın keçmiş prezidenti və Ukraynanın Odessa vilayətinin sabiq başçısı Mixail Saakaşvili Ukraynanın “Zik” telekanalında “Druqaya Ukraina” (“Başqa Ukrayna”) həftəlik tok-şounun aparacısı olacaq.

Dalga tv xəbər verir ki, o, bu barədə özünün “Facebook” səhifəsində yazıb.

“Biz “Zik”də “Druqaya Ukraina” verilişinin ilk çəkilişini etdik. Çox kəskin alınıb. Hər həftə sizə heç bir kanalın göstərmədiyi Ukraynanı göstərəcəyəm”, - Saakaşvili yazıb. 

M.Saakaşvili həmin səhifədə çəkiliş meydançasında çəkilən foto da yerləşdirib. Fotoda o, it damı yanında durub, əlində qovluq tutub. Yəqin ki, studiyada belə dekorasiyaya səbəb, ölkə prezidenti Petr Poroşenkonun bu yaxınlarda “it damı tikməyən insanlar, ölkədə sabitliyi pozmağa çalışırdılar” ifadəsi ilə əlaqədardır.

Saakaşvilinin paylaşdığı şəkillərdə proqramın qonaqları arasında Ali Radanın deputatı Vladimir Parasyukun da olduğu görünür. V.Parasyuk ölkədə fərqli düşncəsi və mövqeyi ilə seçilən siyasətçilərdən sayılır. O, açıqlamaları ilə dəfələrlə Ukraynada baş verən qalmaqalların qəhrəmanı olub. 

Fransanın paytaxtı Parisdə Çin vətəndaşının qətlə yetirilməsindən sonra Çin hökuməti bu ölkəyə etiraz notası ünvanlayıb.

Dalga tv xəbər verir ki, bu barədə Çin XİN-in rəsmi nümayəndəsi Xua Çunin bəyan edib.

Daha öncə “Parisien” nəşri əlində qayçı olan bir kişinin polisə hücum etdiyi və güllələndiyi barədə məlumat yaymışdı.

Polisin məlumatına görə, asayiş keşikçisi yalnız bir dəfə özünü müdafiə üçün atəş açıb, həmin atəş nəticəsində güllə kişinin sinəsinə tuş gəlib və o, hadisə yerində ölüb. Bir müddət sonra Çinin Fransadakı səfirliyi, ölən şəxsin Çin vətəndaşı olduğu barədə məlumat yaymışdı.   

Çərşənbə axşamı brifinq zamanı Çin XİN-in rəsmi nümayəndəsi Xua Çunin martın 26-da Parisdə polis tərəfindən qətlə yetirilən şəxsin Çin vətəndaşı olduğunu təsdiq etmişdi. 

“Xarici İşlər Nazirliyi baş verənlərə böyük məna verir. Hadisədən dərhal sonra Çinin Fransadakı səfirliyi fövqəladə hallar üçün nəzərdə tutulmuş fəaliyyət mexanizmini işə salıb, Fransa tərəfinə etiraz notası ünvanlayıb”, - o deyib.

Xua Çunin sözlərinə görə, Çin tərəfi Fransadan ölkə ərazisində olan ÇXR vətəndaşlarının təhlükəsizliyini təmin etmək üçün səmərəli tədbirləri həyata keçirməyi tələb edib. 

Daha öncə “France-Press” agentliyi polis tərəfindən kişinin qətlə yetirilməsindən sonra Parisdə etiraz aksiyasının keçirildiyinə dair məlumat yaymışdı.  

Türkiyə Silahlı Qüvvələri Hakkari şəhərinin Yüksekova rayonunda PKK terror təşkilatına qarşı hava hücumu həyata keçirib.

“Dalga tv”nin “Milliyet”ə istinadən verdiyi məlumata görə, döyüş təyyarələri PKK-ya məxsus iki mövqeni məhv edib.