Kobaxidze COP29-da deyib: “Gürcüstan 2050-ci ilə qədər sıfır karbona nail olmaq ideyasına sadiqdir”
“Gürcüstan 2050-ci ilə qədər qlobal enerji keçidini sürətləndirmək və sıfır karbona nail olmaq ideyasına sadiqdir”.
Bu barədə baş nazir İrakli Kobaxidze COP29-da enerji layihələri ilə bağlı keçirilən dəyirmi masa formatında iclasda qeyd edib.
Hökumət başçısı bildirib ki, Gürcüstan bərpa olunan enerji mənbələrindən istifadəni genişləndirir, enerji səmərəliliyini artırır, şəbəkəni qonşu ölkələrlə inteqrasiya edir və iqlim dəyişikliyi ilə mübarizə üzrə qlobal məqsədlər siyasətinə uyğun fəaliyyət göstərir:
“Avropa İttifaqı ilə assosiasiya sazişinə uyğun olaraq biz enerji səmərəliliyi haqqında qanun qəbul etdik və 2022-2023-cü illərdə müxtəlif sektorlarda enerji istehlakını azaltmaq üçün 15 əsas qanun layihəsi hazırladıq. Qanuna düzəlişlər 2024-cü ildə tətbiq edilib və o, artıq Aİ standartlarına cavab verir. Həmin layihə yeni tikililərin standartlara cavab verməsini, mövcud binaların isə məcburi standartlara uyğun olmasını tələb edir.
Gürcüstan həmçinin bərpa olunan enerji haqqında qanunu və bərpa olunan enerjinin istiqamətini gücləndirməyə yönəlmiş 8 əsas qanunu təsdiqləyib; 2025-ci ilə qədər bioyanacaqların tənzimlənməsi və bərpa olunan enerji qurğularının sertifikatlaşdırılması planlaşdırılır. Bundan əlavə, Almaniya və Asiya İnkişaf Banklarının dəstəyi ilə biz yaşıl hidrogenin imkanlarını araşdırırıq və 2023-cü ildə Dünya Bankı ilə birgə hazırlanmış “Yaşıl İnkişaf Strategiyası”nı həyata keçirməyə başlamışıq”, – deyə İ. Kobaxidze bildirib.
Hökumət rəhbəri qeyd edib ki, Qara dənizin sualtı elektrik ötürülməsi, eləcə də Qara dənizdə aktivləşdirilmiş bərə layihələri enerji müstəqilliyi və təhlükəsizliyi sahəsində effektiv nəticələr verəcək.
Baş nazirin sözlərinə görə, ümumi məhsulun 27,4 faizinin bərpa olunan enerji mənbələrindən əldə ediləcəyi, istixana qazlarının tullantılarının 47 faiz azalacağı ideyasına Gürcüstan hökuməti sadiq qalır və 2030-cu ilə qədər bunun üçün ciddi addımlar atılacaq.
