Qazaxıstan, Gürcüstan, Azərbaycan və Türkiyə birgə sənədlər imzalayıblar

Qazaxıstanın Aktau şəhərində Gürcüstan, Azərbaycan, Qazaxıstan və Türkiyə nümayəndə heyətlərinin Transxəzər nəqliyyat dəhlizinin inkişafı ilə bağlı dördtərəfli görüşü keçirilib.

24News.ge xəbər verir ki, bu barədə İqtisadiyyat Nazirliyi məlumat yayıb.

Görüşdə Gürcüstanı İqtisadiyyat və davamlı inkişaf naziri Levan Davitaşvili və xarici işlər nazirinin müavini Aleksandre Xvtisiaşvili təmsil edib.

Məlumata əsasən, tərəflər Orta Dəhlizin infrastruktur komponentlərini və əməliyyat istiqamətlərini inkişaf etdirmək barədə razılığa gəliblər.

İqtisadiyyat və davamlı inkişaf naziri Levan Davitaşvili çıxışında son illərdə Orta Dəhlizin səmərəliliyinin artırılması istiqamətində atılan mühüm addımlara diqqət çəkib. Onun sözlərinə görə, Orta Dəhliz vasitəsilə konteyner qatarlarının hərəkətinə ilk dəfə başlanılan 2014-cü illə müqayisədə 2021-ci ildə əhəmiyyətli artım müşahidə olunub və Gürcüstan vasitəsilə Çin-Avropa konteyner daşımaları 10 min TEU-nu keçib.

Levan Davitaşvilinin sözlərinə görə, infrastrukturun və dəhlizlə bağlı digər istiqamətlərin inkişaf etdirilməsi vacibdir. O, Qara dənizdə nəqliyyat marşrutlarının və dəhlizlərinin rəqəmsallaşdırılmasının zəruriliyinə diqqət çəkib.

Görüşdə Azərbaycan, Qazaxıstan və Türkiyə tərəfləri də öz növbəsində Orta Dəhlizin effektivliyini və cəlbediciliyini artırmaq üçün birgə tədbirlər görməyə hazır olduqlarını bildiriblər.

Nazirlərin görüşü çərçivəsində orta dəhlizin imkanlarının artırılması ilə bağlı müəyyən edilmiş konkret fəaliyyətlərlə bağlı sənədlər imzalanıb.