სირიის პრეზიდენტმა ბაშარ ასადმა საფრანგეთის გაზეთს "La Figaro" ინტერვიუ მისცა.
ასადმა ინტერვიუში განაცხადა, რომ იმ ძალებმა, რომლებიც სირიას ქიმიური იარაღის გამოყენებას აბრალებენ, ამის მტკიცებულებები წარადგინონ. ასადმა ინტერვიუში განაცხადა, რომ აშშ და საფრანგეთი ზღაპრებს ყვებიან.
მისი თქმით, სირია იმდენად არაკომპეტენტური არაა, რომ საკუთარი ძალების მდებარე ადგილზე ქიმიური იარაღი გამოიყენოს. მან აღნიშნა, რომ გაეროს წარმომადგენლებმა საავადმყოფოებში ქიმიური იარაღით დაზარალებულ ასობით სირიელი ჯარისკაცი მოინახულეს. ამგვარად, არმიის ქიმიური იარაღის გამოყენებაში ბრალდება უსაფუძვლოა.
ასადმა იმ ძალებსაც დაემუქრა, რომლებიც თავდასხმას აპირებენ. მისი თქმით, თუ სირიას თავს დაესხმევიან, ახლო აღმოსავლეთი დენთის ტბად გადაიქცევა.
მან აღნიშნა, რომ ის ძალები, რომლებიც სირიაში არმიასთან მებრძოლ ძალებს იარაღსა და ფულს აძლევს, მისი მტერია.
სირიის პრეზიდენტმა თურქეთის პრემიერ-მინისტრს რეჯეპ ტაიბ ერდოღანსაც შეეხო. მან განაცხადა, რომ ერდოღანმა თვითონაც არ იცის, რისი გაკეთება უნდა.

საფრანგეთის პრემიერ-მინისტრმა ჟან მარკ აიროლტმა ქვეყნის წინააღმდეგ ქიმიური იარაღის გამომყენებელი სირიის მთავრობის დასჯის გადაწყვეტილების შესახებ განაცხადა. პრემიერმა აღნიშნა, რომ სირიის რეჟიმის ქიმიური იარაღის გამოყენების ფაქტი უპასუხოდ ვერ დარჩება.
პრემიერ-მინისტრმა ამავდროულად, განაცხადა, რომ საფრანგეთი სირიას თავს მარტო არ დაესხმევა. მისი თქმით, ამჟამად პრეზიდენტი ფრანსუა ოლანდი კოალიციის შექმნასთან დაკავშირებით მოლაპარაკებებს აწარმოებს. აიროლტმა ისიც განაცხადა, რომ თავდასხმის მიზანი ბაშარ ასადის გადადგომა არ იქნება. ცნობილია, რომ საფრანგეთის სირიაში თავდასხმის შესახებ საბოლოო გადაწყვეტილებაც კოალიციის შექმნის შემდეგ მიიღება.

ეგვიპტეს ახალ ხელისუფლებას მოძრაობა "მუსლიმთა საძმოს" საქმიანობის აკრძალვა სურს.
ინფორმაციის თანახმად, ქვეყნის მთავრობასთან არსებული ექსპერტთა საბჭოსგან მინისტრთა კაბინეტს "მუსლიმთა საძმოს" საქმიანობის აკრძალვის შესახებ კვლევა გადასცეს.
აღსანიშნავია, რომ ეგვიპტეში მოძრაობა "მუსლიმთა საძმოს" საქმიანობა ათწლეულების განმავლობაში კანონგარეშედ ითვლებოდა და მხოლოდ ჰოსნის მუბარაქის გადაყენების შემდეგ მათ მსოფლიოს თავი ორგანიზებულ პოლიტიკურ ძალად წარადგინეს.

ვიეტნამში სახელმწიფოს შიდა პოლიტიკის ინტერნეტში განხილვის აკრძალვის კანონი ძალაში შევიდა.
#72 კანონის მიხედვით, ბლოგები და სოციალური ქსელები მხოლოდ პირადი ინფორმაციის გაცვლისთვის შეიძლება იყოს გამოყენებული.
კანონი ინტერნეტში ვიეტნამის მთავრობის პოზიცისგან განსხვავებული ინფორმაციის გამოქვეყნებას კრძალავს.
ახალი კანონის თანახმად, უცხოური ინტერნეტ-კომპანიების ლოკალური სერვერები ვიეტნამის ტერიტორიაზე უნდა იყოს განთავსებული.
ვიეტნამი ერთპარტიული კომუნისტური სახელმწიფოა და მთავრობა მედიას მკაცრად აკონტროლებს.