İqlim dəyişikliyi uşaqlara fiziki baxımdan çox mənfi təsir edir – UNICEF nümayəndəsi
İqlim dəyişikliyi uşaqlara nəinki fiziki baxımdan çox mənfi təsir edir, həm də onların öyrənmə bacarıqlarını zəiflədir.
Bunu UNICEF-in Azərbaycandakı Nümayəndəsi Dr. Saca Faruq Abdullah Bakıda BMT-nin İqlim Dəyişmələri üzrə Tərəflərin İlkin Konfransı (Pre-COP29) çərçivəsində keçirilən panel iclasında deyib.
O bildirib ki, uşaqlar arasında iqlim dəyişikliyi ilə mübarizə və onların təhsil vasitəsilə cəlb edilməsi ideyasını bəyənir.
“UNİCEF-in Azərbaycandakı nümayəndəliyi Təhsil Nazirliyi ilə sıx əməkdaşlıq edir və onlar yaşıl istiqamətdə bir neçə layihəni birgə həyata keçiriblər. Oktyabrda nazirliklə birlikdə festival keçirəcəyik. Bu, uşaqlara və böyüklərə kömək edəcək və STEM proqramı Azərbaycanın səkkiz regionunda uşaqlar və böyüklərə elm, texnologiya, yaradıcılıq və yaşıl texnologiyalar sahəsində innovativ ideyalar üzrə istedadlarını kəşf etmək və inkişaf etdirmək üçün dəstək verir. Bundan əlavə, mən UNİCEF adından Elm və Təhsil Nazirliyini ölkədə və Azərbaycanda STEM-in təşviqinə bu cür uzaqgörən yanaşmaya və bütün tələbələrə öz istedadlarını həqiqətən kəşf etmək imkanları yaratmağa sadiqliyinizə görə təşəkkür etmək istərdim. Mən həmçinin Azərbaycan hökumətini Tərəflərin Konfransı zamanı Uşaqlar, Gənclər və İqlim Fəaliyyəti haqqında Bəyannaməni imzalamaq və uşaqları iqlim siyasətinin mərkəzinə qoymaq öhdəliyinə görə 50 digər ölkəyə qoşulmaq istəyinə görə təbrik etmək istəyirəm”,- deyə o bildirib.
Qeyd edək ki, Bakıda Pre-COP29 tədbirinin ikinci günü keçirilir.
Tədbirin ikinci günü çərçivəsində plenar sessiyalar və paralel tədbirlər keçirilməsi nəzərdə tutulub.
Xatırladaq ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu ilin noyabrında Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. İki həftə ərzində dünyanın mərkəzinə çevrilən Bakı 70-80 minə yaxın xarici qonaq qəbul edəcək.
Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. “COP” (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan “Tərəflərin Konfransı” mənasını verir. Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.
