Rusiya-Ukrayna müharibəsinin başlamasından 4 il ötür

Rusiya–Ukrayna müharibəsinin başlanmasından dörd il ötür

Bu gün Rusiyanın Ukraynaya qarşı başlatdığı genişmiqyaslı müharibənin başlanmasından dörd il keçir. Rusiya Ukraynaya qarşı tammiqyaslı hərbi əməliyyatlara 2022-ci il fevralın 24-də başlayıb.

24News.ge xəbər verir ki, Strateji və Beynəlxalq Araşdırmalar Mərkəzinin məlumatına görə, 2022-ci ilin fevralından 2025-ci ilin dekabrınadək olan dövrdə müharibədə Rusiya tərəfdən təxminən 325 min nəfər həlak olub. Eyni dövrdə Ukrayna tərəfdən 140 min nəfərin öldüyü bildirilir.

BMT-nin İnsan Hüquqları üzrə Monitorinq Missiyasının məlumatına əsasən, müharibə nəticəsində 14 999 mülki şəxs həyatını itirib. Onlardan 763-ü uşaqdır. Təşkilat qeyd edir ki, bu rəqəmlər tam olmaya bilər və real say daha yüksək ola bilər.

“Müharibənin Öyrənilməsi İnstitutu”nun məlumatına görə, hazırda Rusiya Ukrayna ərazisinin təxminən 19,4 faizinə nəzarət edir. Müharibədən əvvəl — 2022-ci ilin fevralına qədər isə bu göstərici təxminən 7 faiz təşkil edib. Bildirilir ki, Rusiya qüvvələri ötən il Ukrayna ərazisinin cəmi 0,79 faizini ələ keçirə bilib.

BMT-nin məlumatına görə, müharibə başlayandan bəri 5,9 milyon ukraynalı ölkəni tərk edib və onların böyük əksəriyyəti Avropa ölkələrinə sığınıb. Eyni zamanda, 3,7 milyon nəfər Ukrayna daxilində məcburi köçkünə çevrilib.

Qeyd edək ki, müharibədən əvvəl Ukraynanın əhalisi 40 milyondan çox olub.