ABŞ Ukraynaya F-16 avadanlıqlarının satışını təsdiqləyib

ABŞ hökuməti Ukraynaya F-16 qırıcı təyyarələri ilə bağlı təlim, texniki dəstək və müxtəlif avadanlıqların satışına dair 310,5 milyon dollarlıq hərbi yardım paketini təsdiqləyib. Müvafiq qərar ABŞ Dövlət Departamenti tərəfindən qəbul olunub və son təsdiq üçün Konqresə təqdim edilib.

Paketin tərkibində F-16 təyyarələrinin modernləşdirilməsi və texniki yenilənməsi, personalın hazırlanması, texniki qulluq və ehtiyat hissələrinin təchizatı, yerüstü texnikanın təminatı, proqram təminatı üzrə dəstək, həm məxfi, həm də açıq texniki sənədlərin və nəşrlərin ötürülməsi, eləcə də müxtəlif tədqiqat və analiz işləri yer alır. Bütün bu xidmətlər ABŞ hökuməti və müqavilə üzrə fəaliyyət göstərən şirkətlər tərəfindən təmin ediləcək.

Layihənin əsas icraçılarından “Lockheed Martin”, “BAE Systems” və “AAR Corporation” kimi müdafiə sənayesi nəhəngləri göstərilir.