Salome Zurabişvili: “Rejim vəziyyəti idarə edə bilmir və güc tətbiqi ilə mövqeyini qorumağa çalışır”
Gürcüstanın beşinci prezidenti Salome Zurabişvili son günlərdə bir sıra fond rəhbərlərinin evlərində aparılan axtarışlara münasibət bildirərək, ölkədə yaranmış vəziyyəti kəskin tənqid edib. O, qeyd edib ki, bu kimi tədbirlər demokratik və hüquqi dövlətlər üçün qəbuledilməzdir və Gürcüstan artıq bu standartlardan uzaqlaşıb.
Zurabişvili bildirib ki, keçirilən reydlər və repressiv tədbirlər hakimiyyətin real vəziyyəti nəzarətdə saxlaya bilmədiyini və yalnız güc tətbiqi yolu ilə özünü qorumağa çalışdığını göstərir. Onun sözlərinə görə, cəmiyyətdə narazılıq və etirazlar səngimir, əksinə güclənməkdə davam edir.
“Bu gün baş verənlər göstərir ki, hakimiyyət daxilində də ciddi təlatümlər yaşanır. Rejimə yaxın şəxslərin getdikcə prosesdən uzaqlaşması bu narahatlığın açıq göstəricisidir”, – deyə Salome Zurabişvili vurğulayıb.
O əlavə edib ki, tətbiq edilən sanksiyalar, xüsusilə rejimin rəhbər dairəsinə daxil olan şəxslər üçün ciddi maliyyə nəticələrinə səbəb olub və bu da rejim daxilində mövqelərin zəifləməsinə təsir göstərir.
Zurabişviliyə görə, baş verən proseslər avtoritar sistemlərin son mərhələlərinə xas olan əlamətlərdir və vəziyyətin gələcək inkişafı bu gedişatın davamlı olub-olmamasından asılı olacaq.
