Tbilisidə metropoliten işçiləri əmək haqlarının artırılması tələbi ilə may ayının 3-dən etibarən tətilə çıxa bilərlər.

APA-nın Gürcüstan bürosunun məlumatına əsasən, bu barədə "Birlik 2013" müstəqil həmkarlar ittifaqının keçirdiyi aksiyada elan olunub.
 

İttifaq üzvləri bildiriblər ki, tələb mayın 3-dək yerinə yetirilməsə, metronun fəaliyyəti tamamilə dayanacaq. Onlar şəhər sakinlərinə metronun fəaliyyət göstərməyəcəyi təqdirdə yaranacaq problemləri özündə əks etdirən flayerlər paylayıblar. 
 

Qeyd edək ki, Tbilisi metropoliteninin işçilərinin orta aylıq əmək haqqı 1038 lari (421 dollar) təşkil edir. Metro işçiləri saatlıq əmək haqlarının 7 laridən 10 lariyə qədər artırılmasını tələb edirlər. 
 

Tbilisi metropoliteni əməkdaşlarının maaşları 2013-cü ildən artırılmır. Ötən həftə metro işçiləri, Tbilisi Nəqliyyat Şirkəti və Tbilisi meriyası arasında keçirilmiş görüşdə əmək haqlarının artırılması ilə bağlı razılıq əldə olunmayıb.  
Tbilisi metrosu hər gün təxminən 290 min sərnişinə xidmət göstərir.