Dünya Şahmat Federasiyasının (FİDE) “Qran-pri” turnirinin Tbilisidə keçirilən növbəti mərhələsi başa çatıb. Azərbaycan Respublikası Dövlət Neft Şirkətinin baş sponsorluğu ilə keçirilən turnirin əsas hakimi Azərbaycan Şahmat Federasiyasının vitse-prezidenti, beynəlxalq dərəcəli hakim Faiq Həsənov olub. AZƏRTAc xəbər verir ki, Azərbaycanın beynəlxalq qrossmeysterləri Teymur Rəcəbov və Şəhriyar Məmmədyarovun iştirak etdikləri çempionatda Rusiya 5, Fransa, Gürcüstan, Niderland, Kuba, Özbəkistan hərəyə bir idmançı ilə təmsil olunub. Turnirin fevralın 27-də keçirilən son oyunlarında ilk gedişi Azərbaycanın Gürcüstandakı səfiri Azər Hüseyn edib. Səfir idmançıları təbrik edib, onlara uğurlar arzulayıb.Üçüncü mərhələnin yekunlarına görə rusiyalı idmançı Yevgeni Tomaşevski ən çox xal toplayaraq qalib olub. Teymur Rəcəbov 6 xalla üçüncü, Şəhriyar Məmmədyarov isə 5,5 xalla 4-5-ci yerləri bölüşüb. F.Həsənov turnirlə bağlı AZƏRTAC-ın xüsusi müxbirinə deyib: “Bu gün Dünya Şahmat Federasiyasının “Qran-pri” turnirinin daha bir mərhələsi başa çatdı. Azərbaycan şahmatçıları bu mərhələdə ümumən uğurlu çıxış ediblər. Turnirin əvvəlində Ş.Məmmədyarov şanslı idmançılardan biri idi. Lakin o, gözlənilən kimi oyun nümayiş etdirə bilmədi. Bəzi oyunlarda heç-heçə oynaya biləcəyi halda məğlub olan Şəhriyar Məmmədyarov növbəti mərhələyə keçə bilmədi. Digər idmançımız Teymur Rəcəbov da gözəl oyun nümayiş etdirdi. Teymur son illər, xüsusilə də “Qran-pri” turnirlərində məğlub olmayan şahmatçı kimi özünü tanıdıb. O, bu turnirdə də məğlub olmadı, bir qələbə, 9 heç-heçə ilə üçüncü yerdədir. Teymur öz əmsalını da 6-7 xal artırıb”. F.Həsənov bildirib ki, yaxın vaxtlarda Şəmkirdə şahmat üzrə super turnir keçiriləcək. Bu turnirdə dünyanın ilk onluğuna düşən şahmatçılardan bir neçəsi, o cümlədən T.Rəcəbov və Ş.Məmmədyarov da iştirak edəcəklər. Ümid edirəm ki, onlar bu turnirdə öz bacarıqlarını nümayiş etdirə biləcəklər. Beynəlxalq qrossmeyster Ş.Məmmədyarov isə oyunla bağlı təəssüratlarını bölüşərək deyib: “Azərbaycan şahmatçıları hər zaman “Qran-pri” turnirlərində uğurla çıxış ediblər. İlk yerdən biri mütləq bizim olub. Dünya çempionatına çıxış qazanmışdıq. Bu turnirdən əvvəlki “Qran-pri”nin qalibi olmuşduq. Çox təəssüf edirəm ki, bu mərhələdə istənilən uğuru qazana bilmədik. Əlbəttə ki, bu mərhələdə çox güclü şahmatçılar mübarizə aparırdılar. Ümumən qalib gəlmək üçün bizə birinci olmaq lazım idi. Çox təəssüf edirəm ki, birinci ola bilmədik. Turnir ümumiyyətlə çox çətin alındı. İlk oyunlarda mən turnirin ən yaxşı oyunçularına qalib gəldim. Təəssüf ki, sonradan gözləmədiyim halda turnirin ən zəif oyunçularına – Rustam Kasımcanova və Baadur Cabovaya məğlub oldum. Sonda əlbəttə ki, nəticələrdən razı deyiləm. Amma şansımız hələ davam edir. Azərbaycanda keçiriləcək dünya kubokundan dünya çempionatının finalına birbaşa vəsiqə qazanmaq olar. Bu şansdan layiqincə istifadə edəcəyik”.