Gürcüstan parlamentinin büro iclasında ölkənin bu il təbii qazla təmin olunması ilə bağlı müzakirə aparılıb.

APA-nın yerli bürosunun məlumatına görə, müxalif Vahid Milli Hərəkat Partiyasının üzvü, deputat Roman Qotsiridze Gürcüstanın Rusiyanın “Qazprom” şirkəti ilə ötən il imzaladığı müqaviləni utancverici adlandırıb. O bildirib ki, müqaviləyə əsasən “Qazprom”un ödədiyi vəsait Rusiya sərhədindən Ermənistana qədər qazın nəqli üçün kifayət edəcək: “O zaman Kaladze (keçmiş energetika naziri – red.) bildirmişdi ki, Rusiya ilə imzalanmış müqaviləyə əsasən ucuz qaz əldə edəcəyik. Lakin məlum olub ki, biz bu il təbii qazın 100%-ə yaxınını Azərbaycandan alacağıq. Əgər ucuz qazla bağlı müqavilə imzalanıbsa, o zaman biz niyə Rusiyadan qaz almırıq? Səbəb odur ki, pul yoxdur”.

Deputat qeyd edib ki, Gürcüstan “Qazprom”la müqaviləyə görə 80 milyon dollar itirib.

Parlament çoxluğunun rəhbəri Arçil Talakvadze isə öz növbəsində müxalifətin mövqeyini ziddiyyətli adlandırıb. O deyib ki, əvvəllər müxalifət Gürcüstanın Rusiyadan qaz almasına, indi isə qaz almamasına etiraz edir: “Mən müxalifətə tövsiyə edirəm ki, məntiqli arqumentlər formalaşdırıb mövqe bildirsin”.

Qeyd edək ki, 2018-ci ildə Gürcüstanın təbii qaza olan ehtiyacı 2,689 mlrd. kubmetr həcmində proqnozlaşdırılır. Qonşu ölkə təbii qaz həcminin 1,866 mlrd. kubmetrini SOCAR-dan, 813 mln. kubmetrini isə “Şahdəniz” yatağından əldə edəcək. Yerdə qalan 0,35% (9,41 mln. kubmetr) yerli hasilatın payına düşəcək. Proqnoza əsasən bu il Gürcüstan Rusiyadan təbii qaz almağı planlaşdırmır.