Yaxın 5-10 il ərzində SOCAR-ın meqa layihələrini həyata keçirmək üçün 10-12 min nəfər daimi işlə təmin olunacaq, müvəqqəti işlər üçün isə 30-35 min işçi lazım olacaq.

Məlumata görə, bunu Bakıda keçirilən "İnsan Resursları Forumu Bakı 2015" adlı forumda SOCAR-ın kadr, rejim və informasiya texnologiyaları üzrə vitse-prezidenti Xaliq Məmmədov bildirib.

X,Məmmədovun sözlərinə görə, hal-hazırda SOCAR-da, ölkə üzrə 55 min insan çalışır.

"55 min işçidən 17%-i qadın, 83%-i kişidir. Onlardan 12%-i rəhbər işçi, 18%-i mütəxəssis, 69%-i fəhlələrdir. Bundan başqa, SOCAR-da 260 elmi işçi çalışır, onların 14%-i elmlər dokotrudur", - deyə X.Məmmədov bildirib.

Azərbaycan Dövlət Gömrük Komitəsi sahibkarlar üçün yeni bəyannamə normaları tətbiq etməyə hazırlaşır.

Məlumata görə, bunu bu gün Ümumdünya Gömrük Təşkilatının Bakıdakı Potensialın Gücləndirilməsi üzrə Avropa Regional Ofisində keçirilən "Biznes subyektləri üçün əlverişli şərait yaradılması məqsədilə gömrük prosedurları və əməliyyatları üzrə tətbiq edilən sadələşdirmələr" mövzusuna dair seminarda Dövlət Gömrük Komitəsinin Gömrük Nəzarətinin Təşkili Baş İdarəsinin əməkdaşı Cəfər Quluzadə deyib.

Onun sözlərinə görə, komitə yeni, qısa idxal və ixrac bəyannamələrini tətbiq edilməsinə hazırlaşır: "Bununla da idxal-ixrac əməliyyatlarında sahibkarlar vaxt udmuş olacaqlar".

O qeyd edib ki, həmçinin boru və elektrik xətləri vasitəsi ilə idxal-ixrac əməliyyatları aparan sahibkarlar üçün natamam bəyannamələrin tətbiq ediləcək: "Bilirsiniz ki, tam gömrük bəyannaməsində 54 bənd var. Amma yeni bəyannamələrdə bu bəndlərin bir çoxu çıxarılıb. Yəni, sahibkar yeni bəyannaməni doldurur və tam bəyannamədə olan bəzi bəndləri isə 30 gün müddətində cavablandırıb, gömrük orqanlarına təqdim edir".

Mədəniyyət və Turizm Nazirliyi ilə "Azərbaycan Hava Yolları" Qapalı Səhmdar Cəmiyyəti İşçi Qrupu yaradıblar.
Nazirliyin informasiya və ictimaiyyətlə əlaqələr şöbəsindən  verilən məlumata görə, turizm ölkə iqtisadiyyatında qeyri-neft sektorunun əsas sahələrindən biri olmaqla, ÜDM-nin artım dinamikasında özünəməxsus yer tutur:

"Bu baxımdan, ölkənin gəlmə turizm imkanlarının genişləndirilməsi və xarici turistlər üçün əlverişli şəraitin yaradılması kimi məsələlər böyük əhəmiyyət kəsb edir. Ölkənin gəlmə turizm potensialının daha da effektiv şəkildə təbliğ olunması, eləcə də 2016-cı ildə ölkəmizə daha çox turistlərin cəlb edilməsi məqsədilə Mədəniyyət və Turizm Nazirliyi və "Azərbaycan Hava Yolları" Qapalı Səhmdar Cəmiyyəti arasında danışıqlar aparılıb, ortaq fəaliyyətə dair İşçi Qrup yaradılıb. Yaradılmış işçi qrupunun ilk toplantısı keçirilib, görüşdə bir neçə məsələlər müzakirə edilərək 2016-cı ildə ortaq fəaliyyətə dair razılıq əldə edilib".

Razılığa əsasən "Azərbaycan Hava Yolları" Qapalı Səhmdar Cəmiyyəti tərəfindən birbaşa uçuşların həyata keçirildiyi ölkələrin vətəndaşları üçün həmin ölkələrin spesifikası, turistlərin səyahət tendensiyaları, onların qərar qəbul etmə xüsusiyyətləri, eləcə də seçilmiş ölkə üzrə bayram və tətil günləri nəzərə alınmaqla, birgə fəaliyyət çərçivəsində müvafiq aşağı büdcəli tur paketlərin hazırlanması, həyata keçirilməsi və ortaq şəkildə təbliği aparılacaq.

Eyni zamanda xarici ölkələrdə keçirilən beynəlxalq turizm sərgilərində Mədəniyyət və Turizm Nazirliyi və "Azərbaycan Hava Yolları"nın ortaq milli stendlə iştirakı həyata keçiriləcək, hər iki qurumun bir sıra xarici dövlətlərdə fəaliyyət göstərən nümayəndəliklərin imkanlarından birgə istifadə ediləcək, 2016-cı ildə gəlmə turizm baxımından Azərbaycan üçün prioritet hesab olunan ölkələrin turizm sənayesi və kütləvi informasiya vasitələrinin nümayəndələri üçün ölkəmizə 20-dən artıq tanışlıq səfərinin birgə həyata keçiriləcək.

Razılığa görə, hər iki qurum tərəfindən bir sıra xarici ölkələrdə ortaq reklam və marketinq fəaliyyətinin aparılacaq (küçə və ictimai reklam, dövrü nəşrlərin dəstəklənməsi, elektron marketinq fəaliyyəti və s.).

Qeyd edək ki, adıçəkilən fəaliyyətlərin Rusiya Federasiyası, Qazaxıstan, Ukrayna, Türkiyə, Böyük Britaniya, Almaniya, Fransa, İtaliya, ABŞ, İsrail, Çin və Körfəz ölkələrində aparılması müzakirə edilib. Yaxın müddət ərzində 2016-cı il üzrə Mədəniyyət və Turizm Nazirliyi ilə "Azərbaycan Hava Yolları" Qapalı Səhmdar Cəmiyyəti arasında ortaq fəaliyyət planının həyata keçirilməsi üzrə sənədin imzalanması nəzərdə tutulub.

"Azərbaycan Hava Yolları" QSC (AZAL) tələbələr üçün bütün beynəlxalq istiqamətlər üzrə biletlərə 10% endirim elan edir.

"Azərbaycan Hava Yolları" QSC-nin mətbuat xidmətindən verilən məlumata görə, bu endirim 25 yaşa kimi olan tələbələr üçün "Azərbaycan Hava Yolları"-nın beynəlxalq reyslərində həm ekonom, həm də biznes klass üzrə aviabiletlərə tətbiq edilir. Kampaniya AZAL-ın Moskva, Antalya, İstanbul və Dubaya yerinə yetirilən aşağı büdcəli reyslərinə tətbiq edilmir.

Aviabiletləri əldə etmək üçün Azərbaycan və xarici universitetlərin tələbələri AZAL aviaşirkətinin satış ofislərinə yaxınlaşaraq tələbə bileti və ali təhsil müəssisəsindən arayış təqdim etməlidir.

Xatırladaq ki, avqustun 1-dən etibarən AZAL bütün sərnişinlər üçün beynəlxalq istiqamətlər üzrə cari ekonom-klass tariflərinə 20-30% faiz endirim tətbiq edib.

Gürcüstan və Ermənistan arasında elektrik xətti çəkilə bilər və bu xətt vasitəsilə tranzit yolu ilə İrana elektrik enerjisinin ötürülməsi mümkün ola biləcək.

"Dalğa TV"nin "Kommersant" qəzetinə istinadən məlumatına görə, bu barədə noyabrın əvvəlində Tiflisdə Gürcüstanın energetika naziri Kaxa Kaladze ilə görüşən Ermənistanın energetika naziri Yervand Zaxaryan jurnalistlərə açıqlamasında bildirib. Kaxa Kaladze isə öz növbəsində İrana tranzit yolu ilə elektrik enerjisinin ötürülməsində maraqlı olduqlarını bildirib: "Bu ölkəyə münasibətimiz dəyişib və biz İrana elektrik enerjisi ötürməkdə və bu ölkədən qaz almaqda maraqlıyıq", deyə K. Kaladze bildirib.

Gürcü nazir noyabr ayı ərzində bu məsələləri müzakirə etmək üçün İrana səfər etmək niyyətindədir.

Jurnalistlərə açıqlama verən Ermənistanın energetika naziri Yervand Zaxaryan Rusiya qazının həcminin Gürcüstandan keçməklə artırılması barədə fikirlərin olduğunu təsdiqləyib. "Əgər, bizim qaz təchizatı sahəsində imkanlarımız yaranarsa, biz mütləq bu qazı "Qazprom"dan alacağıq", deyə nazir bildirib.

O, qeyd edib ki, Ermənistan Rusiyanın "Qazprom" şirkətindən aldığı 1000 kubmetr qaza görə 165 dollar ödəyir.

Böyük ehtimalla İran qazı Gürcüstana nəql ediləcək.

"Dalğa TV"nin "Georgia Online"-yə istinadən verdiyi xəbərə görə, bu barədə Gürcüstan sabiq baş naziri, sahibkar-milyarder Bidzina İvanişvili bildirib. İvanişvili İranla maksimum möhkəm və geniş ticarət əlaqələrinin yaradılmasının zəruriliyini qeyd edib.

"İki həftə əvvəl mənim ABŞ səfiri ilə görüşüm olub. Biz iqtisadiyyatın bütün istiqamətləri üzrə hökumət üzvləri ilə çox fəal çalışırıq. Mən heç nəyi idarə etmirəm, lakin iqtisadiyyatla əlaqəli olan hər məsələdə fəal iştirak edirəm. Biz İranla maksimum möhkəm və geniş ticarət əlaqələrinin yaradılmasına nail olmalıyıq. Siz bilməlisiniz ki, İran, Çin və Rusiya bizə çox gərəkdirlər. İran qazı da Gürcüstana nəql edilsə bu çox maraqlı olardı və mən düşünürəm ki, bu, böyük ehtimalla, belə də olacaq", deyə İvanişvilli bildirərək, hökumət özü təfərrüatları ictimaiyyətə təqdim etməyincə məsələnin detallarını açıqlaya bilməyəcəyini qeyd edib.
İvanişvillinin sözlərinə görə, o özü danışıqlarda sahibkar qismində iştirak edir.