İtaliya Milli Olimpiya Komitəsi (CONİ) Roma şəhərinin 2024-cü il Yay Olimpiya Oyunlarına namizədliyini geri götürüb. 

bu barədə rəsmi qərarı CONİ-nin prezidenti Covanni Malaqo açıqlayıb.

O keçirdiyi mətbuat konfransında bildirib ki, artıq namizədliyi geri götürmək üçün Beynəlxalq Olimpiya Komitəsinə (BOK) rəsmi məktub göndəriblər: “Bu gün səhər namizədlikdən imtina etdik”. 

Maloqo 2019-cu ildə BOK-un İcraiyyə Komitəsinin Milanda keçirilməsi istəyini də məktuba əlavə etdiklərini deyib.

Nəticədə Oyunları keçirməyə namizəd kimi Budapeşt (Macarıstan), Los-Anceles (ABŞ) və Paris (Fransa) şəhərləri qalıb. 2024-cü ildə olacaq yarışın ev sahibinin adına isə 2017-ci il sentyabrın 13-də Perunun paytaxtı Limada aydınlıq gələcək.

Qeyd edək ki, Roma 2020-ci ildə də Olimpiadaya ev sahibliyi etmək arzusunda olsa da, İtaliya hökuməti iqtisadi böhran səbəbindən namizədlikdən imtina etmişdi.

İstanbulda oktyabrın 9-dan başlayaraq beş gün davam edəcək 23-cü Dünya Enerji Konqresi dünən tarixi anlarla yadda qalıb.

“Qafqazinfo” xəbər verir ki, dünən Azərbaycan, Venesuela, Rusiya və Türkiyə prezidentləri çıxış ediblər. Daha sonra Mabeyn köşkündə prezident Ərdoğanla Putin bir araya gəliblər. Bir saat 40 dəqiqə davam edən görüşdən sonra hər iki lider birgə mətbuat konfransı keçiriblər. Türkiyə və Rusiya Qaradənizdən keçməklə rus qazını Türkiyəyə daşıyacaq və maliyyə xərcləri 12,5 milyard dollar olan “Türk Axını” təbii qaz boru xətti layihəsini imzalayıblar.

Dünən baş tutan Enerji Konqresində liderlərin çıxışlarından sonra neftin qiymətində kəskin artım müşahidə edilib.

Belə ki, Brent markalı neft son bir ildə ən yüksək - 53,5 dollar səviyyəsinə qalxıb. WTI markalı neftin isə bu gün səhər saatlarına görə bir barreli 51,25 dollar olub. 

“SOCAR Turkey Enerji AS” ilə “Rosneft” şirkəti İstanbulda keçirilən Ümumdünya Energetika Konqresi çərçivəsində neft və neft məhsulları təchizatının əsas şərtləri haqqında saziş imzalayıb.

Sənədə əsasən, tərəflər tikintisi “SOCAR Turkey Enerji” tərəfindən həyata keçirilən və təxminən 10 milyon ton gücə malik yeni “STAR” neft emalı zavodu çərçivəsində əməkdaşlığın potensialını öyrənəcək. Şirkətlər “Rosneft” məhsullarının, o cümlədən neft və digər xammalın bu müəssisəyə tədarükünün təşkili imkanını nəzərdən keçirəcək. Məhsulun nomenklaturası, eləcə də təchizatın həcmi və müddəti tərəflərin ortamüddətli perspektivdə imzalayacağı hüquqi öhdəlik sənədləri çərçivəsində müəyyən olunacaq.
“Rosneft”də hesab edirlər ki, “SOCAR Turkey Enerji” ilə potensial tərəfdaşlıq şirkətin beynəlxalq əməliyyatlarından əlavə sinergetik səmərə əldə etməyə imkan verəcək.

Bakıda “Azərbaycanın qlobal və regional arenada rolu: Reallıqlar və perspektivlər” mövzusunda beynəlxalq konfrans çərçivəsində "Azərbaycan yolların kəsişməsində: Regional baxış" sessiyası keçirilib.

APA-nın məlumatına görə, sessiyanın moderatoru Azərbaycan Respublikasının Prezidenti yanında Strateji Araşdırmalar Mərkəzinin aparıcı elmi işçisi Gülmirə Rzayeva olub.

Moskva Dövlət Beynəlxalq Münasibətlər İnstitutunun Postsovet Araşdırmaları Mərkəzinin direktoru Stanislav Çernyavski çıxışında bildirib ki, Azərbaycan üçün işğal olunmuş torpaqların azad edilməsi, məcburi köçkünlərin torpaqlarına qaytarılması vacibdir: “Son illər Azərbaycan xüsusən humanitar sahədə beynəlxalq təşəbbüslərin müəllifidir. 2011-ci ildən etibarən prezident İlham Əliyevin sərəncamı ilə iki ildən bir Bakıda Beynəlxalq Humanitar Forum keçirilir. Hazırda Azərbaycan dünya birliyinin nüfuzlu üzvüdür. Şanxay Əməkdaşlıq Təşkilatı ilə əlaqələr də Azərbaycan xarici siyasətində mühüm yer tutur”.

Qazaxıstan Respublikasının Prezidenti yanında Strateji Araşdırmalar Mərkəzinin direktoru Yerlan Karin Qazaxıstanda Azərbaycanın islahatlar sahəsində təcrübəsinin öyrənildiyini və istifadə edildiyini söyləyib: “Azərbaycan unikal mədəni dəyərlərini qoruyub, eyni zamanda müasir və inkişaf edən bir ölkədir. Bir çox ölkələr buna nail ola bilmir”.

Gürcüstanın Strateji və Beynəlxalq Araşdırmalar Fondunun baş elmi işçisi Giorgi Badridze Azərbaycan və Gürcüstanın bir-birindən asılı olduğunu vurğulayıb: “1990-cı illərdə Azərbaycan və Gürcüstan sabit, demokratik dövlətlər qurmaq niyyətində idi. Ancaq eyni mərkəzdən idarə olunan separatçı hərəkatlarla qarşılaşdıq. Biz başa düşdük ki, yalnız bir yerdə müstəqilliyimizi qoruya, dünya iqtisadi və siyasi arenasında yer tuta bilərik.Bakı-Tbilisi-Ceyhan neft kəməri tək iqtisadi layihə deyildi. Bu gün tədbirdə ABŞ-a qarşı tənqidlər eşitdim. Mən 1990-cı illərdə Gürcüstan hökumətində təmsil olunurdum, layihə ilə bağlı danışıqlarda iştirak edirdim. ABŞ bu layihənin həyata keçirilməsində mühüm rol oynadı. Rusiya isə bizə hədə-qorxu gəlirdi ki, Bakı-Tbilisi-Ceyhan neft kəməri layihəsində iştirak etməyək. Mən çox istərdim ki, rusiyalı həmkarlarımızla bir-birimizə yaxşı sözlər deyək. Lakin hələ də Kremldə qonşu dövlətlərin müstəqilliyi qəbul edilmir. Avropa İttifaqı regionda sabit dövlətlərin olmasını istəyir. Buna nə dərəcədə nail ola bilməsi başqa məsələdir. Burada Sergey Markov Rusiyanın Ukraynada işğala təhrik edildiyini əsaslandırmağa çalışdı. Əslində isə Rusiya Ukrayna prezidenti Viktor Yanukoviçi Avropa İttifaqı ilə assosiasiya sazişi imzalamaqdan imtinaya məcbur etdi və bununla da Ukraynada böhran başladı. Bu da Rusiyanın qonşu dövlətlərə qarşı siyasətini göstərir”.

G. Badridzenin fikrincə, Azərbaycan və Gürcüstan arasında əlaqələr Orta Asiya dövlətləri üçün nümunə olmalıdır: “Azərbaycanın qurduğu infrastruktur Orta Asiya dövlətləri üçün geniş imkanlar yaradır. Orta Asiya dövlətləri müstəqilliklərinin qorunması və iqtisadi inkişafları üçün bu imkandan istifadə etməlidirlər. Mən bu baxımdan TANAP-ı qeyd etmək istəyirəm. Orta Asiya dövlətlərinin Rusiya ilə münasibətlər qurmasının əleyhinə deyiləm, ancaq bu ölkələr müstəqilliklərini qorumaq və iqtisadiyyatlarını sürətlə inkişaf etdirmək istəyirlərsə, Qərb dövlətləri ilə iqtisadi əlaqələri gücləndirməlidirlər. Azərbaycan bu imkanı yaradıb”.

Türkmənistanın xüsusi tapşırıqlar üzrə səfiri Murad Nazarov Türkmənistan və Azərbaycanın böyük neft-qaz resurslarına malik olduğunu söyləyib: “Biz Türkmənistan və Azərbaycan arasında əməkdaşlığın böyük potensialı olduğuna əminik. İki ölkə arasında mədəniyyət, təhsil sahəsində əməkdaşlıq güclənir. Hər iki dövlət turizmin inkişafı sahəsində böyük potensiala malikdir. Türkmənistan Azərbaycanla müştərək investisiya layihələrinin həyata keçirilməsində maraqlıdır. Türkmənistan və Azərbaycan xalqları coğrafi və etnik baxımdan yaxındır, ənənələr, dil yaxındır. Bu da əməkdaşlıq üçün geniş imkanlar açır”.

Azərbaycan Respublikasının Prezidenti yanında Strateji Araşdırmalar Mərkəzinin Xarici siyasət məsələlərinin təhlili şöbəsinin müdiri Cavid Vəliyev Azərbaycanın regional siyasəti barədə danışıb.

Müzakirələrdən sonra SAM-ın direktoru Fərhad Məmmədov yekun çıxış edib. 

Azərbaycanın Dövlət Neft Şirkəti (SOCAR) ilə neft-qaz nəqli üzrə boru kəmərləri sahəsində əməkdaşlıq edəcək. 
Bu barədə "Sədid Holdinq" şirkətinin sədr müavini, Polad borular, profillər istehsalçıları İttifaqının katibi Əmir Hüseyn Kavə açıqlama verib.

Onun sözlərinə görə, "Sədid" şirkəti və SOCAR arasında əməkdaşlıq hər iki ölkə üçün daha çox gəlir gətirə bilər. “Rusiyanın “Qazprom” şirkəti ilə də əməkdaşlıqda Azərbaycan tərəfinin potensialından istifadə etmək niyyətindəyik. Hazırda “Sədid” şirkəti Azərbaycanda təcrübəli və bacarıqlı işçi qüvvəsi axtarışındadır. Bu işçi qrupunun təşkilatlanması hər iki ölkə üçün böyük iş olacaq. Əlbəttə, hazırda bəzi işçilər işə götürülüb və səfirlərlə də görüşümüz olub. Hazırda iş davam etdirilir, gözləyirik ki, iş başlasın”, - deyə Ə.H.Kavə qeyd edib.

Ə. H. Kavə İranla Rusiya əməkdaşlığında Azərbaycanın rolundan danışaraq bildirib ki, “Sədid” şirkəti hazırda Rusiyanın "Qazprom" şirkəti ilə neft-qaz boru kəmərlərinin layihələndirilməsi və təkmilləşdirilməsi layihəsini müzakirə edir: ”Biz istəyirik ki, İran və Rusiyanın əməkdaşlığında Azərbaycan əsas rol oynasın. Ona görə ki, neft-qaz boru kəmərlərinin layihələndirilməsi və təkmilləşdirilməsi layihəsində İran, Rusiya və Azərbaycanın 3 tərəfli əməkdaşlığının önəmli və əsaslı olduğunu düşünürük.”

Şirkət rəsmisinin sözlərinə görə, hazırda İran Rusiyanın böyük şirkətləri ilə böyük layihələrdə əməkdaşlıq üçün müzakirələr aparır: “Rusiyada daha çox İran şirkətlərini qeydiyyata alırıq. Yük daşımaları, ticarət və nəqliyyatda Azərbaycan şirkətlərinin potensialından istifadə etməyi qərara almışıq.”

Qeyd edək ki, “Sədid” şirkəti bir müddət öncə Rusiyanın ən böyük gəmiqayırma şirkətlərindən olan “Krasnoe” şirkəti ilə 1 mlrd. dollar dəyərində müqavilə imzalayıb. Müqaviləyə əsasən bu şirkət İran üçün dirəklər, qazma platformaları istehsal edəcək.

“Sədid” holdinq yarım əsrdir ki, fəaliyyət göstərir. İranın ən böyük sənaye şirkətlərindən biridir. Polad profayl, boru və maşınqayırma sənayesi sahəsində fəaliyyət göstərir.