"Azərbaycan prezidentinin sərəncamını dövlətçilik tariximizin inkişafına verilən dəyər kimi qiymətləndirirəm ". Bu fikirləri APA TV-yə açıqlamasında Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev bildirib. Millət vəkili Məhəmməd Əmin Rəsulzadənin 130 illiyinin dövlət səviyyəsində qeyd olunması ilə bağlı sərəncamı milli həmrəyliyə və Rəsulzadəyə münasibətdə tarixi ədalətin bərqərar olunmasına xidmət edən tarixi qərar kimi dəyərləndirib.

"Biz bu qərarı alqışlayırıq. Məhəmməd Əmin Rəsulzadə Azərbaycan Xalq Cümhuriyyətinin banisi, ideya atası olub. Bu baxımdan bizim öz keçmişimizə verdiyimiz qiymət və bu qiyməti verən insanların özünü ucaldır. Cəmiyyətdə milli barışığa, həmrəyliyə yol açır. Çox istərdim ki, bu qərar formal xarakter daşımasın və doğurdanda Məhəmməd Əmin Rəsulzadənin 130 illiyi layiqli şəkildə qeyd olunsun. Bakının ən möhtəşəm yerində Məhəmməd Əmin Rəsulzadəyə böyük bir abidə ucaldılsın”.

Millət vəkili Fəttah Heydərov da dövlət başçısının sərəncamını müsbət qiymətləndirib.

"Bu günlərdə bizim hörmətli prezidentimiz Məhəmməd Əmin Rəsulzadənin yubileyini qeyd olunması ilə bağlı sərəncam imzalamaqla azərbaycançılığın , Azərbaycan tarixinin təməlinin bir daha möhkəm olduğunu təsdiq etdi. Əlbəttə Azərbaycanın müstəqilliyi uğrunda fədakarlıq göstərən insanları həmişə qiymətləndirmək lazımdır”.

Bakı Dövlət Universitetinin rektoru, millət vəkili Abel Məhərrəmov isə bildirib ki, müstəqil Azərbaycanın qurucularından biri olan Məhəmməd Əmin Rəsulzadənin 130 illiyi qeyd olunması tarixi hadisə olacaq. Məhəmməd Əmin Rəsulzadənin büstünün bu günə kimi qoyulmamasına da münasibət bildirən rektor bu məsələnin hər zaman aktual olduğunu diqqətə çatdırıb.