Gürcüstanın Azərbaycandakı səfiri bu ilin iyunun 1-də vəzifəsindən geri çağırılacaq
Gürcüstanın Azərbaycandakı səfiri Zurab Pataradze bu ilin iyunun 1-də vəzifəsindən geri çağırılacaq. Bu barədə Gürcüstanın Baş naziri İrakli Kobaxidze fərman imzalayıb və fərman təsdiqlənməsi üçün Gürcüstan Prezidenti Mixail Kavelaşviliyə təqdim olunub.
Zurab Pataradze 2018-ci ilin avqust ayından etibarən Gürcüstanın Azərbaycandakı səfiri vəzifəsini icra edir. Ötən ilin dekabrında onun səlahiyyət müddəti bu ilin aprelin 1-dək uzadılmışdı.
Zurab Pataradze 1973-cü il fevralın 12-də Batumidə anadan olub. Tbilisi Dövlət Universitetində maliyyə və kredit ixtisası üzrə təhsil alıb və Batumi Dövlət Universitetində hüquqşünaslıq üzrə ikinci təhsilini tamamlayıb. Diplomatik karyerasına 2000-ci ildə Gürcüstan Xarici İşlər Nazirliyində başlayıb. Müxtəlif illərdə Gürcüstanın Rusiyadakı səfirliyində konsul, Yunanıstanın Saloniki şəhərində baş konsul, Türkiyədə fövqəladə və səlahiyyətli səfir, Qazaxıstanda səfir vəzifələrində çalışıb. 2016-2018-ci illərdə Acariya Muxtar Respublikasının Hökumətinin sədri olub.
Onun geri çağırılması Gürcüstanın diplomatik korpusunda aparılan rotasiya və struktur dəyişiklikləri ilə əlaqələndirilir. Hazırda Gürcüstan hökuməti yeni səfirin kim olacağı barədə rəsmi açıqlama verməyib.
