საქართველოში საპრეზიდენტო არჩევნები ტარდება.
დღეს ადგილობრივი დროით 8:00-ზე მთელი ქვეყნის მასშტაბით 3700 უბანზე ხმის მიცემა დაიწყო, რომელიც 20:00-ზე დასრულდება.
ქვეყნის მასშტაბით 3.5 მილიონ ამომრჩეველს აქვს ხმის მიცემის უფლება. უცხოეთში კი 52 უბანზე 48.5 საქართველოს მოქალაქე მისცემს ხმას.

 

დღეს საქართველოში ჩატარებულ საპრეზიდენტო არჩევნებზე საქართველოს სახელმწიფო და მთავრობის მეთაურებმა მისცეს ხმა.
პრემიერმა ბიძინა ივანიშვილმა, კანდიდატებმა გიორგი მარგველაშვილმა, დავით ბაქრაძემ, ნინო ბურჯანაძემ და სხვებმა ოჯახის წევრებთან ერთად თავისი ხმა დააფიქსირეს.
ადგილებს, სადაც პრემიერ-მინისტრმა და პრეზიდენტობის კანდიდატებმა მისცეს ხმა, ადგილობრივი და საერთაშორისო დამკვირვებლები აკვირდებოდნენ.

საქართველოს დამოუკიდებლობის მიღების შემდეგ ქვეყანაში მე-6 საპრეზიდენტო არჩევნები ტარდება. ქვეყნის მოქალაქეები ზვიად გამსახურდიას (1 ვადა), ედუარდ შევარდნაძის (2 ვადა), მიხეილ სააკაშვილის (2 ვადა) შემდეგ მე-4 პრეზიდენტს ირჩევენ.
მიმდინარე არჩევნებზე 23 კანდიდატი და 3.537.719 ამომრჩეველია დარეგისტრირებული. ისინი 84 საარჩევნო ოლქის 3.689 საარჩევნო უბნებზე მისცემენ ხმას.
ცესკოს ინფორმაციით, არჩევნებს 60 ადგილობრივი და 65 საერთაშორისო ორგანიზაციის 20.987 წარმომადგენელი აკვირდება.
არჩევნების მსვლელობას 152 (მათგან 84 უცხოური) მედიასაშუალების 1.381 თანამშრომელი აშუქებს.

პრემიერმა ბიძინა ივანიშვილმა, რომელიც საარჩევნო უბანზე ოჯახთან ერთად გამოცხადდა, ხმა გიორგი მარგველაშვილს მისცა.

"რა თქმა უნდა, გიორგი მარგველაშვილის სასარგებლოდ გავაკეთეთ არჩევანი მთელმა ოჯახმა. არ შეიძლება, არ მაქვს დასახელების უფლება? რატომ მეკითხებით მაშინ", - განაცხადა ბიძინა ივანიშვილმა.

ივანიშვილის მიერ საკუთარი გადაწყვეტილების საჯაროდ დაფიქსირება დარღვევად არ ჩათვალა არც ცესკომ და არც არასამთავრობო ორგანიზაციებმა.

ცესკოს სპიკერის ეკა აზარაშვილის განცხადებით, აგიტაცია, არჩევნების დღეს, საარჩევნო უბნის გარეთ არ იკრძალება. "საერთაშორისო გამჭვირვალობა - საქართველოს" აღმასრულებელი დირექტორის ეკა გიგაურის თქმით, აგიტაცია იკრძალება შენობაში, მაგრამ პრემიერის განცხადება აგიტაცია არ ყოფილა.

ჟურნალისტების კითხვაზე, თუ რის სასარგებლოდ მისცა ხმა, პრემიერმა უპასუხა, რომ არჩევანი საქართველოს მომავლის სასარგებლოდ გააკეთა.

"მინდა, საქართველოს მოსახლეობას მივულოცო დღევანდელი დღე. მაქვს ინფორმაცია, რომ საარჩევნო ყუთებთან რიგებია. დარწმუნებული ვიყავი, რომ დაბალანსებულ სიტუაციაში სწორი არჩევანის გაკეთება შეგვიძილია. ვამტკიცებთ, რომ ევროპელები ვართ და განსხვავებულ სიტუაციაშიც მაქსიმალურ პასუხისმგებლობას ვამჟღავნებთ. თუ გრძნობს მოსახლეობა, დღევანდელი დღეა ცვლილება. ამ ორი წლის განმავლობაში, რაც ოპოზიციაში მოვედით, გავაერთიანეთ საქართველო, დღევანდელი დღე აფორმებს ამას, რომ ჩვენ განსხვავებულ სიტუაციაში ვატარებთ არჩევნებს", - განაცხადა ივანიშვილმა.

იგი მიღწევად მიიჩნევს იმას, რომ ამომრჩევლებმა თავისუფლება იგრძნეს და ხმა საკუთარი ნებით, ძალადობის გარეშე მისცეს.

"ყველაზე დიდი მიღწევა ისაა, რომ ადამიანებს არჩევნების უფლება, ხმის მიცემის უფლება დავუბრუნეთ, მათ თავისუფლება იგრძნეს, რომ არავინ არავის არ აიძულებს. უახლეს ისტორიაში პირველად ხდება, რომ ხელისუფლება არ ცდილობს, რომელიმე კანდიდატის სასარგებლოდ გამოიყენოს სახელისუფლებო ძალა. ადამიანები არიან თავისუფლები, არ აქვთ შიშის განცდა, ამას ეკონომიკური მხარდაჭრა სჭირდება. უახლოეს 20 წელიწადში მთავარი გამოწვევა ეკონომიკა იქნება", -  თქვა პრემიერმა.

 

მარგველაშვილმა განაცხადა, რომ საქართველო დსთ-ში არასოდეს დაბრუნდება. მან გაიხსენა, რომ საქართველომ მომავალ განვითარებასთან დაკავშირებით თავისი პოზიცია 2008 წლის რეფერენდუმში აღნიშნა: "ევროპასა და ევროატლანტიკურ სტრუქტურებში ინტეგრაცია რომელიმე პოლიტიკოსის კი არა, ქართველი ხალხის სურვილია".
კანდიდატმა განაცხადა, რომ საქართველოს დსთ-ის წევრობა ეფექტური არ აღმოჩნდა და დსთ-ს ქვეყნისთვის გარანტია არ მიუცია: "ჩვენ ბელორუსელ და სხვა ქვეყნების კოლეგების განცხადებებს პატივს ვცემთ. თუმცა საქართველო დსთ-ს მიმართულებით კი არა, აშკარად ევროპისკენ მოძრაობს".