რუსები საქართველოს ნომერ პირველ მტრად აღარ განიხილავენ. ამაზე მეტყველებს რუსული არასამთავრობო ორგანიზაციის „ლევადა ცენტრის“ კვლევები. რუსების 33% მიიჩნევს რომ საქართველო მათი მტერია, მაშინ, როდესაც ჯერ კიდევ შარშან რუსების 41% ასე ფიქრობდა. საქართველომ ნომერ პირველი მტრის ტიტული აშშ-ს დაუთმო, რომელიც რუსების 39%-ის აზრით ქვეყნის მტერია.

რუსებისთვის ყველაზე მეგობრული ქვეყანა ბელარუსიაა. მას მოსდევს ყაზახეთი, ჩინეთი, უკრაინა და გერმანია.

გამოკითხვა 2013 წლის 23-27 მაისს ჩატარდა და მის ფარგლებში 1601 ადამიანი გამოიკითხა.

მთავარი პროკურორის, არჩილ კბილაშვილის შუამდგომლობის საფუძველზე "განსაკუთრებული თანამშრომლობის შესახებ" საპროცესო შეთანხმების შედეგად, სისხლის სამართლის პასუხისმგებლობისაგან  გათავისუფლებული  ბრალდებული ვლადიმერ ბედუკაძე პრეზიდენტის წინააღმდეგ სარჩელის შეტანას აპირებს. ბედუკაძე პრეზიდნეტს ცილისწამებისთვის უჩივლებს.

ბედუკაძემ ასევე ისაუბრა  პროკურორის შუამდგომლობის საკითხზე, მისი თქმით, მან გამოძიებას ინფორმაცია არა მხოლოდ ციხის კადრებთან არამედ სხვა საკითხებთან დაკავშირებითაც მიაწოდა. თუმცა კონკრეტულად ვისზე ან რა სახის ინფორმაცია არ აკონკრეტებს.

ბედუკაძემ ჟურნალისტ ირმა ინაშვილთან კონფლიქტი ამოწურა და განაცხადა რომ მათ შორის უთანხმოება "ნაციონალურ მოძრაობას" სურდა.

მოსამართლეთა კონფერენციამ იუსტიციის უმაღლესი საბჭოს მდივნად ლევან მურუსიძე 205 ხმით აირჩია. ფარული კენჭისყრის პროცესში მონაწილეობა კონფერენციაში მონაწილე 224 მოსამართლიდან 222-მა მიიღო. აქედან 205-მა ლევან მურუსიძეს მისცა ხმა. 17 ბიულეტენი კი ხმის დამთვლელმა კომისიამ ბათილად ცნო.

კენჭისყრის დაწყების წინ იუსტიციის უმაღლესი საბჭოს მდივნობის ოთხმა კანდიდატმა, მოსამართლეებმა ილონა თოდუამ, პაატა სილაგაძემ, გიორგი შავლიაშვილმა და თამარ ალანიამ საკუთარი კანდიდატურები მურუსიძის სასარგებლოდ მოხსნეს. შესაბამისად, ლევან მურუსიძე იუსტიციის უმაღლესი საბჭოს მდივნის პოსტზე ერთადერთი კანდიდატი იყო.

დღეს შინაგან საქმეთა სამინისტროში ფარული ჩანაწერების განადგურებასთან დაკავშირებით შეხვედრა გაიმართა. შეხვედრაზე დასახელდა სპეციალური კომისიის შემადგენლობა. სამუშაო ჯგუფის შემადგენლობაში არიან: გენერალური პროკურორი არჩილ კბილაშვილი, სახალხო დამცველი უჩა ნანუაშვილი, არასამთავრობო ორგანიზაცია „საერთაშორისო გამჭვირვალობის“ აღმასრულებელი დირექტორი ეკა გიგაური, საარჩევნო და პოლიტიკური ტექნოლოგიების კვლევითი ცენტრის დირექტორი კახი კახიშვილი, გაზეთ „რეზონანსის“ მთავარი რედაქტორი ლაშა ტუღუში. კომისიას უხელმძღვანელებს შინაგან საქმეთა მინისტრი ირაკლი ღარიბაშვილი.

საკუთარი ინიციატივით ორი წელი და რვა თვე სააკაშვილის მინისტრებს ხელფასებს ვუხდიდი, - ამის შესახებ საქართველოს პრემიერ-მინისტრმა ბიძინა ივანიშვილმა ბათუმში , დევნილებთან შეხვედრის დროს განაცხადა.
საპროტესტო აქციის მონაწილე დევნილების შეკითხვაზე - თუ რატომ იორმაგებენ პარლამენტარები ხელფასებს მაშინ, როცა მათი პრობლემა მოსაგვარებელია, პრემიერ-მინისტრმა აღნიშნა, რომ "ხელფასები რომ არ ჰქონდეთ პარლამენტარებს, ისევ კორუფცია იქნება".
"100 ლარი იყო პარლამენტარის და მინისტრის ხელფასი როდესაც სააკაშვილის  ხელისუფლება მოვიდა. არავის გაუგია, ჩემი ინიციატივა იყო, ორი წელი და რვა თვე მე ვუხდიდი ხელფასებს, იმიტომ, რომ მინისტრს 100 ლარი თუ ექნება, იმას კორუფციისგან ვერ დაიჭერ ვერაფრით", - აღნიშნა ბიძინა ივანიშვილმა.
პრემიერი დევნილებს დახმარებას დაჰპირდა და აღნიშნა, რომ საკითხის შესასწავლად მომდევნო კვირის განმავლობაში საქართველოს ლტოლვილთა და განსახლების მინისტრი დავით დარახველიძე ბათუმს ეწვევა.