"Gürcüstan, Azərbaycan və Türkiyə arasında münasibətlər tərəfdaşlıqdan daha böyükdür".

APA-nın yerli bürosunun məlumatına görə, bunu Gürcüstan prezidentinin beynəlxalq münasibətlər üzrə müşaviri Tengiz Pxaladze Tbilisidə keçirilən "Azərbaycan-Türkiyə-Gürcüstan: üçtərəfli əməkdaşlığın qlobal və regional determinantları” konfransında deyib. O bildirib ki, üç ölkə arasında əməkdaşlıq yalnız tranzit dəhlizi, karbohidrogenlərlə bağlı deyil: “Üç ölkə arasında tərəfdaşlıq Şərq və Qərb arasında oksigen dəhlizidir. Gürcüstan, Türkiyə və Azərbaycan Şərq və Qərb arasında alternativ əməkdaşlıq yolları təklif edir".

Müşavir qeyd edib ki, üç ölkə arasında tərəfdaşlıq həyati önəm daşıyır və xalqların gələcəyinə xidmət edir. "Azərbaycanın və Türkiyənin inkişafı Gürcüstanın inkişafı deməkdir".

"Azərbaycan, Gürcüstan və Türkiyə arasında əməkdaşlıq dinamik inkişaf edir".
 
APA-nın yerli bürosunun məlumatına görə, bu barədə Azərbaycan Respublikasının prezidenti yanında Strateji Araşdırmalar Mərkəzinin (SAM) direktoru Fərhad Məmmədov Tbilisidə keçirilən "Azərbaycan-Türkiyə-Gürcüstan: üçtərəfli əməkdaşlığın qlobal və regional determinantları" konfransında deyib. O bildirib ki, ötən il hər üç ölkənin əməkdaşlığı sahəsində əlamətdar hadisələrlə yaddaqalan olub: "Ötən il Bakı-Tbilisi-Qars dəmir yolu layihəsinin açılışı, hər üç ölkənin xarici işlər nazirinin görüşü keçirildi. Bütün bunlar göstərir ki, regional inteqrasiya pozitiv dinamika ilə inkişaf edir".
 
F. Məmmədovun sözlərinə görə, üç ölkənin strateji məqsədi ərazi bütövlüyünün bərpa olunmasıdır: “Böyük qüvvələrin ikili standartları fonunda Gürcüstanın Dağlıq Qarabağ münaqişəsi ilə bağlı Azərbaycanın mövqeyini dəstəkləməsi çox önəmlidir”. 
 
Konfransda çıxış edən Gürcüstan Strateji və Beynəlxalq Araşdırmalar Fondunun Prezidenti Yekaterina Metreveli deyib ki, üç ölkə arasında münasibətləri yüksək səviyyədə inkişaf etməkdədir: "Münasibətlərin səviyyəsi birgə maraqlara əsaslanıb. Üç ölkənin iştirakı ilə həyata keçirilən iqtisadi layihələr bütün dünyaya böyük imkanlar yaradır".
 
Ekspert qeyd edib ki, Gürcüstan Azərbaycanın dəstəyini yüksək qiymətləndirir: "Suriyanın Abxaziya və Cənubi Osetiyanı tanımasından sonra  Azərbaycan bir daha  Gürcüstanın ərazi bütövlüyün dəstəklədiyini bildirdi".
 

Y. Metrevelinin fikrincə, üç ölkə müasir dünyada mövcud təhdidlərin minimallaşdırılması üçün birgə səyləri daha da gücləndirməlidir.

Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 82 dəfə pozub.

Müdafiə Nazirliyinin saytına istinadən verdiyi xəbərə görə, Ermənistan Respublikası Noyemberyan rayonunun Voskevan kəndində, İcevan rayonu ərazisindəki adsız yüksəkliklərdə yerləşən mövqelərdən Qazax rayonunun Quşçu Ayrım kəndində və adsız yüksəkliklərdə, Berd rayonunun Çinari kəndində yerləşən mövqelərdən Tovuz rayonunun Muncuqlu kəndində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.

Tərtər rayonunun işğal altında olan Göyarx, Çiləbürt, Yarımca, Ağdam rayonunun Şıxlar, Cəvahirli, Kəngərli, Seyidli, Yusifcanlı, Mərzili, Xocavənd rayonunun Kuropatkino, Füzuli rayonunun Aşağı Veysəlli, Qərvənd, Qaraxanbəyli, Aşağı Seyidəhmədli, Qorqan, Kürdlər, Horadiz, Cəbrayıl rayonunun Nüzgar və Mehdili kəndləri yaxınlığında, həmçinin Goranboy, Tərtər və Xocavənd rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub.

"Gürcüstanda qeyri-sabitliyin yaradılması üçün heç kəsə əsas verilməyəcək".

APA-nın yerli bürosunun məlumatına əsasən, bunu Gürcüstanın baş naziri Giorgi Kvirikaşvili söyləyib.

Gürcüstanın baş naziri bildirib ki, ölkədə sabitlik təmin olunacaq: "Ədalətsizlik hissi olan insanlara gəlincə, bu, bizim üçün ciddi çağırışdır. Bütün suallara müvafiq formatda mütləq cavab veriləcək. Ölkədə sabitliyi pozmağa çalışan və tamamilə qanunsuz siyasi tələblər irəli sürən radikal qruplara qeyri-sabitliyin yaradılmasına əsas verilməyəcək".

Qeyd edək ki, Tbilisidə son günlər məhkəmə-hüquq sisteminə qarşı keçirilən davamlı etiraz aksiyasına bəzi müxalif siyasi partiyalar da dəstək verib. Partiyalar fəaliyyət planının hazırlanması məqsədilə məsləhətləşmələr aparır.

Gürcüstan prezidenti Giorgi Marqvelaşvili Tbilisidə dünən kütləvi aksiyanın keçirildiyi parlament binasının qarşısına gəlib.

APA-nın Gürcüstan bürosunun məlumatına görə, dövlət başçısı ötən il qətlə yetirilmiş yeniyetmələrdən birinin atası Zaza Saralidze ilə parlamentin qarşısında qurulmuş çadırda görüşüb.

Dünən aksiya keçirilən zaman Z. Saralidze G. Marqvelaşvilini aksiyaya qoşulmağa çağırmışdı.
 

Parlament qarşısında etiraz aksiyası bu gün saat 16:00-da bərpa olunacaq. Aksiyaya digər şəhər və bölgələrdən də iştirakçıların qatılacağı gözlənilir.

Gürcüstanın baş naziri Giorgi Kvirikaşvili istefa verməyəcəyini bildirib.

APA-nın Gürcüstan bürosunun məlumatına əsasən, bu barədə baş nazir keçirdiyi xüsusi brifinqdə deyib.

Baş nazir qeyd edib ki, onun istefası üçün vəziyyət yetişməyib.

G. Kvirikaşvili bildirib ki, səhər tezdən yeniyetmələrin qətli ilə bağlı istintaq Baş prokurorluqdan Daxili İşlər Nazirliyinə qaytarılacaq: "İstintaqa daxili işlər naziri Giorgi Qaxariya rəhbərlik edəcək".

Tbilisidə parlament binası qarşısında kütləvi aksiya davam edir.

Qeyd edək ki, Tbilisidə Gürcüstan parlamentinin binası qarşısında kütləvi aksiya keçirilir.

Aksiya iştirakçıları ötən ilin dekabrında Tbilisidə qətlə yetirilən iki məktəblinin qatillərinin cəzalandırılmasını tələb edirlər.

"Məni qətlə yetirmə" şüarlı aksiya öncə Baş prokurorluğun qarşısında Tbilisi şəhər məhkəməsinin yeniyetmələrin qətli ilə bağlı iş üzrə qərarından sonra keçirilib. Baş prokuror İrakli Şotadzenin istefasından sonra aksiya iştirakçıları parlamentin binası qarşısına doğru yürüş ediblər.

Qeyd edək ki, ötən ilin dekabrın 1-də Tbilisinin 51 saylı məktəbinin şagirdləri 16 yaşlı David Saralidze və Levan Dadunaşvili Xorava küçəsində mübahisə zamanı ölümcül bıçaq yaraları alıblar. Polis insidentdə şübhəli bilinən 2 yeniyetməni saxlayıb. Tbilisi şəhər məhkəməsi ötən gün təqsirləndirilən şəxsləri qismən təqsirli hesab edib.