"Gürcüstan hökuməti SOCAR və "Şahdəniz" konsorsiumu ilə danışıqları davam etdirir.

Əgər danışıqlar müsbət nəticələnərsə, Gürcüstan Rusiyadan əlavə qaz almaq məcburiyyətində qalmayacaq".

"Dalğa TV" "Georgia Online" xəbər portalına istinadən xəbər verir ki, bu barədə Gürcüstanın baş nazirinin birinci müavini, energetika naziri Kaxa Kaladze bildirib.

"Biz SOCAR-la aktiv şəkildə danışıqlar aparırıq. Təbii ki, konsorsiumla da mütəmadi əlaqədəyik. Danışıqların predmeti "Şahdəniz" kəməri ilə əlavə həcmdə qazın nəql olunmasıdır. Düşünürəm ki, biz bu barədə razılıq əldə edə biləcəyik. Belə olarsa, Rusiyadan əlavə həcmdə qaz almağa ehtiyac qalmayacaq", - deyə K. Kaladze bildirib.

Gürcüstan yay aylarında İranı elektrik enerjisi ilə təmin edə bilər.

"Dalğa TV" gürcü mətbuatına istinadən məlumatına görə, bu barədə hazırda İranda rəsmi səfərdə olan Gürcüstanın energetika naziri Kaxa Kaladze deyib. "Gürcüstan yay aylarında İrana elektrik enerjisi ixrac etməyə, qış aylarında isə əks istiqamətə enerji idxal etməyə hazırdır", - deyə Kaxa Kaladze bildirib.

"İran maliyyə sanksiyalarının aradan qaldırılmasından sonra vacib və maraqlı ölkə olub. Biz bu ölkənin resurslarından maksimum istifadə etməliyik. Biz yeni maraqlı layihələri həyata keçirmək üçün hər şeyi etməyə çalışmalıyıq", - Kaladze deyib.

Səfər zamanı Kaladze İran rəsmiləri ilə nəqliyyat sahəsində əməkdaşlıq məsələlərini də müzakirə edib.

"Biz İran yüklərinin daşınması üçün bizim dəhlizin maksimum səviyyədə hazır olduğunu ifadə etdik. Düşünürəm ki, belə layihələrin həyata keçirilməsi bütövlükdə ölkələrimizin iqtisadiyyatının inkişafına töhfə olacaq", - nazir qeyd edib.

Qeyd edək ki, bundan əvvəl Kaxa Kaladze mətbuat konfransında jurnalistlərə açıqlamasında İran ilə təbii qaz tədarükü məsələsini müzakirə etmək üçün İrana getdiyini bildirib.

Ukrayna və Gürcüstan Rusiyadan kənar "İpək yolu" yeni dəmir yolu nəqliyyat dəhlizinin inkişafının sürətləndirilməsinə dair razılığa gəliblər.

"Dalğa TV"nin Ukrayna prezidentinin mətbuat xidmətinə istinadən verdiyi xəbərə görə, qeyd olunan məsələ fevralın 13-də Ukrayna prezidenti Pyotr Poroşenko və Gürcüstanın baş naziri Georgi Kvirikaşvili arasında Münhen Təhlükəsizlik Konfransı çərçivəsində müzakirə olunub.


"Tərəflər iqtisadi əməkdaşlığın aktivləşdirilməsinə, xüsusilə, "İpək yolu" yeni dəmir yolu nəqliyyat dəhlizinin inkişafının sürətləndirilməsinə dair razılığa gəliblər", deyə məlumatda bildirilir.

Ukrayna prezidenti, həmçinin, ölkəsinə göstərilən humanitar yardıma görə Gürcüstanın baş nazirinə təşəkkürünü bildirib.

Qeyd edək ki, Ukraynanın infrastruktura naziri Andrey Pivovarski Rusiyadan kənar keçən "İpək yolu" dəmir yolu marşrutu üzrə qatarların mart ayından etibarən biznes-rejimində hərəkət etməyə başlayacağını bildirib.

"Fevralın sonunda Azərbaycanda bütün texniki məsələləri həll edəcək protokol imzalanacaq və mart ayından etibarən Ukrayna-Gürcüstan-Azərbaycan-Qazaxıstan-Çin marşrutu üzrə qatarlar artıq biznes-rejimində hərəkət etməyə başlayacaqlar", deyə nazir qeyd edib.

Gürcüstanın paytaxtı Tbilisidə Bakı-Tbilisi-Qars dəmir yolu layihəsi üzrə üçtərəfli Koordinasiya Şurasının iclası başlayıb.

"Dalğa TV"nin məlumatına görə, tədbiri Gürcüstanın baş nazirinin müavini, iqtisadiyyat naziri Dimitri Kumsişvili açaraq görüşün əhəmiyyətli keçəcəyini bildirib: "Bakı-Tbilisi-Qars layihəsi üç ölkə üçün çox vacib bir layihədir. Bu layihənin uğuru birbaşa iqtisadiyyatımızın inkişafına yönəldilib. Bizim mehriban qonşuluq çərçivəsində əməkdaşlığımız bu layihənin uğurudur. Bu isə ölkələrimizin ticarət-iqtisadi münasibətlərimizin yüksəlməsinə səbəb olur. Bakı-Tbilisi-Qars layihəsi Gürcüstan üçün prioritetdir. Çinin bu layihəyə qoşulması isə onun əhəmiyyətini daha da artıracaq. Biz "İpək yolu" layihəsi çərçivəsində iqtisadiyyat, enerji, sənaye sahələrində inkişafdan və Avropa ilə əməkdaşlıqdan faydalanacağıq".

Tədbirdə Azərbaycanın nəqliyyat naziri Ziya Məmmədov, Türkiyənin nəqliyyat, dəniz işləri üzrə naziri Binəli İldırım iştirak edir və hər üç nazir məruzə ilə çıxış edəcək.

İclasda Bakı-Tbilisi-Qars layihəsinin istismara verilməsi ilə bağlı məsələlər də müzakirə olunacaq.

Bu gün üçtərəfli və ikitərəfli görüşlərdən sonra Bakı-Tbilisi-Qars dəmir yolu layihəsi üzrə üçtərəfli Koordinasiya Şurasının rəhbərləri protokol imzalayacaqlar.

Tədbir KİV nümayəndələri üçün qapalı keçirilir.

İclasın sonunda mətbuat konfransı keçiriləcək.

İnfrastruktur inkişaf layihələrini həyata keçirən Avropa İnvestisiya Bankı (AİB) Gürcüstana 150 milyon avro ayıracaq.

"Dalğa TV"nin məlumatına görə, bu barədə APA-ya baş nazirin mətbuat xidmətindən bildirilib. Məlumata görə, bu gün Avropa İnvestisiya Bankı (AİB) və Gürcüstanın dövlət administrasiyası arasında maliyyə müqavilələri imzalanıb.

Məlumata görə, maliyyə sənədlərini Gürcüstanın maliyyə naziri Nodar Xaduri və Avropa İnvestisiya Bankının vitse-prezidenti Laszlo Baraniais imzalayıb. Tədbirdə baş nazir Giorgi Kvirikaşvili iştirak edib.

Bildirilib ki, Avropa İnvestisiya Bankı Gürcüstanın müxtəlif regionlarında kiçik infrastruktur layihələr həyata keçirəcək. Bu məqsədlə bank "Şəhərin İnkişafı və yenidənqurma layihəsi" çərçivəsində Gürcüstana 100 milyon avro ayıracaq. Ayrılan vəsait çərçivəsində yollar, küçələr, su, kanalizasiya sistemi, turizm infrastrukturunun inkişaf etdirilməsi, seldən zərər görən infrastruktur bərpa olunacaq.

Tədbirdə həmçinin Gürcüstanın Şərq-Qərb istiqamətində Osiauri kəndinin Çumateleti hissəsində avtomobil yolunun tikintisi üçün 49,45 mln avro vəsait ayrılacağı bildirilib.

Tədbir çərçivəsində G. Kvirikaşvil ilə AİB-nın vitse-prezidenti Laszlo Baraniais arasında görüş olub. Baş nazir infrastruktur layihələrin tikintisinə ayrılan vəsait üçün AİB-nın vitse-prezidentinə minnətdarlığını bildirib və AİB ilə əməkdaşlığın getdikcə dərinləşəcəyinə ümidvar olduğunu qeyd edib.

Tədbirdə Aİ-nin Gürcüstandakı səfiri Yanoş Herman, Gürcüstanın maliyyə naziri Nodar Xaduri və Regional İnkişaf və İnfrastruktur naziri Nodar Cavaxişvili iştirak edib.

Ucuzlaşma davam edir.

Dünya bazarlarında neftin qiyməti yenidən ucuzlaşır.

"Dalğa TV" hərracların gedişinə istinadən xəbər verir ki, Bakı vaxtı ilə saat 08:46-ya olan məlumata görə, ICE London qitələrarası birjasında Brent neftinin mart fyuçeslərinin qiyməti bir barelə görə 1,13% azalaraq 30,49 dollar təşkil edib.

Nyu-Yorkun NYMEX əmtəə birjasında elektron ticarət əməliyyatlarının gedişində WTI neftinin qiyməti 1 barelə görə 2,19% ucuzlaşaraq 26,85 dollar olub.