Qlobal Bakı Forumunda “Geosiyasi dəyişmələr: Məsuliyyətli tərəfdaşlıq rəqabətə qarşı” adlı panel keçirilib
XII Qlobal Bakı Forumu: Geosiyasi dəyişikliklər və tərəfdaşlıq
Bakıda keçirilən XII Qlobal Bakı Forumu, Azərbaycan Prezidenti İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə davam edir. Forum çərçivəsində “Geosiyasi dəyişmələr: Məsuliyyətli tərəfdaşlıq rəqabətə qarşı” adlı panel iclası keçirilib.
Panelə Gürcüstanın sabiq Baş nazir müavini Eka Tkeşelaşvili moderatorluq edib. İlk çıxış edən Avropa İttifaqı Şurasının sabiq Prezidenti, Belçikanın keçmiş Baş naziri Şarl Mişel pandemiya və Rusiya-Ukrayna müharibəsinin Avropa üçün yaratdığı çətinliklərdən danışıb. O, çoxqütblü dünyanın vacibliyini vurğulayaraq, Avropanın birlik içində güclü ola biləcəyini bildirib.
Azərbaycan Prezidentinin köməkçisi Hikmət Hacıyev isə çıxışında bölgədəki geosiyasi proseslərə toxunub. O, Cənubi Qafqazda yeni reallıqların formalaşdığını və Azərbaycanın sülh müqaviləsi danışıqları apardığını qeyd edib. “Ermənistan silahlandırılarsa, bu, bölgədə yeni parçalanma yarada bilər”, – deyə o bildirib. Hacıyev həmçinin Azərbaycan və Mərkəzi Asiya ölkələri arasında əlaqələrin gücləndiyini, Türk Dövlətləri Təşkilatının yeni reallıq kimi önə çıxdığını vurğulayıb.
Latviyanın sabiq Prezidenti Vayra Vike-Freyberqa dünyada populizmin artdığını və məntiqsiz arqumentlərin yayıldığını təəssüf hissi ilə qeyd edib. Türkiyənin sabiq xarici işlər naziri Mövlud Çavuşoğlu isə İkinci Dünya müharibəsindən sonra formalaşan qlobal nizamın artıq dəyişdiyini və gələcəkdə Çin-ABŞ rəqabətinin ön planda olacağını bildirib.
Çinin Avropa məsələləri üzrə xüsusi nümayəndəsi Vu Honqbo çoxqütblü dünyanın qaçılmaz olduğunu vurğulayıb. O, BMT-nin islahata ehtiyacı olduğunu, lakin təşkilatın qorunub saxlanılmalı olduğunu qeyd edib.
ARTOC İnvestisiya və İnkişaf Qrupunun sədri Şafik Qabri geosiyasi dəyişikliklərin iqtisadiyyata birbaşa təsir etdiyini vurğulayaraq, sabit geosiyasət olmadan sabit iqtisadiyyatın mümkün olmadığını deyib. Yunanıstan Baş nazirinin nümayəndəsi Dimitris Avramopoulos isə Avropa İttifaqında birlik çatışmazlığını və millətçiliyin artmasını narahatlıq doğuran amillər kimi qeyd edib. O, Azərbaycanın bölgədə sabitləşdirici rol oynadığını bildirib.
Panel müzakirələrlə davam edib.
