ABŞ Prezidenti iki atom sualtı qayığının Rusiya yaxınlığında yerləşdirilməsini əmr edib

ABŞ Prezidenti Donald Tramp iki atom sualtı qayığının Rusiya yaxınlığındakı bölgələrdə yerləşdirilməsi barədə əmr verib.
“Dalğatv” “AZƏRTAC”-a istinadən xəbər verir ki, bu qərar Rusiya Federasiyası Təhlükəsizlik Şurasının sədr müavini, ölkənin keçmiş prezidenti Dmitri Medvedevin son açıqlamasından sonra qəbul edilib.

Tramp bəyanatında bildirib:

“Bu cür məsuliyyətsiz və təxribat xarakterli açıqlamaların artma ehtimalını nəzərə alaraq, iki atom sualtı qayığının müvafiq bölgələrdə yerləşdirilməsi barədə göstəriş verdim. Sözlərin ciddi nəticələri ola bilər və çox zaman gözlənilməz hadisələrə səbəb olur. Ümid edirəm ki, bu, həmin hallardan biri olmayacaq.”

Xatırladaq ki, ABŞ Prezidentinin Rusiyaya atəşkəslə bağlı 10 günlük müddət verdiyini bildirməsindən sonra Dmitri Medvedev bu açıqlamaya münasibət bildirib. O, Trampı ölkələrlə ultimatum dilində danışmaqda ittiham edərək deyib:

“Tramp yadda saxlamalıdır ki, Rusiya nə İsrail, nə də İrandır. Hər yeni ultimatum təhlükə və müharibəyə doğru atılmış addımdır.”