Gürcüstan və Ermənistan prezidentləri İrəvanda görüşüb
Gürcüstan Prezidenti Mixeil Kavelaşvili rəsmi səfər çərçivəsində Ermənistana səfər edib və İrəvanda Ermənistan Prezidenti Vaaqn Xaçaturyanla görüş keçirib. Görüş Prezident sarayında baş tutub.
Prezident Administrasiyasının yaydığı məlumata görə, liderlər arasında baş tutan təkbətək görüş zamanı Gürcüstan və Ermənistan arasında dostluq əlaqələrinin mövcud vəziyyəti, ikitərəfli əməkdaşlığın dərinləşdirilməsi və qarşılıqlı maraq doğuran məsələlər ətrafında fikir mübadiləsi aparılıb.
Prezident Kavelaşvili, Ermənistanın Gürcüstanın suverenliyi və ərazi bütövlüyünə göstərdiyi dəstəyə görə Prezident Xaçaturyana minnətdarlığını bildirib. Görüşdə, həmçinin regionda sülhün və sabitliyin təşviqi məsələləri də diqqət mərkəzində olub.
Gürcüstan Prezidenti qeyd edib ki, Tbilisidə keçirilən Gürcüstan, Ermənistan və Azərbaycan xarici işlər nazirlərinin üçtərəfli görüşü Cənubi Qafqazda əməkdaşlıq və dialoqun inkişafına töhfə verir. O, bu formatın gələcəkdə davam etdiriləcəyinə ümid etdiyini ifadə edib.
Görüşün sonunda hər iki ölkə lideri birgə mətbuat konfransı keçirərək jurnalistlərin suallarını cavablandırıblar.
